இரண்டாவது ஒருநாள் போட்டியிலும் இந்திய கிரிக்கெட் அணி வெற்றி பெற்றது.

கொழும்பு : இலங்கைக்கு எதிரான இரண்டாவது ஒருநாள் போட்டியில் இந்திய கிரிக்கெட் அணி 15 ரன்கள் வித்தியாசத்தில் வெற்றி பெற்றது.

கொழும்பில் நடந்து முடிந்த இந்தப் போட்டியில், 257 ரன்கள் எடுத்தால் வெற்றி என்ற இலக்குடன் களமிறங்கிய இலங்கை அணி, 49.2 ஓவர்களில் அனைத்து விக்கெட்டுகளையும் இழந்து 241 ரன்களை எடுத்து தோல்வியைத் தழுவியது.

ஆட்டத்தில் கடைசி 6 பந்துகளில் 20 ரன்கள் எடுக்க வேண்டிய நிலை, இலங்கை அணிக்கு இருந்தது. அப்போது கடைசி விக்கெட் மட்டுமே கையில் இருந்தது.

அந்த நிலையில், 2-வது பந்தை கண்டம்பி அடித்து ஆடிய பிறகு, மெண்டிஸ் ரன் அவுட் ஆனார்.

இலங்கை அணியில் கண்டம்பி ஆட்டமிழக்காமல் அதிகபட்சமாக 93 ரன்கள் எடுத்து, தோல்வியைத் தவிர்க்க போராடினார். ஜெயவர்த்தனே 52 ரன்களையும், கபுகேத்ரா 31 ரன்களையும் எடுத்தனர். ஜெயசூர்யா 17 ரன்கள் எடுத்திருந்தார். ஏனையோர் ஒற்றை இலக்க எண்ணிக்கையிலான ரன்களையே எடுத்தனர்.

இந்தியா தரப்பில் இஷாந்த் ஷர்மா 4 விக்கெட்டுகளையும், ஜாகீர் கான், பிரவிண் குமார் மற்றும் ஓஜா ஆகியோர் தலா ஒரு விக்கெட்டையும் வீழ்த்தினர்.

முன்னதாக, இந்தியா தனது இன்னிங்ஸ்சில் 50 ஓவர்களில் 9 விக்கெட்டுகள் இழப்புக்கு 256 ரன்கள் எடுத்தது.

யுவராஜ் சிங் அதிகபட்சமாக 66 ரன்கள் எடுத்தார். சேவாக் 42 ரன்களையும், கம்பீர் 27 ரன்களையும் சேர்த்தனர்; ராய்னா 23 ரன்களையும், யூசுப் பதான் 21 ரன்களையும் எடுத்தனர். ஜாகீர் கான் 17 ரன்களையும், பிரவிண் குமார் 15 ரன்களையும் எடுத்தனர். சச்சின் 6 ரன்களே எடுத்தார்.

இலங்கை தரப்பில் குலசேகர, மஹரூப் மற்றும் மெண்டிஸ் ஆகியோர் தலா 2 விக்கெட்டுகளையும், தில்ஷன் ஒரு விக்கெட்டையும் கைப்பற்றினர்.

இந்தப் போட்டியில் சிறப்பாக பந்துவீசி 4 விக்கெட்டுகளை வீழ்த்திய இந்தியாவின் இஷாந்த் ஷர்மாவுக்கு ஆட்டநாயகன் விருது வழங்கப்பட்டது.

இந்த வெற்றியின் மூலம் மொத்தம் 5 போட்டிகள் கொண்ட தொடரில், இந்தியா 2-0 என்ற கணக்கில் முன்னிலையில் உள்ளது.