பலத்த போலீஸ் பாதுகாப்புடன் உத்தப்புரம் முத்தாலம்மன் கோவில் கும்பாபிஷேகம் பிற சமுதாய மக்களும் வழிபாடு நடத்தினர்

by **ராஜா** Sat Jun 30, 2012 11:10 am

உத்தப்புரம் கிராமத்தில் உள்ள முத்தாலம்மன் கோவிலில் பலத்த போலீஸ் பாதுகாப்புடன் நேற்று கும்பாபிஷேகம் நடந்தது. ஆதிதிராவிடர் உள்ளிட்ட பிற சமுதாய மக்களும் வழிபாடு நடத்தினர்.

முத்தாலம்மன் கோவில்

மதுரை மாவட்டம் எழுமலை அருகே உள்ளது, உத்தபுரம். இந்த ஊரில் பிள்ளைமார் சமுதாயத்திற்கு பாத்தியப்பட்ட முத்தாலம்மன்-மாரியம்மன் கோவில் உள்ளது. கடந்த 2 ஆண்டுகளுக்கு முன்பு இந்த கோவில் புனரமைக்கும் பணி முடிந்து கும்பாபிஷேகம் நடத்த திட்டமிடப்பட்டது.

ஆனால் ஆலய வழிபாடு, அரசமர வழிபாடு, நிழற்குடை அமைத்தல் உள்ளிட்ட பல்வேறு பிரச்சினைகளால் அந்த கிராமத்தில் உள்ள பிள்ளைமார் மற்றும் ஆதிதிராவிடர் சமூகத்தினரிடையே பிரச்சினை இருந்து வந்தது.

இதனால், சட்டம் ஒழுங்கு பிரச்சினை ஏற்படலாம் என்று கருதி மாவட்ட நிர்வாகமும், போலீசாரும் கும்பாபிஷேகம் நடத்த அனுமதி தர மறுத்தனர்.

சமரச முயற்சி

இந்த நிலையில் கடந்த 6 மாதத்திற்கு முன்பு அப்போதைய சூப்பிரண்டு அஸ்ராகார்க், கூடுதல் சூப்பிரண்டு மயில்வாகனன் மற்றும் சமரச குழுவினர் சந்தித்து இந்த பிரச்சினைக்கு சுமுக தீர்வு காண ஏற்பாடு செய்தனர். முதல் கட்டமாக ஆதிதிராவிட மக்களை கோவிலுக்குள் வழிபாடு நடத்த அனுமதிக்க முடிவு செய்யப்பட்டது. அதன்படி அவர்களும் வந்து வழிபாடு நடத்தினர்.

இதையடுத்து கும்பாபிஷேகம் நடத்த அனுமதி வழங்க வேண்டும் என்று பிள்ளைமார் சமுதாய மக்கள் கோரிக்கை வைத்தனர். அதை ஏற்று மாவட்ட நிர்வாகம் மற்றும் போலீசார் கும்பாபிஷேகம் நடத்த அனுமதி வழங்கினர்.

கும்பாபிஷேகத்திற்கான யாகசாலை பூஜைகள் கடந்த 27-ந் தேதி தொடங்கின. முக்கிய நிகழ்ச்சியாக கும்பாபிஷேகம் நேற்று நடந்தது. இதையொட்டி நேற்று காலை 9 மணிக்கு புனித நீர் குடங்களை கோவிலை சுற்றி ஊர்வலமாக எடுத்து வரப்பட்டன. 9.15 மணிக்கு கலசங்களில் புனிதநீர் ஊற்றப்பட்டு கும்பாபிஷேகம் நடந்தது.

வழிபாடு

அப்போது ஆதிதிராவிடர் சமுதாய மக்களை போலீசார் பாதுகாப்புடன் அழைத்து வந்தனர். அவர்களுக்கும் புனித நீர் தெளிக்கப்பட்டது. அதன் பின்னர் அவர்கள் வீடுகளுக்கு சென்றனர். காலை 10.50-க்கு மீண்டும் மாலை, பழத்தட்டுகளுடன் அவர்கள் அழைத்து வரப்பட்டனர்.

கோவிலுக்கு வெளியே வைத்து பூஜை நடைபெற்றது. அப்போது அவர்கள் கொண்டு வந்த மாலையை அம்மனுக்கு அணிவிக்க வேண்டும் என்றனர். அதற்கு சிலர் எதிர்ப்பு தெரிவித்தனர். இதனால் சிறு சலசலப்பு ஏற்பட்டது.

பின்னர், அம்மனுக்கு மாலை சார்த்தப்பட்டு பூஜை நடந்தது.

விழாவில் புதியநீதிக்கட்சியின் தலைவர் ஏ.சி.சண்முகம், உசிலம்பட்டி எம்.எல்.ஏ. பி.வி.கதிரவன், ஆர்.டி.ஓ.சாந்தி, பாரதீய ஜனதா கட்சியில் மாநில பார்வையாளர் பொன்.கருணாநிதி, சின்மயா சோமசுந்தரம், பேரைïர் தாசில்தார் கல்யாணசுந்தரம் உள்ளிட்ட பல்வேறு பிரமுகர்கள் கலந்து கொண்டனர்.

Courtesy:Thinathanthi