யாரையும் வரவேற்க வேண்டும் என்று எந்த சட்டமும், தி.மு.க.,வில் இல்லை

by balakarthik Sat Apr 21, 2012 11:28 am

""யாரையும் வரவேற்க வேண்டும் என்று எந்த சட்டமும், தி.மு.க.,வில் இல்லை,'' என, சீனா பயணத்தை முடித்துக் கொண்டு மதுரை விமானம் நிலையத்தில் வந்து இறங்கிய மத்திய அமைச்சர் அழகிரி காட்டமாகக் கூறினார். மதுரையில், ஏப்., 15ல் நடந்த, நகர் இளைஞரணி பொறுப்பாளர்களுக்கான நேர்காணல், கண்டன கூட்டங்களில் அழகிரி ஆதரவாளர்கள் பங்கேற்கவில்லை என்ற சர்ச்சை எழுந்தது.

நோட்டீஸ்: அழகிரி ஆதரவாளர்கள் 17 பேருக்கு, தலைமை நோட்டீஸ் அனுப்பியது. "டென்ஷன்' ஆன அழகிரி ஆதரவாளர்கள், ரகசிய கூட்டம் நடத்தி, அதில் எடுத்த முடிவு படி, நேற்று முன்தினம் தனித்தனியாக தலைமைக்கு விளக்கம் அனுப்பினர். மதுரையில் ஸ்டாலின் நடத்திய நிகழ்ச்சிகளுக்கான போஸ்டர்களில், மத்திய அமைச்சர் மற்றும் தென் மண்டல அமைப்பு செயலர் என்ற முறையில், அழகிரி பெயர் இல்லை. ஸ்டாலின் மதுரை வருகை குறித்து அழகிரிக்கு தகவல் தெரிவிக்கப்படவில்லை. நோட்டீஸ்களை பொதுச் செயலர் தான் அனுப்ப வேண்டும்; ஆனால், அமைப்பு
செயலர் பெயர் குறிப்பிட்டு, அனுப்பப்பட்டுள்ளன; அவருக்கு அதிகாரம் இல்லை என அழகிரி ஆதரவாளர்கள் பதிலில் குறிப்பிட்டனர்.இந்நிலையில் மதுரை வந்த அழகிரி அளித்த பேட்டி:

* ஸ்டாலின் நிகழ்ச்சியை புறக்கணித்ததாக, 17 நிர்வாகிகளுக்கு தலைமை விளக்கம் கேட்டு நோட்டீஸ் அனுப்பியுள்ளதே?

எனக்கு தெரியாது; சீனா சென்று விட்டு இப்போது தான் வருகிறேன்; இதுகுறித்து இனிமேல் பார்க்கணும்.

* பொருளாளர் ஸ்டாலின் மதுரை வருகை குறித்து உங்களுக்கு முன்கூட்டியே தெரிவிக்கப்பட்டதா?

யாரும் தெரிவிக்கவில்லை; எனக்கு தெரியாது.

* கட்சியில் இருந்து நோட்டீஸ் பெற்ற நிர்வாகிகள் ரகசிய கூட்டம் நடத்தியுள்ளனரே...

இனிமேல் தான் இதுகுறித்து விசாரிக்க வேண்டும். ஒன்றை உறுதியாகச் சொல்கிறேன்... தி.மு.க.,வில், யாரையும் வரவேற்க வேண்டும் என, எந்த சட்டமும் இல்லை என அழகிரி பேட்டியளித்தார்.

நன்றி தினமலர்