காற்றாலை மின் உற்பத்தி திருப்திகரம்; நீர் மின் உற்பத்தியும் ஓ.கே., : மின்வெட்டு தளர்வு நீடிப்பு

தமிழகத்தில் காற்றாலை மின் உற்பத்தி தொடர்ந்து திருப்திகரமாக இருப்பதால், மாநிலத்தின் பல்வேறு பகுதிகளில் மின்வெட்டு தொடர்ந்து தளர்த்தப்பட்டு வருகிறது. நீர்மின் உற்பத்தி குறைவாக இருப்பினும், தொடர்ந்து ஒரே சீராக இருந்து வருகிறது.

தமிழகத்தில் கன்னியாகுமரி, திருநெல்வேலி, கோவை, திருப்பூர், விருதுநகர் ஆகிய மாவட்டங்களில் காற்றாலை மின் உற்பத்தி செய்யப்படுகிறது. இப்பகுதிகளில் அமைக்கப்பட்டுள்ள 10 ஆயிரத்துக்கும் மேற்பட்ட காற்றாலைகளின் மூலம் 6,531 மெகாவாட் உற்பத்தி (நிறுவுதிறன்) செய்ய முடியும். ஆண்டுதோறும் மே மாதம் துவங்கி, நவம்பர் மாதம் வரை காற்றின் வேகம் அதிகரிப்பதால், காற்றாலை மின் உற்பத்தியின் அளவும் அதிகரிக்கும்.

குறைந்தது :இந்த ஆண்டு ஏப்ரல் மாத துவக்கத்திலிருந்தே காற்றின் வேகம் அதிகரித்ததால், மின் உற்பத்தியும் அதிகரித்தது. இதன் காரணமாக, தமிழகத்தின் பல பகுதிகளிலும் மின்வெட்டு தளர்த்தப்பட்டுள்ளது. சென்னை தவிர, மாநிலத்தின் மற்ற பகுதிகளில் மின்வெட்டு நேரம் எட்டு முதல் 10 மணி நேரமாக இருந்த நிலையில், காற்றாலை மின் உற்பத்தி காரணமாக மின்வெட்டு நேரம் நான்கு மணி நேரமாகக் குறைந்துள்ளது.சில இடங்களில், மின் உற்பத்திக்கு ஏற்ப மின்வெட்டு முழுமையாக தளர்த்தப்பட்டுள்ளது. குறிப்பாக இரவு நேரங்களில் ஒரு மணி நேரத்திற்கு ஒருமுறை என்ற சுழற்சி அடிப்படையில் செய்யப்பட்டு வந்த மின்வெட்டு தளர்த்தப்பட்டு, இரவில் தடையற்ற மின்சாரம் வழங்க மின் வாரியம் முன்னுரிமை கொடுத்து வருகிறது.

சீரான நீர் மின்சக்தி உற்பத்தி:தமிழகத்தில் உள்ள 40 புனல் மின் நிலையங்களின் நிறுவுதிறன் 2,223 மெகாவாட். புனல் மின் உற்பத்தி நிலையங்களில் இருந்து ஆண்டுதோறும் மின்சாரம் கிடைப்பதில்லை என்றாலும், தென்மேற்கு பருவ காலங்களில் (ஜூன் முதல் அக்டோபர் மாதம் வரை) நீர்தேக்கங்களுக்கு தண்ணீர் வரத்து அதிகமாக இருக்கும்.இந்த காலங்களில் நீர் மின்சக்தி உற்பத்தி அதிகரிக்கும். கடந்த ஒரு வாரமாக புனல் மின் நிலையங்களில் இருந்து 600 மெகாவாட் மின்சாரம் சராசரியாக கிடைத்து வருகிறது. நேற்று (6ம் தேதி) நீர் மின்சக்தியின் உற்பத்தி அளவு 876 மெகாவாட்டாக அதிகரித்துள்ளது.

இது குறித்து பேசிய மின் வாரிய அதிகாரி ஒருவர், ""காற்றாலை மின் உற்பத்தி தொடர்ந்து திருப்திகரமாக இருந்து வருகிறது. அதோடு, புனல் மின் நிலையங்களிலும், மின் உற்பத்தியில் பெரிய வீழ்ச்சி இல்லாமல் உள்ளது. இதனால், மாநிலத்தின் பல பகுதிகளிலும் மின்வெட்டு தளர்த்தப்படுவது தொடர்கிறது. கூடங்குளம் மின் உற்பத்தி துவங்கி, அதில் தமிழகத்தின் பங்கும் நமக்கு விரைவில் கிடைக்கவுள்ளதால், மின்வெட்டு தளர்வு தொடர வாய்ப்புள்ளது,'' என்றார்.

-தினமலர்

கடந்த 10 நாளாத்தான் என் தொழிலை ஒழுங்கா நடத்த முடியுது