ராஜ்யசபா எம்.பி., ஆகிறார் தோனி?

by மகா பிரபு Wed Apr 18, 2012 10:20 am

இந்திய கிரிக்கெட் அணியின் கேப்டன் மகேந்திரசிங் தோனிக்கு, ராஜ்யசபா எம்.பி., பதவி வழங்குவது குறித்து, ஜார்க்கண்ட் விகாஸ் மோர்ச்சா கட்சி பரிசீலித்து வருகிறது.

ஜார்க்கண்ட் மாநிலத்தில் ராஜ்யசபா எம்.பி.,க்கள் இருவரைத் தேர்வு செய்ய மார்ச் 30ல் தேர்தல் நடந்தது. இந்தத் தேர்தலின் போது, எம்.எல்.ஏ.,க்களுக்கு கொடுப்பதற்காக கொண்டு வரப்பட்ட, 2.15 கோடி ரூபாய் பணம், பறிமுதல் செய்யப்பட்டதை அடுத்து, தேர்தல் ரத்து செய்யப்பட்டது. இதையடுத்து, மே 3ம் தேதி மீண்டும் தேர்தல் நடைபெறும் என, அறிவிக்கப்பட்டுள்ளது. இந்த இரண்டு எம்.பி., பதவிகளில் ஒன்றுக்கு, இந்திய கிரிக்கெட் அணியின் கேப்டன், மகேந்திரசிங் தோனியை தேர்வு செய்வது குறித்து, முன்னாள் முதல்வர் பாபுலால் மராண்டி தலைமையிலான, ஜார்க் கண்ட் மாநில எதிர்க்கட்சியான ஜார்க்கண்ட் விகாஸ் மோர்ச்சா பரிசீலித்து வருகிறது.

இதுதொடர்பாக, ஜார்க்கண்ட் விகாஸ் மோர்ச்சா கட்சியின் துணைத் தலைவரும், முன்னாள் அமைச்சருமான சமரேஷ்சிங் கூறுகையில், ""இந்திய கிரிக்கெட் அணி, உலகக் கோப்பையை பெறக் காரணமாக இருந்தவர் தோனி. அவரின் தலைமையில்தான் அணி வெற்றி பெற்றது. தோனி ராஞ்சியின் மைந்தர். அவரை ஏன், ராஜ்யசபாவிற்கு அனுப்பக்கூடாது. எனவே, அவரை அனுப்புவது குறித்து பரிசீலித்து வருகிறோம். அதேபோல், ஜார்க்கண்ட் மாநில முன்னாள் டி.ஜி.பி.,யும், நேர்மையான போலீஸ் அதிகாரியுமான நியாஸ் அகமதுவின் பெயரும் பரிசீலனையில் உள்ளது'' என்றார்.

தினமலர்.