படிப்பும், பாகற்காயும்

by **சிவா** Wed Mar 14, 2012 11:02 am

ஜெகனுக்கு படிப்பு என்றாலே பாகற்காயை சாப்பிடுகிற மாதிரி கசக்கும். அவன் ஐந்தாம் வகுப்பில் படிக்கும் மாணவன். கடந்த அரையாண்டு தேர்வில் அனைத்து பாடங்களிலும் தோல்வி அடைந்தான்.

ரேங்க் கார்டை அம்மா சரோஜாவிடம் நீட்டினான்.

"எனக்கு படிப்பே வர மாட்டேங்குதும்மா'' என்றான்.

அப்பொழுது பக்கத்து வீட்டு மகேஷ்வரி அக்கா தனது குழந்தைக்கு பாலாடையில் மருந்து ஊற்றிக் கொண்டிருந்தாள். குழந்தை குடிக்க மறுத்து திமிறியது. அந்த அக்காவோ குழந்தையை கால்மேல் படுக்க வைத்து, கை, கால்களை பிடித்துக் கொண்டு, வலுக்கட்டாயமாக அதன் வாயில் மருந்தை ஊற்றினாள்.

இதைப் பார்த்துக் கொண்டிருந்த ஜெகன்,

"அக்கா, பாவம். ஏங்க்கா இப்படி குழந்தையைக் கஷ்டப்படுத்தி, மருந்து கொடுக்கறீங்க?'' என்று கேட்டான்.

அதற்கு மகேஷ்வரி, "மருந்து கசப்புன்னு குழந்தை குடிக்கலைன்னா, அதோட உடம்பு எப்படி குணமாகும் ஜெகன்?'' என்று கேட்டாள்.

அப்போது ஜெகனின் அம்மா சரோஜா அங்கு வந்தாள்.

"ஜெகன், படிப்பும் கூட இப்படி தான். ஆரம்பத்துல பாகற்காய் மாதிரி கசக்கத் தான் செய்யும். நீ ஆர்வத்தோடும், விடாமுயற்சியோடும் படிக்கும்போது தான் கற்கண்டாய் இனிக்கும். படிப்பு தாம்பா, ஒவ்வொரு மனுஷனுக்கும் பெரிய சொத்து. நீ நல்லா படிச்சேன்னா, மற்ற எல்லா வசதிகளும், உன்னைத் தேடி வந்துடும். வாழ்க்கையும் சிறப்பா இருக்கும்'' என்றாள், சரோஜா.

"அம்மா, என்னை மன்னிச்சிடுங்க. இனிமே படிப்புன்னா, வெறுக்க மாட்டேன். முழு முயற்சியோடும், ஆர்வத்தோடும் படிச்சி, வர்ற முழுஆண்டு தேர்வில் முதல் மதிப்பெண் வாங்கிடுவேன்'' என்று உறுதியாக சொன்னான், ஜெகன்.

அதே நம்பிக்கையுடன் ஜெகனின் முதுகை ஆதரவாகத் தட்டிக் கொடுத்தாள், அவள் அன்னை.

ஏ.மூர்த்தி

by **ஜாஹீதாபானு** Wed Mar 14, 2012 12:34 pm

"ஜெகன், படிப்பும் கூட இப்படி தான். ஆரம்பத்துல பாகற்காய் மாதிரி கசக்கத் தான் செய்யும். நீ ஆர்வத்தோடும், விடாமுயற்சியோடும் படிக்கும்போது தான் கற்கண்டாய் இனிக்கும். படிப்பு தாம்பா, ஒவ்வொரு மனுஷனுக்கும் பெரிய சொத்து. நீ நல்லா படிச்சேன்னா, மற்ற எல்லா வசதிகளும், உன்னைத் தேடி வந்துடும். வாழ்க்கையும் சிறப்பா இருக்கும்'' என்றாள், சரோஜா.

நிஜம் தான் சூப்பருங்க