பிரபல காமெடி நடிகர் நாகேஷ் காலமானார்

by **சிவா** Sat Jan 31, 2009 4:16 pm

சென்னை : நடிகர் நாகேஷ் இன்று காலமானார். நெஞ்சு வலி காரணமாக பாலாஜி மருத்துவமனையில் அனுமதிக்கப்பட்டிருந்த அவர் இன்று காலமானார். தனது நகைச்சுவை நடிப்பால் தமிழ் திரையுலகை கலக்கிய நாகேஷ் 1933ம் ஆண்டு செப்., 27ம் தேதி பிறந்தார். இவரது இயற்பெயர் குண்டுராவ். பெற்றோருடன் ஏற்பட்ட மனக்கசப்பின் காரணமாக இளம்வயதிலேயே வீட்டை விட்டு வெளியேறினார். ரயில்வேயில் வேலைக்கு சேர்ந்தார். சென்னை மேற்கு மாம்பலம் பகுதியில் கவிஞர் வாலி, நடிகர் ஸ்ரீகாந்த் ஆகியோருடன் சில காலம் ஒரே அறையில் நாகேஷ் தங்கியிருந்தார்.

ஒருமுறை சக ஊழியர்களால் நடத்தப்பட்ட "கம்ப ராமாயணம்' நாடகத்தை பார்த்த நாகேஷ், தன்னாலும் சிறப்பாக நடிக்க முடியும் என நினைத்தார். தன்னையும் நாடகங்களில் சேர்த்துக்கொள்ளும்படி நாடகம் நடத்துபவர்களிடம் போராடி முதல் வாய்ப்பை பெற்றார். வயிற்றுவலியால் அவதிப்படும் நோயாளியின் பாத்திரம் முதலில் அவருக்கு வழங்கப்பட்டது.

அந்த நாடகத்தை பார்க்க வந்த எம்.ஜி.ஆர்., நாகேஷின் நடிப்பை வெகுவாக புகழ்ந்தார். இதனை தொடர்ந்து பல்வேறு மேடை நாடகங்களில் தோன்றினார். தயாரிப்பாளர் பாலாஜி மூலமாக இவருக்கு சினிமா வாய்ப்பும் கிடைத்தது. ஏறத்தாழ ஆயிரத்துக்கும் மேற்பட்ட படங்களில் நடித்தார். குறிப்பாக "திருவிளையாடல்' படத்தில் ஏழ்மையில் வாடும் புலவர் தருமியாக நாகேஷ் நடித்தது வெகுவாக பாராட்டப்பட்டது. அதே போல "காதலிக்க நேரமில்லை' படத்தில் பாலையாவிடம் நாகேஷ் கதை சொல்லும் காட்சியும் ரசிகர்களால் என்றும் மறக்க முடியாதது. நாகேஷின் திறமையை நன்கு பயன்படுத்திக்கொண்ட பெருமை இயக்குனர்கள் ஸ்ரீதர் மற்றும் பாலச்சந்தர் ஆகியோரையே சேரும்.

நடிகர் கமலும் தனது படங்களில் நாகேஷை தொடர்ந்து நடிக்க வைத்தார். "அபூர்வ சகோதரர்கள்', "மைக்கேல் மதன காமராஜன்', "மகளிர் மட்டும்' ஆகிய படங்களில் தொடங்கி சமீபத்தில் வெளியான "தசாவதாரம்' வரை கமலின் பெரும்பாலான படங்களில் இவர் இடம்பெற்றார்.

நகைச்சுவை நடிகராக மட்டுமின்றி கதாநாயகனாகவும், வில்லனாகவும், குணச்சித்திர வேடங்களிலும் கூட நாகேஷ் நடித்துள்ளார். இவரது மகன் ஆனந்த் பாபுவும் பல படங்களில் கதாநாயகனாக நடித்துள்ளார்.

கமலஹாசன், மனோரமா, கவிஞர் வாலி ஆகியோர் உட்பட திரையுலகினர் திரண்டு வந்து அவருக்கு அஞ்சலி செலுத்தி வருகின்றனர். தமிழக முதல்வர் கருணாநிதி நாகேஷின் மரணம் கலையுலகிற்கு பெரும் இழப்பு என அவரது இரங்கல் செய்தியில் கூறியுள்ளார். நாகேஷின் உடல் நாளை தகனம் செய்யப்பட உள்ளது.