மாரியம்மன் சிலை மீது அமர்ந்திருக்கும் பச்சைக்கிளி : வழிபட்டு செல்லும் பொதுமக்கள்




சூலூர்:சூலூர் அருகே மாரியம்மன் சிலை மீது, அமர்ந்து இருக்கும் கிளியை, பொதுமக்கள் ஏராளமானோர் அதிசயத்துடன் பார்த்து, வழிபட்டு செல்கின்றனர்.கோவை மாவட்டம், சூலூர் அடுத்த கண்ணம்பாளையம் பேரூராட்சிக்குட்பட்ட, சிந்தாமணிப்புதூரில், சக்தி மாரியம்மன் கோவில் உள்ளது. இக்கோவிலில், சித்திரை மாதத்தில், பொங்கல் திருவிழா சிறப்பாக நடக்கும். இங்கு நடக்கும் கம்பம் நடும் விழாவில், சுற்றுவட்டார கிராம மக்கள் ஏராளமானோர் பங்கேற்பர்.சில நாட்களுக்கு முன், கோவில் கருவறைக்குள் புகுந்த பச்சைக்கிளி ஒன்று, மாரியம்மனின் வலதுகையில் அமர்ந்து கொண்டது. இதை, ஏராளமான பக்தர்கள்
பார்த்து, பரவசமடைகின்றனர்.இதுகுறித்து, கோவில் நிர்வாகிகள் கூறியதாவது:கடந்த, 25 நாட்களுக்கு முன், கோவிலில் பூஜை செய்து கொண்டிருந்த போது, இடது கண்ணில் காயத்துடன் பறந்து வந்த கிளி, கர்ப்பகிரகத்துக்குள் சென்று, அம்மன் சிலை மீது அமர்ந்து கொண்டது. அன்று முதல், கிளியை வெளியே கொண்டு வந்து விட்டாலும், மீண்டும், அம்மனின் சேலையை பிடித்து, மேலே சென்று அமர்ந்து கொள்கிறது.இவ்வாறு அவர்கள் கூறினர்.

பூசாரி ரவி கூறியதாவது:அபிஷேகம் செய்யும் போது மட்டும், கிளி, கீழே இறங்கி விடுகிறது. மற்ற நேரங்களில், அம்மனின் மீதே அமர்ந்திருக்கிறது. இரவு கோவிலை பூட்டும் போதும்
கூட, கருவறையை விட்டு வெளியில் வருவதில்லை. பழம் மற்றும் பொங்கலை, விரும்பிச் சாப்பிடுகிறது. அர்ச்சனை செய்யும் போதோ, மணி அடிக்கும்போதோ பயப்படுவதில்லை. சுற்று வட்டார மக்கள் பலரும், அதியசத்துடன் கிளியை பார்த்து, வணங்கிச் செல்கின்றனர்.இவ்வாறு அவர் கூறினார்.

-தினமலர்

தகவலுக்கு நன்றி