முல்லைப்பெரியாறு, கூடங்குளம் அணுமின் நிலைய பிரச்சினை - ஜெயலலிதா அவசர ஆலோசனை

முல்லைப்பெரியாறு அணை மற்றும் கூடங்குளம் அணுமின் நிலைய பிரச்சினைகள் தொடர்பாக போராட்டங்கள் நடைபெற்று வருவதால், சட்டம்-ஒழுங்கு நிலைமை குறித்து முதல்-அமைச்சர் ஜெயலலிதா அவசர ஆலோசனை மேற்கொண்டார்.

முல்லைப்பெரியாறு அணைக்கு பதிலாக புதிய அணையை கட்டியே தீருவோம் என்பதில் கேரள அரசு உறுதியாக இருப்பதால், இதுதொடர்பான பிரச்சினையின் வேகம் தமிழ்நாடு மற்றும் கேரள மாநிலத்துக்கு இடையே நாளுக்கு நாள் அதிகரித்து வருகிறது.

கேரளாவிற்கு செல்லும் தமிழக அய்யப்ப பக்தர்கள் தாக்கப்படுகின்றனர். அந்த மாநிலத்தில் ஓடும் தமிழ்நாடு அரசு விரைவு பேருந்துகளை கல்வீசி தாக்குகிறார்கள்.

கடைகள், நிதி நிறுவனங்கள் மீது தாக்குதல்

கொலைவெறியுடன் நடைபெறும் தாக்குதலை சமாளிக்க முடியாமல் அங்கு வசிக்கும் தமிழர்கள் அங்கிருந்து வெளியேறி தேனி போன்ற எல்லையோர மாவட்டங்களில் தஞ்சமடைந்து வருகின்றனர்.

இதன்காரணமாக தமிழ்நாட்டில் அங்கொன்றும், இங்கொன்றுமாக கேரளத்தினர் நடத்தும் கடைகள், ஓட்டல்கள், நிதி நிறுவனங்கள் மீது தாக்குதல் சம்பவங்கள் நடப்பதாக தகவல்கள் வருகின்றன.

தொடரும் போராட்டம்

முல்லைப்பெரியாறு அணை பிரச்சினையால் தேனி உள்ளிட்ட 5 மாவட்டங்களை சேர்ந்த மக்கள் கொதிப்படைந்துள்ளனர்.

அவர்கள் கம்பம் பகுதியில் 13 நாட்களுக்கும் மேலாக பல்வேறு போராட்டங்களை நடத்தி வருகிறார்கள். கண்டன பேரணியும் நடத்தப்பட்டது. கேரள முதல்-மந்திரி உம்மன்சாண்டியின் உருவ பொம்மை ஆங்காங்கே எரிக்கப்படுகிறது.

முல்லைப்பெரியாறு அணை பிரச்சினையில் கேரள அரசின் போக்கினை கண்டித்து தமிழகத்தில் பல்வேறு அமைப்பினர் உண்ணாவிரத போராட்டம் நடத்துகின்றனர். கடையடைப்பு போராட்டமும் நடத்தப்படுகிறது. வக்கீல்கள் கோர்ட்டுகளை புறக்கணித்து போராடுகின்றனர். தமிழகத்தில் அனைத்து தரப்பு மக்களும் ஏதாவது போராட்டத்தை நடத்தி கொண்டுதான் இருக்கிறார்கள்.

ஜெயலலிதா வேண்டுகோள்

முல்லைப் பெரியாறு போராட்டம் காரணமாக அய்யப்ப பக்தர்கள் பலரும் சபரிமலைக்கு செல்ல முடியாமல், தமிழ்நாட்டில் ஆங்காங்கே உள்ள அய்யப்பன் கோவில்களிலேயே விரதத்தை முடித்துக் கொள்கிறார்கள்.

இருமாநிலங்களிலும் இயல்பு நிலை இப்போதைக்கு திரும்புவதாக தெரியவில்லை. இதற்கிடையே, கேரளத்தில் அரசியல் கட்சிகள் போராட்டம் நடத்த வேண்டாம் என்று பிரதமர் மன்மோகன்சிங் கேட்டுக்கொண்டார். அதனால், போராட்டத்தின் வேகம் குறைக்கப்பட்டாலும், போராட்டம் தொடரும் என்று அங்குள்ள அரசியல் கட்சிகள் தெரிவித்துள்ளன.

அதேநேரத்தில், முல்லைப்பெரியாறு அணை பிரச்சினையில் பிரிவினை சக்திகளுக்கு கேரள மக்கள் இடம் கொடுக்க வேண்டாம் என்றும், இந்த விஷயத்தில் விஞ்ஞானப்பூர்வமாகவும், சட்டரீதியாகவும் தீர்வு காண்பதற்கு தமிழக மக்கள் ஒத்துழைப்பு தர வேண்டும் என்றும் முதல்-அமைச்சர் ஜெயலலிதா வேண்டுகோள் விடுத்துள்ளார்.

இருந்தபோதிலும், எல்லைப்பகுதியில் மக்கள் இன்னமும் எழுச்சியுடன் போராடி வருகிறார்கள்.

சட்டம்-ஒழுங்கு நிலை

நெல்லை மாவட்டம் கூடங்குளத்தில் அமைக்கப்பட்டுள்ள அணுமின் நிலையம் ஒரு சில வாரங்களில் செயல்பட தொடங்கும் என்று பிரதமர் மன்மோகன்சிங் அறிவித்து இருப்பதை எதிர்த்து தங்கள் போராட்டத்தை தீவிரப்படுத்த அணுமின் நிலைய எதிர்ப்பாளர்கள் தீர்மானித்து இருக்கிறார்கள்.

இந்த நிலையில், மாநிலத்தின் சட்டம்-ஒழுங்கு நிலைமை குறித்து முதல்-அமைச்சர் ஜெயலலிதா நேற்று தலைமை செயலகத்தில் மூத்த ஐ.ஏ.எஸ்., ஐ.பி.எஸ். அதிகாரிகளுடன் அவசர ஆலோசனை நடத்தினார்.

இந்த ஆலோசனை கூட்டத்தில் உள்துறை செயலாளர் ரமேஷ்ராம் மிஸ்ரா, போலீஸ் டி.ஜி.பி. ராமானுஜம், கூடுதல் டி.ஜி.பி. (சட்டம்-ஒழுங்கு) ஜார்ஜ், புலனாய்வுத்துறை ஐ.ஜி. தாமரைக்கண்ணன் உள்ளிட்ட அதிகாரிகள் பங்கேற்றனர்.

மின்சார நிலைமை

தமிழகத்தின் மின்சார நிலைமை குறித்தும் மின்துறை உயர் அதிகாரிகளுடன் முதல்-அமைச்சர் ஜெயலலிதா ஆலோசனை மேற்கொண்டார்.

தினதந்தி

தமிழகத்தில் இன்று பெரும் பிரச்சினைகள் இவை இரண்டும். முதல்வர் இவ்விரண்டு பிரச்சினைகளை முடிவுக்கு கொண்டுவருதல் மிக அவசியம்.