ஐபிஎல்... மட்டையாளர்களை முந்தும் பந்து வீச்சாளர்கள்!

சென்னை: 5வது ஐபிஎல் தொடரில் இதுவரை பந்து வீச்சாளர்களின் கையே ஓங்கி நிற்கிறது. பேட்ஸ்மென்களை விட இவர்கள்தான் கலக்கிக் கொண்டிருக்கின்றனர். இதுவரை எந்த பேட்ஸ்மேனும் ஒரு செஞ்சுரி கூட போடவில்லை என்பது குறிப்பிடத்தக்கது.

ஒரு வாரத்திற்கு முன்பு ஆஹோ ஓஹோவென படு ஆடம்பரமாக தொடங்கியது ஐபிஎல் போட்டித் தொடர். பெருமளவில் பணம் புழங்கும், இந்த கோடீஸ்வர விளையாட்டில், இதுவரை பந்து வீச்சாளர்கள்தான் ஜொலித்து வருகின்றனர். பேட்ஸ்மென்கள் பின்னுக்குத் தள்ளப்பட்டுள்ளனர்.

வழக்கமாக ஒவ்வொரு ஆண்டும் பேட்ஸ்மேன்கள்தான் கலக்குவார்கள். பந்து வீச்சாளர்கள் 2வது இடத்தில்தான் இருப்பார்கள். ஆனால் இந்த முறை தலைகீழாக உள்ளது.

இதுவரை நடந்த போட்டிகளில் பேட்டிங்கை விட பவுலிங்தான் பிரகாசமாக காணப்படுகிறது.

ஏப்ரல் 4ம் தேதி தொடங்கி 9ம் தேதி வரையிலான நிலவரப்படி இதுவரை மொத்தம் 128 விக்கெட்கள் வீழ்த்தப்பட்டுள்ளன. அதிகபட்சமாக ராஜஸ்தான் ராயல்ஸ் அணியின் கெவின் கூப்பர் 2 போட்டிகளில் 7 விக்கெட் சாய்த்துள்ளார்.

அதிக ரன்களைக் குவித்த வீரராக திகழ்பவர் ராஜஸ்தான் ராயல்ஸின் அஜிங்கியா ரஹானேதான். இவர் 2 போட்டிகளில் 98 ரன்கள் எடுத்துள்ளார்.

அதிகபட்ச ஸ்கோரை வைத்திருப்பவரும் ரஹானேதான். 98 ரன்கள் எடுத்ததே இவரது சாதனை.

5வது ஐபிஎல் தொடரில் இதுவரை மொத்தம் 86 சிக்ஸர்கள் விளாசப்பட்டுள்ளன.அதிக அளவிலான சிக்ஸர்களை விளாசிய வீரர் சென்னை சூப்பர் கிங்ஸின் வேயன் பிராவோ. மொத்தம் 5 சிக்ஸர் விளாசியுள்ளார்.

அதிகபட்ச பேட்டிங் சராசரியை வைத்திருப்பவர் டெல்லி டேர்டெவில்ஸின் இர்பான் பதான். அதாவது 66.00 வைத்துள்ளார்.

பெரிய ஸ்கோரை எட்டிய அணி நம்ம சென்னை சூப்பர் கிங்ஸ்தான். டெக்கான் சார்ஜர்ஸ் அணிக்கு எதிராக இந்த அணி 6 விக்கெட் இழப்புக்கு 193 ரன்களைக் குவித்தது.

சிறந்த பவுலிங் எது என்றால் சென்னை சூப்பர் கிங்ஸின் ரவீந்திர ஜடேஜாதான். டெக்கான் சார்ஜர்ஸுக்கு எதிராக இவர் 16 ரன்கள் கொடுத்து 5 விக்கெட் வீழ்த்தி இந்த சாதனையைப் படைத்துள்ளார்.

அதிக கேட்ச் பிடித்த வீரர் மும்பை இந்தியன்ஸின் கீரன் போலார்ட். பிடித்த கேட்ச் எண்ணிக்கை 5.

உயர்ந்தபட்ச பார்ட்னர்ஷிப்பை வைத்திருப்பவர்கள் புனே வாரியர்ஸின் மர்லான் சாமுவேல்ஸ் மற்றும் ராபின் உத்தப்பா. கிங்ஸ் லெவன் பஞ்சாபுக்கு எதிராக இவர்கள் 3வது விக்கெட்டுக்கு 81 ரன்கள் சேர்த்து இந்த சாதனையைப் படைத்துள்ளனர்.

அதிக ரன் வித்தியாசத்தில் வெற்றி பெற்ற அணி சென்னை சூப்பர் கிங்ஸ்தான். டெக்கான் சார்ஜர்ஸுக்கு எதிராக 74 ரன்கள் வித்தியாசத்தில் சென்னை வென்றது.

அதிக விக்கெட் வித்தியாசத்தில் வென்ற் அணி மும்பை இந்தியன்ஸ். சென்னையை இந்த அணி 8 விக்கெட் வித்தியாசத்தில் வீழ்த்தி இச்சாதனையைப் படைத்துள்ளது.

ஒரு இன்னிங்ஸில் அதிகபட்சமாக விட்டுக் கொடுக்கப்பட்ட உதிரி ரன்கள் 19. இதை வழங்கிய பாரி வள்ளல் ராஜஸ்தான் ராயல்ஸ்.

இந்தத் தொடரில் இதுவரை 6 நோ பால்கள் போடப்பட்டுள்ளன. அதேபோல போடப்பட்ட வைடுகள் எண்ணிக்கை 56 ஆகும்.

அதேபோல இந்தத் தொடரில் இதுவரை விளாசப்பட்டுள்ள பவுண்டரிகளின் எண்ணிக்கை 191 ஆகும்.

5வது ஐபிஎல் தொடரில் மேற்கண்ட காலகட்டத்தில் எடுக்கப்பட்டுள்ள மொத்த ரன்களின் எண்ணிக்கை 2507 ஆகும்.

பகிர்வுக்கு நன்றி கார்த்தி.