மின் கட்டண உயர்வு ஏப்ரல் மாதம் முதல் அமலுக்கு வரும்

by **சிவா** Wed Dec 21, 2011 10:12 am

மின் கட்டண உயர்வு ஏப்ரல் மாதம் முதல் அமலுக்கு வரும் என்று மின்சார ஒழுங்குமுறை ஆணைய தலைவர் எஸ்.கபிலன் கூறினார்.

புதிய மின் கட்டணம்

மின் உற்பத்தி மற்றும் பகிர்மான கழகம் (மின்வாரியம்) கடந்த 2003-ம் ஆண்டு மின் கட்டணத்தை உயர்த்தியது. அதன் பின்னர் 2010-ம் ஆண்டு ஒரு சில பிரிவினருக்கு மட்டும் சிறிதளவு மின் கட்டணம் உயர்த்தப்பட்டது. இதனால் மின்வாரியம் கடன் சுமை காரணமாக மின் கட்டணத்தை உயர்த்துவதற்காக மின்சார ஒழுங்குமுறை ஆணையத்திடம் புதிய மின் கட்டண விவரத்தை அளித்துள்ளது.

இந்த மின் கட்டண விவரம் இந்த மாதம் 2-ந் தேதி வெளியிடப்பட்டது. இந்த மின்கட்டண உயர்வு எப்போது முதல் அமலுக்கு வரும் என்பது குறித்து மின்சார ஒழுங்குமுறை ஆணைய தலைவர் எஸ்.கபிலனிடம் கேட்டபோது அவர் கூறியதாவது:-

கருத்து கேட்பு கூட்டம்

மின் உற்பத்தி மற்றும் பகிர்மான கழகம் மின் கட்டணத்தை மாற்றி அமைப்பதற்கான மனுவை தாக்கல் செய்துள்ளது. இந்த உத்தேச புதிய கட்டண விவரம் ஏற்கனவே வெளியிடப்பட்டுள்ளது. இது தொடர்பான மக்கள் கருத்துகளை கேட்டு வருகிறோம். ஜனவரி மாதம் வரை மக்கள் தங்கள் கருத்துகளை தெரிவிக்கலாம்.

அதன் பின்னர் பொதுமக்களுக்கு மேலும் ஒரு வாய்ப்பாக பிப்ரவரி மாதம் பல்வேறு நகரங்களில் பொது இடங்களில் கருத்து கேட்பு கூட்டங்கள் நடத்தப்படும். பொதுமக்களின் கருத்துகள், மின் வாரியத்தின் கடன் சுமை ஆகியவற்றை கருத்தில் கொண்டும் மின் கட்டணம் நிர்ணயம் செய்யப்படும். புதிய கட்டணம் அறிவிக்கப்படுவதற்கு முன்பு மாநில ஆலோசனை குழுவினையும் கலந்து ஆலோசிப்போம்.

ஏப்ரல் மாதம் அமல்

இந்த நடைமுறைகள் மார்ச் மாத இறுதியில் முடிவடையும். எனவே ஏப்ரல் மாதம் முதல் புதிய மின் கட்டண உயர்வு அமலுக்கு வரும்.

இவ்வாறு எஸ்.கபிலன் கூறினார்.

தினதந்தி