டில்லி குடியரசு தின விழாவில் தர்மபுரி மாணவனுக்கு வீர, தீர செயலுக்கு விருது

தர்மபுரி : தர்மபுரியை அடுத்த அரகாசனஹள்ளியை சேர்ந்த மாணவனுக்கு இந்தாண்டுக்கான வீர, தீர செயலுக்கான விருது கிடைத்துள்ளது. தர்மபுரி மாவட்டம், நல்லம்பள்ளி யூனியனுக்கு உட்பட்ட கிராமம் அரகாசனஹள்ளியை சேர்ந்தவர் கூலி தொழிலாளி கோவிந்தன். இவரது மனைவி லட்சுமி. இவர்களுக்கு மூன்று மகன்கள் மற்றும் மூன்று மகள்கள் உள்ளனர். இவர்களின் மூன்றாவது மகன் பரமேஸ்வரன், 13, இவர் ஏலகிரி அரசு உயர்நிலைப்பள்ளியில் ஒன்பதாம் வகுப்பு படித்து வருகிறார்.

இவரது கிராமத்தில், நாகவதி அணை நீர் பெருக்கெடுத்து செல்லும் ஆற்றுப்படுகை பகுதி உள்ளது. 2010ம் ஆண்டு செப்., 18ம் தேதி பரமேஸ்வரன் மற்றும் அப்பகுதியை சேர்ந்த உமா, பூஜா, சரண்யா, ஆர்த்தி, புவனேஸ்வரி ஆகிய ஆறு பேர், நாகாவதி அணை ஆற்றுப்படுகை பகுதியில் குளிக்க சென்றனர்.

அப்போது, பரமேஸ்வரனை தவிர மற்ற ஐந்து பெண் குழந்தைகளும் அந்த பகுதியில் நீருக்காக தோண்டப்பட்ட, 30 அடி ஆழமுள்ள பள்ளத்தில் சிக்கி உயிருக்கு போராடினர். அதிர்ச்சி அடைந்த பரமேஸ்வரனுக்கு நீச்சல் தெரியாது. இருந்த போதும், கூச்சல் போட்டபடி பரமேஸ்வரன் ஆற்றுப்படுகை பகுதியில் இருந்து துணிகளை தூக்கி போட்டு நீரில் உயிருக்கு போராடிய சரண்யா, ஆர்த்தி, புவனேஸ்வரி ஆகியோரை அடுத்தடுத்து துணிகள் மூலம் மெல்ல ஆழமற்ற பகுதிக்கு இழுத்து மூன்று பேரையும் காப்பாற்றினார்.

மற்றவர்களை காப்பாற்ற முயன்றும் உமா, பூஜா ஆகியோர் நீரில் மூழ்கி பரிதாபமாக பலியாகினர். சமயோசிதத்துடன் பரமேஸ்வரன் செயல்பட்டதால், மூன்று உயிர்களை காப்பாற்ற முடிந்தது. பரமேஸ்வரனின், வீர, தீர செயலை அறிந்த தமிழக குழந்தைகள் நல அமைப்பகம் மூலம் ஆண்டுதோறும் குடியரசு தின விழாவின் போது பிரதமரால் வழங்கப்படும் வீர, தீர செயலுக்கான விருதுக்கு பரிந்துரை செய்தனர்.

இதை ஏற்று இந்தாண்டுக்கான வீர, தீர செயலுக்கான விருதுக்கு பரமேஸ்வரன் தேர்வு செய்யப்பட்டார். மாணவன் பரமேஸ்வரன் ஊர் மக்கள் பாராட்டுதலுடன், கடந்த 13ம் தேதி டில்லிக்கு விருது வாங்க புறப்பட்டு சென்றார். வரும், 26ம் தேதி டில்லியில் நடக்கும் குடியரசு தின விழாவின் போது, பிரதமர் மன்மோகன் சிங், பரமேஸ்வரனுக்கு விருது வழங்குகிறார்.

தினமலர்

திறமையான மாணவன் .

தைரியமான பையன்

மிகவும் அருமை...........பாராட்டுகள் தீரம் நிறைந்த மாணவருக்கு

அதிர்ச்சி அடைந்த பரமேஸ்வரனுக்கு நீச்சல் தெரியாது. இருந்த போதும், கூச்சல் போட்டபடி பரமேஸ்வரன் ஆற்றுப்படுகை பகுதியில் இருந்து துணிகளை தூக்கி போட்டு நீரில் உயிருக்கு போராடிய சரண்யா, ஆர்த்தி, புவனேஸ்வரி ஆகியோரை அடுத்தடுத்து துணிகள் மூலம் மெல்ல ஆழமற்ற பகுதிக்கு இழுத்து மூன்று பேரையும் காப்பாற்றினார்.

பெருமையாக இருக்கிறது...