கர்நாடக மாநில மந்திரி ஆச்சார்யா விழா மேடையில் மயங்கி விழுந்து மரணம்

by **சிவா** Wed Feb 15, 2012 8:13 am

கர்நாடக மாநில மந்திரி ஆச்சார்யா, விழா மேடையில் திடீர் என்று ஏற்பட்ட மாரடைப்பால் மயங்கி விழுந்து மரணம் அடைந்தார்.

கல்வி மந்திரி

கர்நாடக மாநில உயர்கல்வித் துறை மந்திரி பி.எஸ்.ஆச்சார்யா. (வயது 71). பெங்களூரில் உள்ள அரசு அறிவியல் கல்லூரியில் நடந்த விழா ஒன்றில் அவர் நேற்று காலையில் கலந்து கொண்டார்.

நிகழ்ச்சிகள் நடந்து கொண்டு இருந்தபோது ஆச்சார்யா `திடீர்' என்று மயங்கி, சுருண்டு விழுந்தார். இதனால் அங்கு பரபரப்பு ஏற்பட்டது. உடனடியாக அவரை தனியார் ஆஸ்பத்திரி ஒன்றில் சேர்த்தனர்.

மாரடைப்பால் மரணம்

ஆஸ்பத்திரியில் அவருக்கு தீவிர சிகிச்சை அளிக்கப்பட்டது. என்றாலும் பலன் இல்லாமல் அவர் மரணம் அடைந்தார்.

மாரடைப்பால் அவர் மரணம் அடைந்ததாக அறிவிக்கப்பட்டது.

தகவல் கிடைத்ததும், முதல்-மந்திரி சதானந்தகவுடா, சபாநாயகர் போப்பையா, மேல்-சபை தலைவர் சங்கரமூர்த்தி, மந்திரிகள் பசவராஜ் பொம்மை, அசோக் உள்ளிட்ட பலர் ஆஸ்பத்திரிக்கு சென்று ஆச்சார்யாவின் உடலுக்கு இறுதி மரியாதை செலுத்தினார்கள்.

அதன்பிறகு சதானந்தகவுடா நிருபர்களுக்கு பேட்டி அளித்தார். அப்போது துக்கம் தாங்காமல் அவர் கண்ணீர் விட்டு அழுதார்.

அஞ்சலி

ஆச்சார்யாவின் உடல் ஆஸ்பத்திரியில் இருந்து பெங்களூர் ரேஸ்கோர்ஸ் சாலையில் உள்ள அவரது வீட்டுக்கு எடுத்துச் செல்லப்பட்டது. அங்கு பொதுமக்களும், பல்வேறு கட்சிகளை சேர்ந்த தலைவர்களும் மலர் வளையம் வைத்து இறுதி மரியாதை செலுத்தினார்கள்.

தினதந்தி