மழையினால் தண்டவாளத்தில் உருண்ட பாறை மீது சென்னை ரெயில் மோதி தடம் புரண்டது

by **சிவா** Tue Oct 23, 2012 12:20 pm

மழை காரணமாக தண்டவாளத்தில் உருண்டு விழுந்த பாறை மீது சென்னை எக்ஸ்பிரஸ் ரெயில் மோதி தடம் புரண்டது. இந்த விபத்தில் பயணிகள் அதிர்ஷ்டவசமாக உயிர் தப்பினர்.

சென்னை ரெயில் தடம் புரண்டது

மைசூரில் இருந்து காட்பாடி வழியாக சென்னை செல்லும் `காவேரி எக்ஸ்பிரஸ்' ரெயில், 23 பெட்டிகளில் ஆயிரக்கணக்கான பயணிகளை ஏற்றிக் கொண்டு, நேற்று முன்தினம் இரவு 8.30 மணியளவில் மைசூரில் இருந்து புறப்பட்டது. அந்த ரெயில் ஆந்திர மாநிலம் மல்லானூர் ரெயில் நிலையத்தை கடந்து நேற்று அதிகாலை 3 மணியளவில் ஜோலார்பேட்டை நோக்கி சென்று கொண்டிருந்தது. அப்போது, கணவாய்புதூர் என்ற இடத்தில் தண்டவாளத்தின் மீது ஒரு பாறாங்கல் கிடந்தது.

தண்டவாளத்தில் பெரிய பாறாங்கல் கிடப்பதை கண்டு அதிர்ச்சியடைந்த டிரைவர், உடனடியாக ரெயிலின் வேகத்தை குறைத்து, பிரேக் போட்டு ரெயிலை நிறுத்த முயன்றார். இருப்பினும் அந்த ரெயில் பாறாங்கல் மீது `டமார்' என்ற சத்தத்துடன் மோதியது. இதனால் ரெயில் தடம் புரண்டது. பின்னர் தண்டவாளம் அருகில் இருந்த கம்பங்களில் மோதி ரெயில் நின்றது.

பயணிகள் அதிர்ச்சி

இதனால் ரெயில் என்ஜின், பார்சல் பெட்டி, 2 பயணிகள் பெட்டி, ஒரு ஏ.சி. பயணிகள் பெட்டி ஆகியவை தண்டவாளத்தில் இருந்து இறங்கி, தரையில் நின்றன.

திடீரென்று பயங்கர சத்தத்துடன் நடுக்காட்டில் ரெயில் குலுங்கியதால் தூக்கத்தில் இருந்த பயணிகள், அலறியடித்து விழித்தனர். என்ன நடந்தது என்று அவர்களுக்கு முதலில் தெரிய வில்லை. பின்னர்தான் ரெயில் தடம் புரண்ட தகவல் தெரிய வந்தது. இதனால் அவர்கள் அதிர்ச்சி அடைந்தனர்.

அதிர்ஷ்டவசமாக உயிர் தப்பினர்

ஆனால், டிரைவரின் சாமர்த்தியத்தால், ரெயில் என்ஜினும், எந்த பெட்டியும் கவிழ வில்லை. இதனால் உயிர் சேதம் எதுவும் ஏற்படாமல், பயணிகள் அனைவரும் அதிர்ஷ்டவசமாக தப்பினர்.

ஒரே ஒரு பயணிக்கு மட்டும் லேசான காயம் ஏற்பட்டது. அவர் உடனடியாக குப்பம் அரசு ஆஸ்பத்திரிக்கு சிகிச்சைக்காக அனுப்பி வைக்கப்பட்டார்.

மீட்பு பணி

இந்த விபத்து குறித்து தகவல் அறிந்ததும், ஜோலார்பேட்டை, குப்பம், பங்காருபேட்டை ஆகிய இடங்களில் இருந்து மீட்பு குழுவினர் வந்து மீட்பு பணிகளில் ஈடுபட்டனர். ரெயில்வே பாதுகாப்பு படையினர் பயணிகளுக்கு பாதுகாப்பு அளித்தனர்.

பெங்களூர் ரெயில்வே கோட்ட மேலாளர் ஏ.கே.அகர்வால், முதன்மை பாதுகாப்பு அலுவலர் அன்வர்உசேன் ஆகியோர் சம்பவ இடத்தை பார்வையிட்டனர். அப்போது ஏ.கே.அகர்வால் நிருபர்களிடம் கூறியதாவது:-

நிலச்சரிவு

மழையின் காரணமாக நிலச்சரிவு ஏற்பட்டதால் பாறை ஒன்று தண்டவாளத்தில் விழுந்து கிடந்தது. இதன் காரணமாக இந்த விபத்து ஏற்பட்டுள்ளது. எனினும், டிரைவரின் சாமர்த்தியத்தால் உயிர்ச் சேதம் எதுவும் ஏற்படாமல் பெரும் விபத்து தவிர்க்கப்பட்டது.

இவ்வாறு அவர் கூறினார்.

ரெயில்கள் தாமதம்

இந்த விபத்து காரணமாக லால்பாக் எக்ஸ்பிரஸ், பெங்களூர் எக்ஸ்பிரஸ் ஆகிய ரெயில்கள் காலதாமாக சென்றன.

விபத்தினால் சேதம் அடைந்த சென்னை ரெயிலின் என்ஜின் துண்டிக்கப்பட்டு, மாற்று என்ஜின் பொருத்தி, மல்லானூர் ரெயில் நிலையத்திற்கு எடுத்துச் செல்லப்பட்டது.

ரெயில் பாதையில் மீட்பு பணிகள் துரிதமாக நடந்து கொண்டிருக்கிறது. அதுவரை ரெயில்கள் மாற்றுப் பாதையில் செல்வதற்கு ஏற்பாடு செய்யப்பட்டுள்ளது.

இந்த சம்பவம் பயணிகள் மத்தியில் பெரும் பரபரப்பை ஏற்படுத்தியது.

தினத்தந்தி