"தாய்' திட்டத்திற்காக தமிழகம் முழுவதும் குக்கிராமங்கள் கணக்கெடுப்பு

தமிழகத்தில் முதன் முறையாக செயல்படுத்தப்பட உள்ள, தமிழ்நாடு குக்கிராமங்கள் கட்டமைப்பு மேம்பாட்டுத் திட்டத்திற்காக (தாய் திட்டம்), குக்கிராமங்களின் அடிப்படை விவரங்கள், மாநிலம் முழுவதும் சேகரிக்கப்படுகின்றன.தற்போதுள்ள நடைமுறைப்படி, திட்ட செயலாக்கம் மற்றும் நிதி ஒதுக்கீடு, கிராம ஊராட்சியை அடிப்படை அலகாக கொண்டு, ஊரக வளர்ச்சி திட்டங்கள் செயல்படுத்தப்படுகின்றன. இதற்கு பதிலாக, ஊராட்சியில் உள்ள குக்கிராமங்களை, செயலாக்க அலகாக எடுத்து, திட்டங்களை செயல்படுத்த, தமிழக அரசு முடிவு செய்துள்ளது.

வளர்ச்சி திட்டம்:தமிழகத்தில், 12 ஆயிரத்து, 524 ஊராட்சிகளில், 79 ஆயிரத்து, 394 குக்கிராமங்கள் உள்ளன. ஒரு ஊராட்சியில் சராசரியாக, ஏழு குக்கிராமங்கள் உள்ளன. இவற்றின் எண்ணிக்கை, மாவட்டத்திற்கு மாவட்டம் வேறுபடுகிறது. இச்சூழலில், கிராம ஊராட்சிகளுக்கு சமமான அளவில் நிதி ஒதுக்கீடு செய்வது, வளர்ச்சி நிலையில் வேறுபாட்டையும், பொது சொத்துக்கள் உருவாக்குவதில் மாறுபாட்டையும் உருவாக்கும்.
இதை தவிர்க்கவும், குறைந்தபட்ச அடிப்படை உள்கட்டமைப்பு வசதிகள், அனைத்து குக்கிராமங்களுக்கும் சென்றடையவும், "தமிழ்நாடு குக்கிராமங்கள் கட்டமைப்பு மேம்பாட்டு திட்டம் (தாய்)' என்ற திட்டத்தை, தமிழக அரசு செயல்படுத்துகிறது.

செயல்பாடு:ஐந்து ஆண்டுகளில், 3,400 கோடி ரூபாய் மதிப்பில், அனைத்து குக்கிராமங்களிலும், இத்திட்டம் செயல்படுத்தப்பட உள்ளது. நடப்பாண்டிற்கு, 680 கோடி ரூபாய் ஒதுக்கப்பட்டுள்ளது. இதில், 200 கோடி ரூபாயை, இணைப்பு சாலைகளை மேம்படுத்தவும், மண் சாலைகள், சரளை சாலைகள் போன்றவற்றை, அனைத்து பருவ காலத்திற்கும் ஏற்ற சாலைகளாக மாற்றுவதற்காக, பயன்படுத்த முடிவு செய்யப்பட்டுள்ளது.
குடிநீர் வினியோகம், தெரு விளக்குகள், இடுகாடு, இடுகாட்டிற்கு பாதை, ரேஷன் கடை, அங்கன்வாடி மையம், சுய உதவிக்குழு கட்டடம், கதிர் அடிக்கும் களம், விளையாட்டு மையம் ஆகியவை அமைக்கவும் முடிவு செய்யப்பட்டுள்ளது.

முன்னுரிமை:இத்திட்டத்தை செயல்படுத்த, தமிழகம் முழுவதும் உள்ள குக்கிராமங்களில், அடிப்படை வசதிகள், வீடுகள் போன்ற விவரங்களை சேகரிக்கும் பணி நடந்து வருகிறது. இப்பணியில், ஊராட்சி செயலர், ஒன்றிய மேற்பார்வையாளர், துணை வட்டார வளர்ச்சி அலுவலர், வட்டார வளர்ச்சி அலுவலர் கொண்ட குழு ஈடுபடுத்தப்பட்டுள்ளது.
இக்கணக்கெடுப்பு முடிந்த பின், அதிக வசதிகள் இல்லாத குக்கிராமங்களுக்கு முன்னுரிமை அளித்து, அந்த கிராமங்களில் முதல் கட்டமாக, தாய் திட்டப் பணிகள் மேற்கொள்ளப்பட உள்ளன.

சேகரிப்பு விவரங்கள்
* ஒவ்வொரு குக்கிராமத்திலும் உள்ள தெருக்கள், வீடுகள், அவற்றின் அமைப்பு, கழிவறை வசதி, மக்கள் தொகை, ஆதிதிராவிடர், பழங்குடியினர், மிகவும் பிற்படுத்தப்பட்டோர், பிற்படுத்தப்பட்டோர், இதரர் எத்தனை பேர்.
* குடிநீர் இணைப்பு, குடிநீர் வழங்கப்படும் நேரம், நீர்தேக்கத்தொட்டி, கைப்பம்பு, நீரில் உப்பு அகற்றும் நிலையம், ஒரு நாளில் வழங்கப்படும் குடிநீர் அளவு, சராசரியாக ஒருவருக்கு, ஒரு நாளைக்கு வழங்கப்படும் குடிநீர் அளவு, திறந்தவெளி கிணறு, கிணறுகளில் பொருத்தப்பட்டுள்ள மின் மோட்டார், மின் இணைப்பு விவரம்.
* தெரு விளக்கு, சாலை, பாலம், இடுகாடு, எரி மேடை, அரசு கட்டடம், பள்ளி கட்டடம், பள்ளி கழிவறைகள், குளங்கள், ஆக்கிரமிப்புகள், கடைகள், விளையாட்டு மைதானம், கிராமத்திற்குள் செல்லும் பஸ்கள், பஸ் நிறுத்தம், சந்தை, மகளிர் குழுக்கள் என அனைத்து விவரங்களும் சேகரிக்கப்படுகின்றன.

குக்கிராமங்கள் எண்ணிக்கை:தமிழகத்தில், சென்னை நீங்கலாக உள்ள, 31 மாவட்டங்களில், 12 ஆயிரத்து, 524 கிராம ஊராட்சிகள் உள்ளன. இவற்றில், ஐந்திற்கும் குறைவான குக்கிராமங்களைக் கொண்ட ஊராட்சிகள், 6,241; 5 முதல் 15 வரை, 5,434; 16 முதல் 25 வரை, 637; 25க்கும் மேல், 212 ஊராட்சிகள் உள்ளன.- ம.அறம்வளர்த்தநாதன் -

தினமலர்

நல்ல திட்டம். வரவேற்கிறேன்.

தமிழக முதல்வருக்கு வாழ்த்துக்கள்.