பார்லிமென்டிற்கு வராமல் "ஆப்சென்ட்'டாகும் எம்.பி.,க்கள்: சோனியா கண்டிப்பு

புதுடில்லி:"எம்.பி.,க்கள் தங்களின் கார்களில் சுழலும் சிவப்பு விளக்கு பொருத்திக் கொள்ள அனுமதிக்க வேண்டும் என்ற கோரிக்கையால், டில்லியில் குழப்பம் தான் அதிகரிக்கும்' என, காங்கிரஸ் தலைவர் சோனியா கூறியுள்ளார்


லோக்சபாவில், மோட்டார் வாகனச் சட்ட திருத்த மசோதாவை, போக்குவரத்து துறை அமைச்சர் ஜோஷி கடந்த வாரம் தாக்கல் செய்தார். அப்போது நடந்த விவாதத்தில் பங்கேற்ற எம்.பி.,க்கள் பலர், "மாவட்ட கூடுதல் நீதிபதிகள் தங்களது வாகனங்களின் மேற்பகுதியில், சிவப்பு நிற விளக்கை பொருத்திக் கொள்ள அனுமதிக்கப்படுகிறது. ஆனால், லட்சக்கணக்கான மக்களால் தேர்ந்தெடுக்கப்படும் எம்.பி.,க்களுக்கு சிவப்பு நிற விளக்குகள் பொருத்திக் கொள்ள அனுமதி வழங்கப்படவில்லை. அவ்வாறு அனுமதி வழங்கப்படும் பட்சத்தில், பார்லிமென்டிற்கு விரைவாக வர முடியும். இதனால், நேரமும் விரயமாவது தவிர்க்கப்படும்' என்றனர். தங்களின் இந்தக் கோரிக்கை தொடர்பாக, பிரதமர் மன்மோகன் சிங்கை சந்தித்துப் பேசப் போவதாகவும் கூறினர்.

எதிர்ப்பு :இந்நிலையில், டில்லியில் நேற்று காங்கிரஸ் பார்லிமென்ட் கட்சி நிர்வாகிகள் கூட்டம், கட்சித் தலைவர் சோனியா தலைமையில் நடந்தது. இக்கூட்டத்தில் பேசிய காங்கிரஸ் எம்.பி., சாக்கோ, ""எம்.பி.,க்கள் கார்களில் சிவப்பு விளக்குகள் பொருத்திக் கொள்ள அனுமதிக்க வேண்டும் என்ற கோரிக்கை தொடர்பாக, காங்கிரஸ் தலைவர் சோனியா தன் கருத்தை தெரிவிக்க வேண்டும்,'' என்றார்.

இதற்குப் பதிலளித்த சோனியா கூறியதாவது:எம்.பி.,க்களின் கார்களில் சுழலும் சிவப்பு விளக்குகள் பொருத்திக் கொள்ள அனுமதித்தால், டில்லியில் மேலும் குழப்பம் அதிகரிக்கும். சிவப்பு விளக்கு பொருத்தப்பட்ட கார்கள் அதிக அளவில் உலா வந்தால், பிரச்னைகளை உருவாக்கும். இருந்தாலும், இதை அனுமதிப்பது தொடர்பாக, சம்பந்தப்பட்ட மாநில அரசுகள் தான் முடிவெடுக்க வேண்டும்.

"ஆப்சென்ட்' எம்.பி.,க்கள்:எம்.பி.,க்கள் மற்றும் அமைச்சர்கள், பார்லிமென்டிற்கு அதிகம் வராமல் மட்டம் போடுவது சரியானதல்ல. பல நேரங்களில் கொறடா உத்தரவு பிறப்பிக்கப்பட்டும், எம்.பி.,க்கள் சபைக்கு வருவதில்லை. கட்சியின் மாநில அமைப்பாளர்களும், பார்லிமென்ட் நிர்வாகங்களை கவனிக்கும் கட்சியினரும், காங்கிரஸ் எம்.பி.,க்கள், அதிக நாட்கள் பார்லிமென்டிற்கு வருவதை உறுதி செய்ய வேண்டும். அதற்கான நடவடிக்கைகளை எடுக்க வேண்டும். எம்.பி.,க்கள் சிலர் பார்லிமென்டிற்கு வந்து, வருகைப் பதிவேட்டில் கையெழுத்து போட்டு விட்டு, கொஞ்ச நேரம் சபையில் அமராமல் காணாமல் போய் விடுகின்றனர். இது சரியல்ல. அடிக்கடி சபைக்கு வராமல் இருக்கும் எம்.பி.,க்கள் பட்டியலை தாருங்கள்.இவ்வாறு சோனியா கூறினார்.

ஓய்வூதியதாரர்களிடம் உறுதி:முதியோர் ஓய்வூதியம் 200 ரூபாய் என வழங்கப்படுவதை 2,000 ஆக உயர்த்த வேண்டும் என, ஓய்வூதியதாரர்கள் அமைப்பின் சார்பில், காங்கிரஸ் கட்சித் தலைவர் சோனியாவிடம் கோரிக்கை வைக்கப்பட்டது. சமூக ஆர்வலர் அருணா ராய் மற்றும் பாபா ஆதவ் ஆகியோர் நேற்று முன்தினம் சோனியாவை சந்தித்துப் பேசினர். அப்போது அவர்களிடம் பேசிய சோனியா, "முதியோர் ஓய்வூதியம் 200 ஆக இருப்பது குறைவு என்பதை ஏற்கிறேன். ஆனால், அதை 2,000 ரூபாயாக உயர்த்த முடியுமா எனக் கூற முடியாது. ஆனால், இவ்விஷயத்தில் நான் நிச்சயம் உதவுகிறேன்' என்றார்.முதியோருக்கு மாதந்தோறும் 200 ரூபாய் அளிப்பது அவர்களை கேவலப்படுத்துவது போல் உள்ளது என, மத்திய கிராமப்புற மேம்பாட்டுத் துறை அமைச்சர் ஜெய்ராம் ரமேஷ், பிரதமர் மன்மோகன் சிங்கிற்கு அனுப்பிய கடிதத்தில் ஏற்கனவே கூறியுள்ளார் என்பது குறிப்பிடத்தக்கது.

வருகைக்கு எதிர்ப்பு:கவுகாத்தி: அசாம் தலைநகர் கவுகாத்திக்கு வரும் 26ம் தேதி, காங்கிரஸ் தலைவர் சோனியா செல்ல உள்ளார். அங்கு அவர், மாநிலத்தில் காங்கிரஸ் கட்சி ஆட்சியின் 11வது ஆண்டு விழாவில் கலந்து கொள்ள உள்ளார். அவரது வருகைக்கு, உல்பா அமைப்பினர் எதிர்ப்பு தெரிவித்து, 12 மணி நேர "பந்த்'திற்கு அழைப்பு விடுத்துள்ளனர்.இதேபோல், ஏப்ரல் 20ம் தேதி, அசாம் மாநில சட்டசபையின் பவள விழாவில் கலந்து கொள்ள பிரதமர் மன்மோகன் சிங் அங்கு சென்றபோதும், உல்பா அமைப்பினர் 12 மணி நேர "பந்த்'திற்கு அழைப்பு விடுத்திருந்தனர் என்பது குறிப்பிடத்தக்கது. ஆனால், பிரதமர் அங்கு சில மணி நேரங்கள் மட்டுமே செலவிட்டு திரும்பினார்.

-தினமலர்