அழகர்சாமியின் குதிரை சினிமாவுக்கு சிறந்த ஜனரஞ்சகமான படத்துக்கான தேசிய விருது

அழகர்சாமியின் குதிரை சினிமாவுக்கு சிறந்த ஜனரஞ்சகமான படத்துக்கான தேசிய விருது வழங்கப்பட்டது. துணை ஜனாதிபதி அமீது அன்சாரி இந்த விருதை வழங்கினார். அதில் கதாநாயகனாக நடித்த அப்பு குட்டிக்கு சிறந்த துணை நடிகருக்கான தேசிய விருது வழங்கப்பட்டது.

விருது வழங்கும் விழா

59-வது தேசிய திரைப்பட விருதுகள் வழங்கும் விழா நேற்று டெல்லியில் நடந்தது. துணை ஜனாதிபதி அமீது அன்சாரி இந்த விருதுகளை வழங்கினார்.

வங்காள நடிகர் சவுமித்ர சட்டர்ஜிக்கு, வாழ் நாள் சாதனையாளருக்கு வழங்கப்படும் `தாதா சாகேப் பால்கே' விருது வழங்கினார்.

அழகர்சாமியின் குதிரை

`அழகர்சாமியின் குதிரை' தமிழ் சினிமாவுக்கு சிறந்த ஜனரஞ்சகமான படத்துக்கான தேசிய விருது வழங்கப்பட்டது. இந்த படத்துக்கு தங்கத்தாமரையும், ரூ.2 லட்சமும் வழங்கப்பட்டது.

இந்தப் படத்தில் கதாநாயகனாக நடித்த அப்பு குட்டி, சிறந்த துணை நடிகருக்கான தேசிய விருது பெற்றார். அவருக்கு வெள்ளி தாமரையும், ரூ.50 ஆயிரமும் வழங்கப்பட்டது.

சிறந்த தமிழ்ப்படத்துக்கான விருது `வாகை சூடவா' படத்துக்கு வழங்கப்பட்டது.

உமேஷ் குல்கர்னி டைரக்ட் செய்த மராத்தி படம் `தியோல்', `பியாரி' ஆகிய சினிமா படங்கள் சிறந்த படங்களுக்கான தேசிய விருதை பகிர்ந்து கொண்டன. இந்த படங்களுக்கு தங்கத் தாமரையும், ரூ.21/2 லட்சம் பரிசும் வழங்கினார்.

வித்யாபாலன்

இந்தி நடிகை வித்யா பாலன், தமிழ் நடிகை சில்க் ஸ்மிதாவின் வாழ்க்கையை பின்னணியாக கொண்டு தயாரிக்கப்பட்ட `தி டர்ட்டி பிக்சர்ஸ்' படத்தில் சில்க் ஸ்மிதாவாக நடித்து இருந்தார். அவருக்கு சிறந்த நடிகைக்கான தேசிய விருதை அமீது அன்சாரி வழங்கினார்.

கத்தரிப்பூ நிறத்தில் சேலை அணிந்து வந்திருந்த அவருடன் அவரது பெற்றோரும் விழாவில் கலந்து கொண்டனர்.

சிறந்த கதாநாயகன்

`தியோல்' படத்தில் கதாநாயகனாக நடித்த கிரிஷ் குல்கர்னி சிறந்த நடிகருக்கான விருதை பெற்றார். அவருக்கு வெள்ளித் தாமரையும், ரூ.50 ஆயிரமும் அமீது அன்சாரி வழங்கினார்.

பஞ்சாபி மொழியில் வெளியான `ஆன்கே கியோரி டா டான்' சினிமாவை இயக்கிய டைரக்டர் குர்விந்தர் சிங்குக்கு சிறந்த இயக்குனருக்கான விருதும், தங்கத் தாமரையும், ரூ.21/2 லட்சமும் வழங்கப்பட்டது. இந்த படம் தேசிய அளவில் சிறந்த ஒளிப்பரப்புக்கான விருதையும், பஞ்சாபி மொழியிலான சிறந்த படமாகவும் தேர்ந்து எடுக்கப்பட்டு விருது வழங்கப்பட்டது.

தமிழருக்கு 2 விருதுகள்

எஸ்.நல்லமுத்து இயக்கிய `டைகர் டைனாஸ்டி' செய்திப் படம் சிறந்த சுற்றுச் சூழல் விருது மற்றும் செய்தி படங்களுக்கான சிறந்த ஒளிப்பதிவுக்கான விருதுகளை பெற்றன. நல்ல முத்துவுக்கு 2 வெள்ளித் தாமரைகளையும், விருதுகளையும், ரொக்கப் பரிசுகளையும் அமீது அன்சாரி வழங்கினார்.

குமாரராஜா தியாகராஜன் இயக்கிய `ஆரண்யகாண்டம்' சினிமாவுக்கு, சிறந்த புதுமுக இயக்குனருக்கான இந்திரா காந்தி விருது வழங்கப்பட்டது. குமாரராஜ தியாகராஜன் தங்கத் தாமரையும், ரூ.11/2 லட்சமும் பரிசு பெற்றார்.

இந்த படத்தை எடிட் செய்த கே.எல்.பிரவீன் சிறந்த படத்தொகுப்பாளருக்கான விருது பெற்றார்.

பிற விருதுகள்

மற்ற விருது பெற்றவர்கள் விவரம் வருமாறு:-

சிறந்த பாடகர்:- ஆனந்த் பட் (மராத்தி படம்).
சிறந்த பாடகி:- நடிகை ரூபா கங்குலி.
சிறந்த இந்தி படம்:- ஐ.ஆம்.
இதே படத்தில் இடம் பெற்ற பாடல் சிறந்த பாடலுக்குரிய விருதையும் பெற்றது.
சிறந்த துணை நடிகை:- தொன்தோயிங்காபி தேவி (மணிப்புரி நடிகை)
குழந்தைகளுக்கான சிறந்த படம்:- சில்லர் பார்ட்டி (இந்தி)
இந்த படத்தில் நாடித்த 11 சிறுவர்-சிறுமிகளும், `ஸ்டான்லி கா தாபா' படத்தில் நடித்த பார்த்தோ குப்தாவும் சேர்ந்து சிறந்த குழந்தை நட்சத்திரங்களுக்கான விருதை பெற்றனர்.
சிறந்த திரைக்கதை:- விகாஸ் பேல் மற்றும் மனீஷ் திவாரி (சில்லர் பார்ட்டி)
சிறந்த நடன ஆசிரியர்:- போஸ்கோ-கெசர் (இந்தி படம்).
ஸ்பெஷல் எபெக்ட்:- சாருக்கான் நடித்த ரா ஒன் இந்திப்படம்.
சிறந்த மேக்-அப் மற்றும் உடை அலங்காரம்:- தி டர்ட்டி பிக்சர்ஸ் மற்றும் பால்கந்தர்வ படங்கள்.

மேலும் 23 பேர் பல்வேறு விருதுகளை பெற்றனர்.

நல்ல படம்.,சரியான விருது தான்.