மாற்றம்

by **சிவா** Mon Oct 29, 2012 5:27 pm

வசந்த் பள்ளி முடிந்து வந்ததும், நேராக தனது அறைக்குச் செல்வான். யூனிபார்மை மாற்றிவிட்டு லேப்டாப்பில் அமர்ந்து கொள்வான். கிரிக்கெட், ஸ்பைடர் மேன், சூட்டிங் கேம் என எல்லாவிதமான விளையாட்டு களையும் விளையாடுவான். அம்மா அழைத்தால்கூட வெளியே வர மாட்டான்.

இரண்டு மாதங்களுக்கு முன்புதான், அவனது மாமா லேப்டாப் வாங்கிக் கொடுத்திருந்தார். 8-ம் வகுப்பில் முதல் மதிப்பெண் பெற்றதற்காக கிடைத்த பரிசு அது. ஆனால் அந்த லேப்டாப்பே அவனது படிப்பைக் கெடுக்கும் என்று யாரும் நினைக்கவில்லை.

எப்போதும் கேம் விளையாடுவதிலேயே வசந்த் பொழுதுபோக்கினான். பள்ளிப் புத்தகங்கள் படிக்கும் நேரம் குறைந்து போனது. செய்தித்தாள் வாசிக்கும் பழக்கத் தையும், பொது அறிவு புத்தகங்கள் படிக்கும் வழக்கத்தையும் அறவே நிறுத்திவிட்டான்.

ஒருநாள் வசந்தின் தாய் சாந்தியும், அவளது தோழி சுதாவும் பேசிக் கொண்டி ருந்தார்கள். அப்போது வசந்த், பள்ளி முடிந்து வீட்டுக்கு வந்தான். அவனது முகம் வாடியிருந்தது.

`ஏன் வசந்த் டல்லா இருக்கே' சுதா கேட்டாள்.

`ஒன்றுமில்லை ஆன்டி' என்றான் வசந்த்.

`பள்ளியில் ஏதும் பிரச்சினையா?' என்றாள் அவனது தாய் சாந்தி.

`இல்லைமா, இன்று வினாடி வினா போட்டி நடத்தினார்கள். நான் தோற்றுவிட்டேன்' என்றான் வசந்த்.

`வருஷா வருஷம், நீ தானேடா முதல் பரிசு வாங்குவாய், இந்த முறை எப்படி தோற்றாய்?' என்றாள் சுதா.

`ஆன்டி, கேள்விகள் ரொம்ப கஷ்டமாக இருந்தது' என்று சமாளித்தான் வசந்த்.

மகனது பேச்சைக் கேட்டு வருத்தமடைந்த சாந்தி, `பொய் சொல்லாதே வசந்த், நீ வரவர நன்றாகப் படிப்பதில்லை' என்று கண்டித்தாள். அப்படியே சுதாவிடம், `இவனுக்கு லேப்டாப் வாங்கிக் கொடுத்ததில் இருந்து அதில் விளையாடியே பொழுது போக்குகிறான். செய்தித்தாள், பொது அறிவுப் புத்தகங்கள் படிப்பதில்லை. அதன் எதிரொலிதான் வினாடிவினா போட்டியில் தோற்றிருக்கிறான்' என்றாள்.

`வசந்த், அம்மா சொல்வதெல்லாம் உண்மையா? மாமா இதற்காகவா உனக்கு லேப்டாப் பரிசாக வாங்கித் தந்தார்? நீ மோசமாகப் படிப்பது மாமாவுக்கு தெரிந்தால் லேப்டாப்பை விற்றுவிடுவார்' என்று சுதா கண்டித்தாள்.

`ஆன்டி என்னை மன்னித்துவிடுங்கள். அம்மா, நான் என் தவறை உணர்ந்துவிட்டேன். இனிமேல் கேம் ஆடி வீணாக பொழுது போக்க மாட்டேன். முன்பைப் போலவே படிப்பில் அதிக ஆர்வம் காட்டுவேன்' என்று உறுதி அளித்தான் வசந்த்.

`வெரிகுட் வசந்த். காலையில் எழுந்ததும் யோகா செய். புத்துணர்வுடன் நன்றாகப் படிக்கலாம்' என்று டிப்ஸ் கொடுத்துவிட்டு சுதா புறப்பட்டாள்.

`சரி ஆன்டி' என்றவன், சுதாவிற்கு டாட்டா காட்டினான்.

தோல்வி, மகனின் மனதில் மாற்றத்தை ஏற்படுத்தி இருப்பதைக் கண்டு மகிழ்ச்சி அடைந்தாள் சாந்தி.

ச.சத்யவீணா