கசாப்பு கடைக்கு சென்றஅரசின் இலவச ஆடுகள்

by மகா பிரபு Tue Jan 24, 2012 8:05 am

திண்டுக்கல்;திண்டுக்கல் மாவட்டம், அஞ்சுகுளிப்பட்டியில், தமிழக அரசின் இலவச ஆடுகளை பெற்ற பயனாளிகள், அவற்றை கறிக்கடைக்கு விற்றுள்ளனர்.கிராமப்புறங்களை சேர்ந்த வறுமைக் கோட்டிற்கு கீழ் உள்ளவர்களுக்கு, தமிழக அரசு இலவச ஆடு, மாடுகள் வழங்குகிறது. இத்திட்டத்தின் கீழ், ஒரு பயனாளிக்கு, நான்கு ஆடுகள் வழங்கப்படும்.இவற்றை, இரண்டு ஆண்டுகளுக்கு விற்கக் கூடாது. இந்த ஆடுகள் ஈனும் குட்டிகளை மட்டும் விற்பனை செய்யலாம். பயனாளிகள் சிலர், தங்களுக்கு வழங்கப்பட்ட ஆடுகளை, உடனடியாக விற்று, பணம் பார்க்க துவங்கி விட்டனர்.

திண்டுக்கல் மாவட்டம் அஞ்சுகுளிப்பட்டியில், பயனாளிகளுக்கு வழங்கப்பட்ட ஆடுகள் பல, கசாப்பு கடைகளில் விற்கப்பட்டது தெரியவந்தது. கலெக்டர் நாகராஜன் விசாரணை நடத்தினார். இதில், ஐந்து பயனாளிகள், தங்களுக்கு இலவசமாக வழங்கப்பட்ட, 20 ஆடுகளில், 11 ஆடுகளை, கசாப்பு கடைக்கு விற்பனை செய்தது உறுதி செய்யப்பட்டது.கால்நடை டாக்டர் செல்வநேசன் புகாரில், ஆடுகளை வாங்கிய கறி வியாபாரி வீரப்பன், விற்ற பயனாளிகள் மீது, சாணார்பட்டி போலீசார் வழக்கு பதிவு செய்துள்ளனர்.

dinamalar