காவிரி ஆற்றில் கழிவுநீர் கலப்பதால் நிறம் மாறும் நீராதாரங்கள்!

http://media.dinamani.com/article1522356.ece/ALTERNATES/w460/wasteoutlet.jpg
பள்ளிபாளையம் பகுதியில் காவிரி ஆற்றில் கலக்கும் சாயக் கழிவுநீர்.
http://media.dinamani.com/article1522357.ece/ALTERNATES/w460/waterpurification.jpg
பள்ளிபாளையம் அருகேயுள்ள சீராம்பாளையத்தில் காவிரி ஆற்றையொட்டியுள்ள குடிநீர்சுத்திகரிப்பு நிலையத்தினுள் நிறம் மாறிய நிலையில் காவிரி நீர்.
-
நாமக்கல் மாவட்டம், குமாரபாளையம், பள்ளிபாளையம் பகுதிகளில் சாயப்பட்டறை, தோல் தொழிற்சாலைகள், நகராட்சிப் பகுதிகளிலிருந்து சுத்திகரிக்கப்படாத கழிவுநீர் காவிரியில் வெளியேற்றப்படுவதால், ஆற்று நீரின் நிறம் மாறி நச்சுத் தன்மையடையும் நிலை ஏற்பட்டுள்ளதாகப் புகார் எழுந்துள்ளது.
நாமக்கல், ஈரோடு, கரூர் உள்பட பல மாவட்டங்களில் செயல்படுத்தப்படும் குடிநீர்த் திட்டங்களுக்குக் காவிரி ஆற்றிலிருந்தே தண்ணீர் எடுக்கப்பட்டு வருகிறது.
மேட்டூர் அணையிலிருந்து ஊராட்சிக்கோட்டை வரை மாசின்றி காணப்படும் காவிரித் தண்ணீர், குமாரபாளையத்திலிருந்து மாசடையத் தொடங்குகிறது. குமாரபாளையம், பள்ளிபாளையம், பவானி நகராட்சிகளில் சாக்கடைக் கழிவுநீரை சுத்திகரிக்க, சுத்திகரிப்பு நிலையங்கள் இல்லாததே இதற்குக் காரணம்.
மேலும் குமாரபாளையம், பள்ளிபாளையம், ஈரோடு ஆகிய பகுதிகளில் செயல்படும் சாயப்பட்டறைகள், தோல் தொழிற்சாலைகள் சுத்திகரிக்கப்படாத கழிவுநீரை இரவு நேரங்களில் காவிரி ஆற்றில் வெளியேற்றி வருகின்றன. இதனால், காவிரி ஆற்றுத் தண்ணீர் நிறம் மாறிபயன்படுத்த முடியாத நிலை உள்ளது.
மேலும், குடிநீர் சுத்திகரிப்பு நிலையங்களிலும் தண்ணீர் முழுமையாக சுத்திகரிக்கப்படுவதில்லை. இதனால், அந்த நீரைப் பயன்படுத்தும் மக்களுக்கு பல்வேறு உடல் உபாதைகள் ஏற்படுகின்றன என்றார் தமிழ் மீட்சி இயக்க மாநிலச்செயலர் சி.நந்தகோபால்.
இதுபற்றி சுற்றுச்சூழல் ஆர்வலர்கள் கூறியது:
காவிரி ஆற்று நீர் மாசுபடுவதை உணர்ந்து குமாரபாளையம், ஈரோடு சோலார்பகுதியில் இயங்காமல் உள்ள சாக்கடைக் கழிவுநீர் சுத்திகரிப்பு நிலையங்களை இயக்குவதற்கான நடவடிக்கை மேற்கொள்ள வேண்டும். பவானி, பள்ளிபாளையம் நகராட்சிகளிலிருந்தும் சாக்கடைக் கழிவுநீர் நேரடியாக ஆற்றில் கலக்காமல் தடுக்க மாற்று வழிகளை நடைமுறைப்படுத்த வேண்டும்.
மேலும், சுத்திகரிப்பு நிலையங்கள் இல்லாத சாயப்பட்டறைகள், தோல் தொழிற்சாலைகளை முழுமையாக மூட வேண்டும் என்றனர்.
தமிழ்நாடு மாசுக்கட்டுப்பாட்டு வாரியத்தின் நாமக்கல் மாவட்டச் சுற்றுச்சூழல் பொறியாளர் முருகன் கூறியது:
விவசாய நிலங்களில் உள்ள அனுமதியற்ற சாயப்பட்டறைகளைஇடிக்கும் போது அந்தப் பகுதி விவசாயிகளும், தொழிலாளர்களும் எதிர்ப்புத் தெரிவிக்கின்றனர்.
இதனால், அனுமதியற்ற சாயப்பட்டறைகளை முழுமையாக அப்புறப்படுத்துவதில் சிக்கல் நிலவுகிறது. காவிரிஆற்று நீர் மாசடைவதைத் தடுக்க மாவட்ட நிர்வாகத்துடன் கலந்தாலோசித்து நடவடிக்கை எடுக்கப்படும் என்றார் அவர்.
-
தினமணி