முதல்வர் ஜெயலலிதாவுக்கு பிறப்பிக்கப்பட்ட பிடிவாரன்ட் : தேர்தல் அதிகாரிக்கு நோட்டீஸ் அனுப்பு உத்தரவு

by **இளமாறன்** Fri 6 Jan 2012 - 13:46

வெள்ளிக்கிழமை, 6, ஜனவரி 2012 (11:57 IST)

முதல்வர் ஜெயலலிதாவுக்கு பிறப்பிக்கப்பட்ட பிடிவாரன்ட் :
தேர்தல் அதிகாரிக்கு நோட்டீஸ் அனுப்பு உத்தரவு

தேர்தல் விதிமுறை மீறிய வழக்கு சம்பந்தமாக, முதல்வர் ஜெயலலிதாவுக்கு பிறப்பிக்கப்பட்ட பிடிவாரன்டை ரத்து செய்ய,ஆட்சேபனை கேட்டு, தேர்தல் அதிகாரிக்கு நோட்டீஸ் அனுப்ப மாஜிஸ்திரேட் உத்தரவிட்டுள்ளார்.

முதல்வர் ஜெயலலிதா, கடந்த, 2001ம் ஆண்டு சட்டசபை தேர்தலில், புவனகிரி, கிருஷ்ணகிரி, புதுக்கோட்டை, ஆண்டிப்பட்டி ஆகிய நான்கு தொகுதிகளில் போட்டியிட்டார்.தேர்தல் விதிமுறைகளை மீறியதாக, அவர் மீது தி.மு.க., முன்னாள் எம்.பி., குப்புசாமி, ஐகோர்ட்டில் வழக்குத் தொடர்ந்தார்.

அதையெடுத்து, 2006ம் ஆண்டு தி.மு.க., ஆட்சிக்கு வந்ததும், அப்போது புவனகிரி தேர்தல் அதிகாரியாக இருந்த செல்வமணி, முதல்வர் ஜெயலலிதா மீது, பரங்கிப்பேட்டை கோர்ட்டில் வழக்குத் தொடர்ந்தார்.

இந்நிலையில், இந்த வழக்கை விசாரிக்கக் கூடாது என, ஜெயலலிதா சுப்ரீம் கோர்ட்டில் தடை உத்தரவு வாங்கினார். அதனால், இந்த வழக்கு 36 முறை ஒத்தி வைக்கப்பட்டது.

நேற்று முன்தினம், இந்த வழக்கு விசாரணைக்கு வந்ததில், மாஜிஸ்திரேட் கோமதி, ஏற்கனவே போடப்பட்ட பிடிவாரன்டை முதல்வர் ஜெயலலிதாவிடம் சமர்ப்பிக்க உத்தரவிட்டார். மேலும் இந்த வழக்கு, பிப்ரவரி, 16ம் தேதிக்கு ஒத்தி வைக்கப் பட்டது.

இந்நிலையில், இந்த பிடிவாரன்டை சமர்ப்பிக்க தடையாணை கோரி, கடலூர் மாவட்ட கோர்ட்டில், வழக்கறி ஞர் சங்கரன் மனு தாக்கல் செய்தார். இந்த மனு மீதான விசாரணை, நேற்று நடந்தது. அதில் ஜெயலலிதாவிற்கு போடப் பட்ட பிடிவாரன்டை ரத்து செய்யவும், சம்மன் சமர்ப்பிக்க தடையாணை பிறப்பித்தும், நீதிபதி உத்திராபதி உத்தர விட்டார்.

பிடிவாரன்ட் போட்டிருக்கக் கூடாதுபரங்கிப்பேட்டை கோர்ட்டில் வாதம்:நேற்று ஜெ., தரப்பில் வழக்கறிஞர்கள் சங்கரன், ஜெயச்சந்திரன், அருண்மொழி வர்மன் ஆகியோர் இந்த வழக்கை அவசரமாக விசாரிக்க, பரங்கிப்பேட்டை கோர்ட்டில் மனு கொடுத்தனர்.

அப்போது அவர்கள், ஜெ.,க்கு சம்மனும் கொடுக்கவில்லை. சம்மனையும் அவர் வாங்க மறுக்கவில்லை. அப்படி இருக்கும் போது, அவருக்கு பிடிவாரன்ட் போட்டிருக்கக் கூடாது, போட்டதை ரத்து செய்ய வேண்டும்' என, வாதிட்டனர்.

அதற்கு மாஜிஸ்திரேட் கோமதி, "இந்த வழக்கை விசாரிக்கக் கூடாது என, இன்று வரை தடை உள்ளதா? அதற்கான காப்பியை கொடுங்கள்' எனக் கேட்டார். வழக்கறிஞர்கள், "காப்பி கொண்டு வரவில்லை' என தெரிவித்தனர்.

அதையடுத்து மாஜிஸ்திரேட் கோமதி, பிடிவாரன்டை ரத்து செய்ய ஆட்சேபனை கேட்டு, தேர்தல் அதிகாரி செல்வமணிக்கு நோட்டீஸ் அனுப்ப உத்தரவிட்டார். இதற்கிடையில், ஜெ., வழக்கறிஞர்கள், தாங்கள் கொடுத்த மனுவை திரும்பப் பெற, மனு தாக்கல் செய்தனர்.
நக்கீரன்