பா.ஜ., -வு‌க்கு முழு‌‌க்கு எம்.எல்.ஏ., பதவியை இன்று ராஜினாமா செய்கிறார் எடியூரப்பா

by அச்சலா Fri Nov 30, 2012 10:07 am

பெங்களூரு: "கர்நாடக ஜனதா கட்சி' யில் சேரவுள்ள, அம்மாநில முன்னாள் முதல்வர் எடியூரப்பா, பா.ஜ., - எம்.எல்.ஏ., பதவியை, இன்று ராஜினாமா செய்கிறார். பா.ஜ., உறுப்பினர் பதவியிலிருந்து விலகும் கடிதத்தை, "பேக்ஸ்' மூலம், கட்சி அலுவலகத்துக்கு அனுப்புகிறார்.நில முறைகேடு உட்பட பல வழக்குகளில் சிக்கிய, கர்நாடகா முன்னாள் முதல்வர் எடியூரப்பா, கடந்தாண்டு ஜூலை, 31ம் தேதி, முதல்வர் பதவியிலிருந்து விலகினார். ஊழல் புகாரிலிருந்து விடுவிக்கப்பட்ட பின், மீண்டும் முதல்வர் பதவி வழங்கப்படும் என, மேலிட தலைவர்கள் உறுதியளித்தனர்.
அதற்கேற்ற வகையில், ஒரு வழக்கிலிருந்து, எடியூரப்பாவை, கர்நாடக ஐகோர்ட் விடுவித்தது. மீண்டும் முதல்வர் பதவி கேட்டு, எடியூரப்பா அடம் பிடித்தார். ஆனால், மேலிடம், அதற்கு சம்மதிக்கவில்லை.இதனால், மேலிட தலைவர்கள் மட்டுமின்றி, கர்நாடக, பா.ஜ., தலைவர்கள் மீதும் கோபமடைந்தார்; புதிய கட்சி துவக்குவதாக அறிவித்தார்.கே.ஜி.பி., - கர்நாடகா ஜனதா கட்சி என்ற பெயரில், டிசம்பர், 9ம் தேதி, ஹாவேரியில் புதிய கட்சியின் துவக்க விழா நடக்கிறது. இக்கட்சியின் தலைவராக முன்னாள் மத்திய அமைச்சர் தனஞ்ஜய் குமார், ஏற்கனவே தேர்வு செய்யப்பட்டுள்ளார்.
புதிய கட்சி துவக்குவதால், ஷிமோகா மாவட்டம் ஷிகாரிபுரா, எம்.எல்.ஏ., பதவியை, எடியூரப்பா இன்று ராஜினாமா செய்கிறார். ராஜினாமா கடிதத்தை சபாநாயகர் போப்பையாவிடம் வழங்குகிறார்.இதை தொடர்ந்து, தன், பா.ஜ., உறுப்பினர் பதவி ராஜினாமா கடிதத்தை, பேக்ஸ் மூலம் பா.ஜ., அலுவலகத்துக்கு அனுப்புகிறார்.எடியூரப்பா கூறியதாவது, கடவுள் விருப்பப்படி, என், பா.ஜ.,- எம்.எல்.ஏ., பதவியை ராஜினாமா செய்கிறேன். என் ராஜினாமாவுக்காக யாரையும் குற்றம் சொல்ல விரும்பவில்லை. பெங்களூரு சேஷாத்திரி ரோட்டிலுள்ள, சுதந்திரா பார்க்கிலிருந்து இன்று, காலை, 10:30 மணிக்கு ஊர்வலமாக புறப்பட்டு, விதான் சவுதா சென்று, என் ராஜினாமா கடிதத்தை சபாநாயகர் போப்பையாவிடம் கொடுக்கிறேன், இவ்வாறு அவர் கூறினார்.
70 வயதாகும் எடியூரப்பா கர்நாடகாவில் பெரும்பான்மையினராக உள்ள லிங்காயத் சமூகத்தை சேர்ந்தவராவார். இவர் கடந்த 1972-ல்ஜன சங்கா அமைப்பில் இணைந்து சிகாரி புரா தாலகா தலைவராக தேர்ந்தெடு்க்கப்பட்டார். தொடர்ந்து 1983-ல் முதன் முறையாக கர்நாடக மாநில சட்டசபைக்கு தேர்ந்தெடுக்கப்பட்டார். தென் மாநிலங்களில் பா.ஜ., ஆட்‌சி அமைப்பதற்கும் தென் மாநிலங்களில் பா.ஜ.,வின் முதல் முதல்வர் என்ற பெருமைக்கும் சொந்தக்காரராக திகழ்ந்துள்ளார்.

-தினமலர்