ஆங்கில வழி கல்வி அவசியமா?

by **Powenraj** Tue May 21, 2013 6:38 am

ஒரு நாட்டின் முன்னேற்றத்துக்கும், நாகரீகத்துக்கும், அறிவாற்றலுக்கும் கல்வி என்பது மிக மிக இன்றியமையாததாகும். ஏழை–எளிய மக்கள்கூட தங்கள் பிள்ளைகள் பள்ளிக்கூடத்துக்குப் போய் படிப்பதைவிட, தன்கூடமாட வேலை செய்தால், வீட்டில் வறுமை தாண்டவமாடாதே என்ற நிலை இருந்தாலும், நம் பிள்ளைகள் நாலெழுத்து படித்தால் அவன் கஷ்டமில்லாமல் வாழ்க்கையைநடத்துவானே என்று பள்ளிக்கூடத்துக்கு அனுப்பிவிடுகிறார்கள். அவர்கள் கனவு நனவாக ஏற்ற வகையில், அரசும் இலவசமாக கல்வியை அளித்துவருகிறது. இலவச நோட்டு புத்தகத்தில் தொடங்கி, இலவச சீருடை, இலவசசைக்கிள், சத்துணவு, இலவச கம்ப்யூட்டர் என்று எல்லாவற்றையுமே இலவசமாக வழங்கி, உன்னுடைய எல்லா தேவைகளையும் அரசே பார்த்துக்கொள்ளும், நீ உன் கல்வியில் மட்டும் கவனம் செலுத்தி, வாழ்க்கையில் முன்னேறு என்ற ஒரு அற்புதமான சூழ்நிலை தமிழ்நாட்டில் உருவாக்கப்பட்டுள்ளது.
அரசு பள்ளிக்கூடங்கள் ஒருபுறம் சிறப்பாக இயங்கிக்கொண்டு இருக்கும்நிலையில், பணம் கட்டிப்படிக்கும் தனியார்பள்ளிக்கூடங்களும் புற்றீசல்போல தமிழகம் முழுவதும் ஏராளமாக தொடங்கப்பட்டு நடந்து வருகின்றன. மெட்ரிகுலேஷன் பள்ளிக்கூடங்கள், சி.பி.எஸ்.இ. என்று சொல்லப்படும் மத்திய செகண்டரி கல்வித்திட்டத்தின் கீழ் கற்றுக்கொடுக்கும் பள்ளிக்கூடங்கள் என்று மாணவர்கள் பணம் கட்டிப்படிக்கும் பள்ளிக்கூடங்கள், இப்போது ஊர் ஊருக்கு தொடங்கப்பட்டு மாணவர்களுக்கு அங்கு படிக்க அனுமதி கிடைக்காத நிலையில், கடும் கிராக்கி ஏற்பட்டுள்ளது என்பதை யாரும் மறுக்க முடியாது. அரசு பள்ளிக்கூடங்களில் வழங்கப்படும் இலவச கல்வியை விட்டுவிட்டு, சாதாரண நடுத்தர மக்கள் மட்டுமல்லாமல், ஏழை–எளிய மக்கள்கூட தங்கள் குழந்தைகளை பணம் செலவானாலும் பரவாயில்லை, கடனை வாங்கியாவது இத்தகைய பள்ளிக்கூடங்களில் படிக்கவைக்க வேண்டும் என்ற உணர்வு வளர்ந்து இருப்பதற்கு காரணம், தன் பிள்ளையும் கழுத்தில் டை கட்டி, காலில் ஷூ அணிந்து, தஸ் புஸ் என்று ஆங்கிலத்தில் பேசவேண்டும், ஆங்கில வழி கல்வி படித்து உயர்ந்த பதவியை அடைய வேண்டும் என்றதணியாத ஆசை இருப்பதுதான்.
அதற்கேற்றாற்போல, ஆங்கில வழி கல்வி படித்தவர்கள் உலகமயமாதல், தாராளமயமாக்குதல், தனியார்மயமாக்குதல் கொள்கைகளால் தொடங்கப்படும் எண்ணற்ற தனியார் நிறுவனங்களில், அறிவில் முந்துதல், பந்தயத்தில் முந்துதல் என்ற நிலையில், வேலைவாய்ப்புகளைப் பெறும்போது, என்னதான் அரசுபணிகளில் தமிழில் படித்தவர்களுக்கு வேலைவாய்ப்புகளை அளித்தாலும், அவர்களோடு போட்டியிட்டு நல்ல சம்பளத்தில் தனியார் நிறுவனங்களில் வேலையில் சேர முடியவில்லை. இந்த நிலையைப் போக்கி, பணம் இல்லாததால் ஆங்கில வழி கல்வி பெறமுடியவில்லை என்ற நிலை இருக்கக்கூடாது என்பதற்காக, கடந்த ஆண்டே தமிழக அரசு ஊராட்சி ஒன்றியமற்றும் அரசின் 320 பள்ளிக்கூடங்களில் ஒன்று மற்றும் 6–வது வகுப்பில், தலா 2 ஆங்கில வழிப்பிரிவுகள் என, 640 வகுப்புகளைத் தொடங்க அரசு அனுமதித்து, இப்போது அந்த வகுப்புகள் நடந்து வருகின்றன.
என்ன காரணமோ தெரியவில்லை இப்போது ஒரு லட்சத்து 50 ஆயிரம் மாணவர்கள் ஆங்கில வழி கல்வியை இலவசமாகப் பெறும் வகையில், தேவைப்படும் அனைத்து அரசு பள்ளிக்கூடங்களிலும், இத்தகைய வகுப்புகள் தொடங்கப்படும் என்று அறிவித்தவுடன், முன்பு இல்லாத வகையில் எதிர்ப்பு கிளம்பியுள்ளது. தமிழ் இனிமெல்லச்சாகும். தாய்மொழியில் கல்வி கற்றால்தான் அறிவு மேம்படும். தமிழ்தான் பயிற்று மொழியாக இருக்கவேண்டும் என்கிறார்கள். தமிழுக்கு ஒரு தாழ்வு எந்தக்காலத்திலும் நிச்சயமாக வந்துவிடக்கூடாது. ஆங்கில மோகத்தின் அடிப்படைக் காரணம் வேலைவாய்ப்புதான். தமிழில் படித்தால்தான் அதிக வேலைவாய்ப்பு என்ற நிலை உருவாகிவிட்டால், நிச்சயமாக ஆங்கில கல்விமோகம் மாணவர்களுக்குஇருக்காது. அதற்கான முயற்சிகளை எல்லோரும் எடுத்தால்தான், இந்த பிரச்சினைக்கு ஒரு தீர்வு காணமுடியும்.
-
தினந்தந்தி