காசிமேடு வாலிபர் கொலைக்கு காதல் விவகாரம் காரணமா?

by மீனு Thu Oct 01, 2009 12:07 pm

காசிமேடு மீன்பிடி துறைமுகத்தில் கொலை செய்யப்பட்டு கிடந்த வாலிபர் குறித்து போலீசார் தீவிர விசாரணை நடத்தி வருகின்றனர். காதல் விவகாரம் காரணமாக இக் கொலை நடந்ததா என்ற கோணத்தில் விசாரிக்கப்பட்டு வருகிறது.

சென்னை வண்ணாரப்பேட்டை அவதான ராமசாமி தெருவை சேர்ந்தவர் சுரேஷ்குமார் (23). தனியார் காஸ் கம்பெனியில் வேலை பார்த்து வந்தார். காசிமேடு மீன்பிடி துறைமுகம் அருகே உட்வார்ப் பகுதியில் முகம் சிதைந்த நிலையில் வாலிபர் ஒருவர் பிணமாகக் கிடப்பதாக போலீசுக்கு நேற்று அதிகாலை தகவல் கிடைத்தது. ராயபுரம் உதவி கமிஷனர் மாடசாமி, இன்ஸ்பெக்டர்கள், ஜெய்சிங், சம்பத், சப் இன்ஸ்பெக்டர் ரவி உள்ளிட்ட போலீசார் விரைந்து சென்றனர். வாலிபரின் தலை பாறாங்கற்களால் சிதைக்கப்பட்டிருந்தது. ரத்தக்கறையுடன் 3 பெரிய பாறாங்கற்கள் அருகில் கிடந்தன. எனவே, கல்லை தலையில் போட்டு கொடூரமாக கொலை செய்யப்பட்டிருப்பது தெரிந்தது.

சட்டைக்காலரில் Ôகிஷோர் டெய்லர்ஸ், சென்னை-21Õ என்ற லேபிள் இருந்தது. அதை வைத்து விசாரித்தபோது, இறந்தவர் சுரேஷ்குமார் என்பது தெரிந்தது. சடலத்தை பிரேத பரிசோதனைக்காக ஸ்டான்லி மருத்துவமனைக்கு போலீசார் அனுப்பி வைத்தனர். கொலையாளிகளைப் பிடிக்க இன்ஸ்பெக்டர் ஜெய்சிங் தலைமையில் தனிப்படை அமைக்கப்பட்டுள்ளது.

சுரேஷ்குமார், வேலைக்கு ஒழுங்காக செல்லாமல் நண்பர்களுடன் சேர்ந்து ஊர் சுற்றினார். பெற்றோர் கண்டித்ததால் ஒரு மாதத்துக்கு முன்பு வீட்டை விட்டு வெளியேறினார். காசிமேடு, ராயபுரம் ஆகிய பகுதிகளில் உள்ள நண்பர்களுடன் தங்கி, ஊர் சுற்றிக் கொண்டிருந்தார். இந்நிலையில், கொலை நடந்த அன்று சுரேஷ்குமாரின் நண்பர்கள் மணி, கார்த்திக் ஆகியோர் சுரேஷ்குமாரின் தம்பி ஆனந்திடம், உனது அண்ணனை கல்லால் அடித்துக் கொன்று விட்டனர் என்று சொல்லி சென்றனராம். ஒருவேளை அவர்களுக்கு கொலையாளிகள் யார் என்று தெரிந்திருக்கலாம் என போலீஸ் கருதுகிறது. அவர்களை வலைவீசி தேடி வருகின்றனர். சுரேஷ்குமார் வண்ணாரப்பேட்டை பகுதியில் ஒரு பெண்ணைக் காதலித்தார். அதுதொடர்பாக தகராறும் ஏற்பட்டிருக்கிறது. ஒருவேளை இந்தக் கொலை பின்னணியில் காதல் விவகாரம் இருக்குமோ என்று போலீசார் சந்தேகிக்கின்றனர். இதுகுறித்தும் தீவிரமாக விசாரித்து வருகின்றனர்.