சட்டம் வெல்லட்டும்...

இரண்டு மதங்களை சேர்ந்த மக்களுக்கு இடையே மோதலை உண்டாக்கும் வகையில் பேசியதாக ஹைதராபாத்தில் ஒரு கட்சியின் தலைவர் கைது செய்யப்பட்டுள்ளார். இத்தனை காலமாக ஏன் விட்டு வைத்திருந்தது காவல்துறை என்று பலரும் கேட்கின்றனர்.மகாராஷ்டிரா குஜராத் ராஜஸ்தானில் இதே போல வேற்றுமதத்தினரை இழிவாக பேசிய தலைவர்களை அங்குள்ள காவல்துறையும் அரசும் கைது செய்யாமல் விட்டு வைத்ததற்கு என்ன காரணமோ அதுதான் இதற்கும் பொருந்தும்.
:-
‘ஒரு தரப்பு மக்கள் குற்றம் சொல்கிறார்கள்; கோபத்தில் கொந்தளிக்கிறார்கள் என்பதால் அவரை கைது செய்தால் அவருடைய தரப்பு மக்கள் பொங்கியெழுந்து போராட்டத்தில் குதிப்பார்கள். அதனால் சட்டம் ஒழுங்கு சீர்குலையும். எந்த தரப்பையும் சாராத அல்லது இரு தரப்பிலும் உள்ள அப்பாவி மக்கள் பாதிக்கப்படுவார்கள்’ என்று ஆட்சித் தலைமைக்கு காவல் துறை அறிக்கை அளிக்கும். ‘அப்படியானால் நடவடிக்கை எடுக்க வேண்டாம்;தானாக பதட்டம் தணியட்டும்’ என்று ஆட்சியாளர்கள் கூறிவிடுவார்கள். இந்த காட்சிகளை பல காலமாக பார்த்து வருகிறோம்.
:-
அனைத்து குற்றங்களுக்கும் சட்டங்களில் தண்டனை வரையறை செய்யப்பட்டுள்ளது. சட்டங்களை பயன்படுத்தி குற்றவாளிகளை கைது செய்து வழக்கு நடத்தி தண்டனை பெற்றுக் கொடுக்கும் நேர்மையையும் துணிச்சலையும்தான் காணோம். முன்னது இருந்தால் பின்னது பிறக்கும். குறுகிய அரசியல்ஆதாயங்களுக்காக பொறுப்பற்றநபரை வளர்த்து விட்டு, குற்றச் செயல்களில் ஈடுபட ஊக்குவித்து, தாதாவாக மாற்றி பின்னர் காவல்துறையே பாதுகாப்பு கொடுக்கும் நிலைக்கு கொண்டு செல்வது அதிகார வர்க்கம்தான்.
:-
வளர்த்த கடா மார்பில் பாயும் என்பதற்கு ஏற்ப அந்த விஷமிகள் ஒரு கட்டத்தில் அடக்கவோ ஒடுக்கவோ முடியாத சக்தியாக மாறுகின்றனர். பிரதமரை இழந்தோம். பிரதமராக வரவிருந்தவரை பறி கொடுத்தோம். தேவையற்ற கலவரங்களில் பல்லாயிரம் உயிர்களை பலி கொடுத்தோம். ஆனாலும் பாடம் படிக்க மறந்தோம். எங்காவது தொடங்க வேண்டும். ஹைதராபாத்தில் தொடங்கியிருக்கிறது. கட்சி,மதம், ஜாதி, மொழி வேறுபாடுகளுக்கு அப்பாற்பட்டு நாடு முழுவதும் பரவிக் கிடக்கும் இத்தகைய பேச்சாளர்களின் நாவை அடக்க சட்டத்தின் கரங்கள் நீளட்டும்.
:-
தினகரன்