காதல் குறுந்தொகை

by **சிவா** Sun Apr 15, 2012 7:45 pm

குயிலறியாத இசை
குடையறியாத மழை
வெயிலறியாத மலர்
வெரறியாத நிலம்

நீதான் என்றேன் சரியா - என்
நித்திலக் காதல் பிழையா!

வள்ளுவன் எழுதா குறள்
வானவில் அறியா நிறம்
முத்தமிழ் தராத சுகம்
முத்தம் இடாத முகம்

நீயடி என்று உரைத்தேன் - அந்த
நீலவான் தொட்டுக் குதித்தேன்!

கடல் காணாத துளி
கரை காணாத நதி
கண் காணாத வெளி
கனி காணாத விதை

உனக்குள் உள்ளது என்றேன் - உன்
ஒவ்வோர் அழகையும் தின்றேன்!

நடுநிசி நேர கனா
நவம்பர் மாத நிலை
உயிரைத் தொடரும் நிழல்
உதடுகள் ஊதா குழல்

நுட்டமே நீயென குளிர்த்தேன் - நான்
நுரையீரல் வரை சிலிர்த்தேன்!

பைந்தமிழ்ப் பாட்டின் ருசி
பாரதி வீட்டின் பசி
மூங்கில் முனகும் ஒலி
மூன்றாம் பாலின் சுவை

உன்னால் உணர்ந்தேன் இன்று - நான்
உன்னுள் உறைவது என்று?

மழை இல்லாத முகில்
மரம் இல்லாத மலை
இமை இல்லாத விழி
எழுத்திலாலத லிபி

இவைபோல் நானும் ஆனேன் - வாழ்வின்
எதுகை மோனையை காணேன்!

ரணமறியாத வலி
நபியறியாத இடர்
இரவறியாத பகல்
ஏசறியாத துயர்

நான் என எப்படி மொழிவேன் - என்
நகக்கண் பத்திலும் அழுவேன்!

அலை தீண்டாத கரை
இலை தீண்டாத பனி
கிளி தீண்டாத கிளை
உயிர் தீண்டாத உடல்

நான் வாழ பதியொன்று உரைப்பாய் - இல்லை
சூரியனில் தோண்டியெனை புதைப்பாய்!

படைஇல்லாத களம்
விடைஇல்லாத வினா
கொலுசில்லாத பரல்
குழந்தையில்லாத குடில்

இப்படித் தானடி கிடந்தேன் - நீ
எதிரில் வந்தாய் எழுந்தேன்!

அகதிகள் அற்ற நிலை
ஐ.நா. சபையில் தமிழ்
எங்கும் சமத்துவக் கொடி
ஈழம் அடைந்த நொடி

எனக்கு ஒருநாள் வாய்க்கும் - உன்
இருதயம் எப்போது காய்க்கும்!

- இளைய கம்பன்