ஆவிகள் இருக்குதடி பாப்பா - பாக்கியம் ராமசாமி

'ஆவிகள் இருக்கிறதா இல்லையா? அதைப் பார்க்க முடியுமா' என்பது நீண்ட நாட்களாக மக்களிடையே ஒரு தீர்வு காண முடியாத பிரசினையாக இருந்து வருகிறது.

நான் அதற்கு ஓரளவு தீர்வு கண்டுவிட்டேன் என்றே தோன்றுகிறது. பல வித ஆராய்ச்சிக்குப் பிறகு நான் வந்த முடிவு:

ஆவிகள் இருக்கின்றன.

ஆப்பிள் பழம் கீழே விழுந்ததும் புவி ஈர்ப்பு சக்தியை விஞ்ஞானி நியூட்டன் கண்டான்(ர்) அல்லவா! அதற்கு முன்னும் ஆப்பிள்கள் விழுந்து கொண்டுதான் இருந்தன.

ஆனால் நியூட்டனுக்கு மட்டும் ஏன் அந்த ஐடியா 'கிளிக்' ஆயிற்று?

அதே கேஸ்தான் என் கேஸும். நீங்கள் குளியல் அறையில் சுடச்சுட வென்னீரில் குளிக்கும்போது ஆவி வருவதைப் பார்த்திருப்பீர்கள்.

குளிக்கப் போகுமுன் பாத்ரூம் நிலைக் கண்ணாடி பளீரென்று இருக்கும். நீங்கள் வென்னீரில் குளித்ததுமே உங்கள் திவ்ய ஸ்வரூபத்தை பார்க்க விரும்பினால் நிலைக் கண்ணாடியில் மங்கலாக ஒரு திரை படர்ந்திருக்கும்.

உங்கள் முக மண்டலம் தெளிவாகத் தெரியாமல் மசமசவென்று தெரியும். நீங்கள் ஒரு துணியில் கண்ணாடியை உங்கள் முகம் மட்டும் தெரிகிற அளவு துடைத்தீர்களானால் அந்தக் குறிப்பிட்ட பிரதேசத்தில் உங்கள் முகம் பளிச்சென்று தெரியும்.

இதிலிருந்து என்ன தெரிகிறது. ஆவியானது குளிக்கும் அறை பூரா பரவிப் படிந்திருந்தாலும் கண்ணாடி மீது படிகிறபோது நமக்கு அது தெரிகிறது. அதைத் தொட முடிகிறது. அழிக்க முடிகிறது.

ஸயன்டி·பிக்காக இப்போது பாருங்கள்.

ஆவி எப்படி ஏற்படுகிறது! ஒரு பொருள் சூடாகும்போது ஆவி கிளம்புகிறது. தண்ணீர் ஒரு பொருள். அது சூடாயிற்று. அதிலிருந்து ஆவி வெளிப்பட்டது.

தண்ணீருக்குப் பதில் நமது உடம்பை எடுத்துக்கொள்ளுங்கள். அதாவது சூடாக்குங்கள். உங்கள் ஒருத்தரால் தூக்க முடியாவிட்டால் நாலு பேரைக் கொண்டு தூக்குங்கள். (அதாவது உயிர் போன பின்தான்) பிறகு சுடுகாட்டில் வைத்து எரிக்கிறீர்கள்.

நம் உடம்பு எரியும்போது சூடாகிறது.

ஸயன்ஸ் விதிப்படி சூடு ஆகும் எந்த வஸ்துகளிலிருந்தும் ஆவி-கண்ணுக்குத் தெரிந்தோ தெரியாமலோ ஆவி புறப்படுகிறது.

நம் உடம்பும் ஒரு வஸ்துதான். ஆகவே அதை சூடாக்கும்போது அதிலிருந்து ஆவி வெளியே வந்தே தீரும். ஆனால் அந்த ஆவியை நாம் பார்க்க முடியவில்லை. ஏன்?

சாதாரண எரிக்கும் முறையில் வரட்டி, விறகு, அது இது சேர்ந்து எரிவதால் அந்தப் புகையுடனே நம் ஆவி (நம்மது என்றால் நம்மதா? இறந்தவரின் ஆவி) கலந்துவிடுவதால் தெரிவதில்லை.

புகைக் கலப்படம் இல்லாமல் எரிக்கும் எலக்ட்ரிகல் சுடுகாட்டில் எரித்தாலும் அந்த ஆவி புகைக் கூண்டு வழியே வெளியேறி விடுகிறது. (தப்பி விடுகிறது.)

இப்படியாக மனித ஆவிகள் நிறையவே வீணாகின்றன.

கோபர் காஸ் என்று பிராணிகளின் சாணியிலிருந்து காஸ் தயாரிக்கிறார்கள் - சர்வ சாதாரண உபகரணங்கள், குறைந்த செலவுதான். கிராமத்தில்கூடத் தயாரித்து விளக்கு எரிக்கிறார்கள்.

மனிதன் பிராணியைவிட மிக உயர்ந்தவன். அறிவு மிகுந்தவன். ஆகவே அவனது உடலிலிருந்து வெளிப்படும் ஆவி நிச்சயம் அறிவுடன் கூடியதாகவே இருக்கும்.

அந்த ஆவியை அன்றாடப் பயன்பாட்டுக்கு எப்படி உபயோகப்படுத்துவது? அதைப் பற்றி சிந்தித்தேன்.

சாராயம் காய்ச்சுகிறவர்கள் வாலை வடிப்பு முறையில் காய்ச்சுகிறார்கள்.

ஆவி வெளிப்பட்டு எல்லாப் பக்கமும் போய்விடாமல் அதை ஒரு மெல்லிய குழாய் வழியாக வெளியேறுமாறு செய்துவிட்டால் போதும்.

சமையல் காஸ் சிலிண்டரில் வாயு நிரப்புவதுபோல சிலிண்டர் சிலிண்டராக அவரவர் வீட்டு ஆவியைப் பிடித்து வைத்துக் கொள்ளலாம்.

மழைநீர் சேகரிப்பு மாதிரி, சில சமயம் நிறைய ஆவிகள் கிடைத்தால் அதையும் தக்க முறைப்படி பொது மக்களின் நன்மைகளுக்கு ரேஷன் செய்து தரலாம்.

ஆவி நம்மை அறைந்து விடும், கொன்றுவிடும் என்றெல்லாம் நம்புகிறார்கள் சிலர். ஆகவே ஓரளவு ஜாக்கிரதையுடனே ஆவியை உபயோகப்படுத்தவேண்டும்.

சமையல் சிலிண்டர் காஸைக்கூட ஜாக்கிரதையாகத்தானே பயன்படுத்துகிறோம்.

அதே மாதிரிதான் - மனித ஆவி சிலிண்டரையும் பயன்படுத்தவேண்டும்.

இஷ்டத்துக்குத் திறந்து போட்டுவிட்டுப் போகக் கூடாது.

சமையல் காஸுக்குச் சற்றும் இளைத்தது அல்ல மனித ஆவி சிலிண்டர்.

அதுவும் நம்ம சொந்த வீட்டு ஆவியென்றால் இன்னும் விசேஷம்.

நம்ம வீட்டு விவகாரங்களெல்லாம் தெரிந்த ஆவியாதலால் நமக்கு சேதாரம் ஏற்படுத்தாது - அன்பு கூர்ந்த உதவிகளைச் செய்யும்.

நம்கிட்டே ஒருத்தன் கறார் கண்டிப்பாக கடன் வசூலிக்க வந்து கத்துகிறான் என்றால், நாம் வேறு ஒண்ணும் செய்ய வேண்டாம். சமையலறைக்குச் சென்று தாத்தா ஆவியுள்ள காஸ் ஸிலிண்டரைத் துளி திறந்து மூடவேண்டும்.

அவ்வளவுதான். தாத்தா காஸ் அங்கிருந்து வேகமாகப் புறப்பட்டு கடன் வசூலிக்க வந்தவன் முகத்தில் ஓர் அறை கொடுப்பதுபோல் ஒரு தாக்கு. ஆள் ஓடியே விடுவான்.

வாக்கும் க்ளீனருக்கு இணைத்துள்ளதுபோல் செளகரியப்படி டியூப் கனெக்ஷன் தந்து கொள்ளலாம்.

சில பேருக்கு ஒரு கேள்வி எழும். சிலிண்டரில் காஸ் தீர்வதுபோல தாத்தா ஆவியும் ஒரு மாசத்தில் தீர்ந்துடுமா?

மனிதனுக்கு நூறு வருட ஆயுசுபோல மனித ஆவிக்கும் நூறு வருஷம் வரை அதற்கு சக்தி இருக்கும். கவலைப்பட வேண்டியதில்லை.

ஆவிகள் ஆராய்ச்சிக்கு இந்த வருடத்தின் வேதியியல் நோபல் பரிசு சிவாவுக்கும் பாக்கியம் ராமசாமிக்கும் ஆவிகளின் சார்பில் பகிர்ந்தளிக்கப் படுகிறது.