காவிரி பிரச்னை: தமிழக, கர்நாடக முதல்வர்கள் பேசித் தீர்க்க சுப்ரீம் கோர்ட் அறிவுரை

புதுடில்லி: நீண்டு கொண்டே வரும் காவிரி பிரச்னையில், இரு மாநில மக்களின் நலன்களும் பாதிக்காத வகையில், இரு மாநில முதல்வர்களும் பேச்சு வார்த்தை நடத்த வேண்டும் என சுப்ரீம்கோர்ட் அறிவுரை வழங்கியுள்ளது.

காவிரியில் தமிழகத்திற்கு வழங்க வேண்டிய 52.8 டி.எம்.சி., தண்ணீரை கர்நாடகம் திறந்து விட உத்தரவிடக்கோரி, சுப்ரீம் கோர்ட்டில் தமிழக அரசு மனுத்தாக்கல் செய்திருந்தது. இந்த மனு இன்று நீதிபதிகள் டி.கே. ஜெயின் மற்றும் மதன் லோகூர் அடங்கிய பெஞ்ச் முன்பாக விசாரணைக்கு வந்தது.

இவ்வழக்கை விசாரித்த நீதிபதிகள், "காவிரி நதிநீர் பிரச்னையில் இரு மாநில முதல்வர்களும் ஏன் அமர்ந்து பேச முயற்சி செய்யக்கூடாது. இது முடியாத விஷயம் அல்ல. இரு மாநில விவசாயிகளின் நலன்களை பெரிதும் மனதில் கொண்டு மனமொத்த வகையில் பேச்சு வார்த்தை நடத்துவதை நாங்கள் விரும்புகிறோம். பிரதமர் தலைமையிலான காவிரி நதிநீர் ஆணையத்தை தற்போது உடனடியாக கூட்ட இயலாது. இந்த சூழலில் ஏன் இரு மாநில முதல்வர்கள் அமர்ந்து பேசக்கூடாது. விட்டுக்கொடுக்கும் முறையில் இதை செயல்படுத்தலாமே. இரு மாநில முதல்வர்களும் வெறும் காபிக்காக மட்டும் பேசாமல், இரு மாநில அதிகாரிகளுடன் அமர்ந்து இதற்கு ஒரு முடிவு காண வேண்டும்" என்று தெரிவித்தனர்.

நீதிபதிகளின் அறிவுறுத்தலையடுத்து பேசிய கர்நாடகத்தின் சார்பில் ஆஜரான வக்கில் நாரிமன், இரு மாநில முதல்வர்கள் கூட்டத்திற்கு தங்களுக்கு எவ்வித பிரச்னையும் இல்லை என்று தெரிவித்தார். ஆனால் தமிழகத்தின் சார்பில் எந்த உறுதிமொழியும் அளிக்கப்படவில்லை. பின்னர் வழக்கு விசாரணை வரும் 30ம் தேதிக்கு ஒத்தி வைக்கப்பட்டது.

சம்பா சாகுபடிக்கு மேட்டூர் அணையில் இன்னும் 10 நாட்களுக்கு மட்டுமே தண்ணீர் உள்ள நிலையில், சுப்ரீம் கோர்ட்டின் முடிவை பெரிதும் எதிர்பார்த்த டெல்டா விவசாயிகள் நீதிபதிகளின் அறிவுரையால் அதிர்ச்சியடைந்துள்ளனர். ஏற்கனவே இவ்விவகாரத்தில் பல முறை தமிழக மற்றும் கர்நாடக முதல்வர்கள் பேசி எந்த பயனும் இல்லாத நிலையில், மீண்டும் முதலில் இருந்து துவங்குவது போல் நீதிபதிகளின் அறிவுரை இருப்பதால் இவ்விஷயத்தில் தமிழக அரசின் முடிவை விவசாயிகள் எதிர்பார்த்து காத்திருக்கின்றனர்.

தினமலர்

பேச்சு வார்த்தை , அதுவும் கர்நாடகாவிடம் , அல்வாதான் .