ஆயுத இறக்குமதியில் இந்தியா முதலிடம்

by இரா.பகவதி Tue Mar 20, 2012 6:50 pm

லண்டன், மார்ச் 19: ராணுவத்துக்குத் தேவையான ஆயுதங்களை இறக்குமதி செய்யும் நாடுகள் வரிசையில் இந்தியா முதலிடத்தைப் பிடித்துள்ளது. இதுவரையில் இந்த இடத்தில் இருந்துவந்த சீனா இப்போது இரண்டாமிடத்துக்குத் தள்ளப்பட்டுள்ளது.
உலக அளவில் இறக்குமதி செய்யப்படும் ஒட்டுமொத்த ஆயுதங்களில் 10 சதவீதத்தை இந்தியா இறக்குமதி செய்கிறது.
2007-ம் ஆண்டிலிருந்து 2011-ம் ஆண்டு வரையிலான காலத்தில் இந்தியாவின் முக்கிய ராணுவ தளவாட இறக்குமதி 38 சதவீதம் உயர்ந்துள்ளதாக ஸ்வீடனில் உள்ள தன்னார்வ அமைப்பு தகவல் வெளியிட்டுள்ளது.
உலகிலேயே ஆசிய பிராந்தியத்தில்தான் அதிக அளவு ஆயுதங்கள் இறக்குமதி செய்யப்படுவதாக அது தெரிவித்துள்ளது. ஸ்டாக்ஹோம் சர்வதேச அமைதி ஆராய்ச்சி மையம் என்ற பெயரில் இயங்கும் இந்நிறுவனம் வெளியிட்டுள்ள அறிக்கையின்படி இந்தியாவுக்கு அடுத்தபபடியாக சீனாவும், அதைத் தொடர்ந்து பாகிஸ்தானும் அதிக அளவில் ஆயுதங்களை இறக்குமதி செய்கின்றன.
அமெரிக்கா மற்றும் சீனாவிடமிருந்து அதி நவீன போர் விமானங்களை பாகிஸ்தான் அதிக அளவில் இறக்குமதி செய்துள்ளது.
அமெரிக்காவுக்கு அடுத்தபடியாக உலகிலேயே மிக அதிக அளவு ஆயுதங்களை ஏற்றுமதி செய்யும் நாடாக சீனா திகழ்வதாக அந்த அறிக்கையில் குறிப்பிடப்பட்டுள்ளது.
2007-ம் ஆண்டு அதிக அளவில் ஆயுதங்களை இறக்குமதி செய்துவந்த சீனா, இப்போது உள்நாட்டிலேயே அதிக அளவில் ஆயுதங்களைத் தயாரிக்கும் தொழிற்சாலையை ஏற்படுத்தியுள்ளதால் அதிக அளவில் வெளிநாடுகளுக்கு ஆயுதங்களை ஏற்றுமதி செய்கிறது என்றும் அறிக்கையில் குறிப்பிடப்பட்டுள்ளது.
சீனாவிடமிருந்து அதிக அளவில் ஆயுதங்களை பாகிஸ்தான் இறக்குமதி செய்வதே இதற்கு முக்கியக் காரணமாகும். அடுத்த 15 ஆண்டுகளில் ராணுவ தளவாடங்களுக்கு 10,000 கோடி டாலர் அளவுக்கு இந்தியா ஆயுத இறக்குமதிக்குச் செலவிடும் என மதிப்பிட்டுள்ளது.
இந்தியா சமீபத்தில் 126 ரக ஜெட் விமானங்கள் மற்றும் 120 எஸ்யு-30எம்கே, 16 மிக் ரக விமானங்களும் இதில் அடங்கும். அமெரிக்கா மற்றும் ரஷியாவிடமிருந்து போர் விமானங்களை இந்தியா வாங்குகிறது.
இவை தவிர, நீர்மூழ்கி மற்றும் கடற்படைக் கப்பல், பீரங்கிகள் மற்றும் சிறிய ரக ஆயுதங்கள் வாங்குவதற்கு திட்டமிட்டுள்ளதாக அறிக்கையில் குறிப்பிடப்பட்டுள்ளது.

thinakaran