மீண்டும் வந்திடு மிதிவண்டி

by **நாகசுந்தரம்** Wed Jul 25, 2012 3:01 pm

மறையுது மறையுது மிதிவண்டி
மீண்டும் வந்திடு மிதிவண்டி

போகுதுபார் மிதிவண்டி பாட்டையிலே
ஆகுதுபார் பெரும்பயன் நாட்டினிலே

எரிபொருள் விலையது ஏறிடுதே
வரியேதும் இல்லாமல் வந்திடுமே

குறையுது குறையுது கொழுப்பு கலோரி
உறைக்குது உண்மை நம்முன்னாடி

இதயத்தின் நோய்கள் சீராகும்
உதயத்தில் ஓட்டினால் பேறாகும்

குருதியின் ஓட்டத்தில் கொண்டாட்டம்
தீர்ந்திடும் மக்களின் திண்டாட்டம்

மனதின் அழுத்தங்கள் மீண்டுவிடும்
கனமில்லை காலினால் சென்றுவிடும்

மூட்டுவலியெல்லா மகற்றி விடும்
இடுப்பினை அழகாய் ஆக்கி விடும்

யாருமே இதனை இயக்கிடலாம்
பாருக்குள் பயனிதை அறிந்திடலாம்

அரைமணி ஓட்டினால் அதுபோதும்
விரைவாக நோயினை அதுபோக்கும்

மீண்டும் வந்திடு மிதிவண்டி
யாண்டும் எங்களின் நலம்வேண்டி

(மிதிவண்டி பயற்சியும் அதன் ஆரோக்கியமும் பற்றி எழுதி விழிப்புணர்வை ஏற்படுத்திய திரு செந்தில்குமார். தி, இயன்முறை மருத்துவர் அவர்களுக்கு நன்றி.

http://ammavirku.blogspot.in/2012/03/blog-post.html)