லண்டன் ஒலிம்பிக்கை படம் எடுத்த சுகுமாரின் அனுபவங்கள்

by அச்சலா Fri Dec 28, 2012 11:11 am

லண்டன் ஒலிம்பிக்கை படம் எடுத்த சுகுமாரின் அனுபவங்கள்

சென்னையைச் சேர்ந்த பிரபல ஸ்போர்ட்ஸ் போட்டோகிராபர் எஸ்.சுகுமார், லண்டன் ஒலிம்பிக் போட்டியின்போது தான் எடுத்த படங்களைக்கொண்டு ஒரு புகைப்பட கண்காட்சி வைத்துள்ளார்.
ஏற்கனவே சீனாவில் கடந்த 2008ம் ஆண்டு நடந்த ஒலிம்பிக் போட்டி உள்பட, நூற்றுக்கணக்கான தேசிய, சர்வதேச விளையாட்டுப் போட்டிகளை படமெடுத்துள்ள இவரது கேமிராவில் பதிவாகாத பிரபலங்களே இல்லை எனலாம்.

இந்த ஒலிம்பிக் போட்டியில் இவர் எடுத்துள்ள படங்கள் ஒவ்வொன்றும் அபாராமானவை, அற்புதமானவை. நேரில் பார்த்து ரசிக்கவேண்டியவை.
ஒலிம்பிக்கில் எடுத்த 200 புகைப்படங்களை தொகுத்து சென்னை ஆழ்வார்பேட்டை, கஸ்தூரி ரங்கன் சாலையில் உள்ள ஆர்ட் ஹவுசில் புகைப்படக்கண்காட்சியாக வைத்துள்ளார்.

படங்களின் பின்னணியையும், அதை எடுக்கும்போது ஏற்பட்ட அனுபவங்களையும் சுகுமார் கூறும்போது படு சுவராஸ்யமாக உள்ளது.
உதாரணத்திற்கு ஒரு விஷயம்....

லண்டன் ஒலிம்பிக்கின் ஹீரோ என்றால் அது நூறு மீட்டர் ஓட்டத்தில் சாதனை படைத்த உசேன் போல்ட்தான். இவர் ஓடுவதை படம் எடுக்க, லண்டன் ஒலிம்பிக்கை படமெடுக்க அனுமதிபெற்ற 12 ஆயிரம் போட்டோகிராபர்களும் குவிந்துவிட்டனர். ஓட்டத்தின் முடிவில் கிடைக்கும் உசேன் போல்டின் முக பாவனைகளை படமெடுக்க முதல் ஆளாக போய்விடுவோம் என்று, நான்கு மணி நேரத்திற்கு முன்பாகவே சுகுமார் தனது கேமிராவை தூக்கிக்கொண்டு போய் இருக்கிறார், போனால் அங்கே இவரை முந்திக்கொண்டு நாலாயிரம் போட்டோகிராபர்கள் வந்து தங்களுக்கான இருக்கையை "துண்டு' போடாத குறையாக பிடித்து வைத்திருந்தனர்.
பிறகு சுகுமார் ஒரு இடத்தை தேர்வு செய்து உசேன் போல்டை தான் விரும்பியபடி நேர்த்தியாய் பல படங்கள் எடுத்தார், அந்த படங்கள் யாவும் இந்த கண்காட்சியில் உள்ளது.

இது போல பல, பல படங்கள் அத்தனையும் போட்டோகிராபர்களுக்கு பாடங்கள்.
வெறும் விளையாட்டு மட்டுமின்றி விளையாட்டின் போது நடந்த சில சுவராசியங்களையும் அற்புதமாக பதிவு செய்துள்ளார், ஐயாயிரம் மீட்டர் ஒட்டத்தில் வெற்றி பெற்ற வீரர், அந்தவெற்றி களிப்புடன் ஒடிவந்து தனது அன்பு மகளிடம் கண்களால் சொல்லும் சந்தோஷச் செய்தியை வார்த்தைகளால் விவரிக்க முடியாது.

வெறும் "ஆக்ஷன்' மட்டுமே எனது குறிக்கோள் அல்ல, வெற்றி பெற்ற பிறகு சில வீரர்கள் சில வினாடிகளில் வெளிப்படுத்தும் தங்களது மின்னல் வேக சந்தோஷங்களை பதிவு செய்வதும் எனக்கு பிடித்த விஷயம் என்று சொல்லும் போது சுகுமாரின் வார்த்தைக்கு பின்னால் உள்ள அனுபவமும், தனித்திறமையும் வெளிப்படுகிறது.
விளையாட்டு வீரர்களுக்கு உற்சாகத்தையும், பொதுமக்களுக்கு உவகையும் தரக்கூடிய இந்த படக்கண்காட்சிக்கு ஏற்பாடுகளை சுந்தரம் பைனான்ஸ் நிறுவனம் செய்துள்ளது. கண்காட்சி 29ம் தேதி தேதி வரை இந்த ஆர்ட் ஹவுசில் நடைபெறும், பின்னர் மைலாப்பூர் பாரதீய வித்யாபவன் அரங்கில் நடைபெறும். கண்காட்சி சம்பந்தமாக பேச விரும்புபவர்கள் தொடர்பு கொள்ள வேண்டிய எண்: 9840208888.

-தினமலர்