விவசாயிகளின் இலவச மின்சாரத்துக்கும் ஆப்பு வைக்கிறது தமிழக அரசு

by **இளமாறன்** Mon Dec 12, 2011 12:09 pm

விவசாயிகளின் இலவச மின்சாரத்துக்கும் ஆப்பு வைக்கிறது தமிழக அரசு

தமிழகத்தில் விவசாயத்துக்கு இலவசமாக வழங்கப்பட்டு வந்த மின்சாரத்துக்கும் இப்போது தமிழக அரசு கட்டணம் விதிக்கத் துவங்கியுள்ளது.

மிகப்பெரிய பொருளாதார இழப்பை சந்தித்து வரும் தமிழ்நாடு மின்சாரவாரியம் தனது துறையின் இழப்பை சரிகட்ட பல்வேறு நடவடிக்கைகளை எடுத்து வருகிறது. அதில் ஒரு கட்டமாக விவசாய நிலங்களில் இரண்டுக்கும் மேற்பட்ட மாடுகள், மற்றும் ஆடுகளை வைத்து அவற்றிக்கு கிணற்றிலிருந்து தண்ணீர் எடுத்து பராமரித்து வரும் இடங்களை கணக்கிட்டு அந்த இடங்களில் மின் மீட்டர்களை பொருத்தி விவசாயிகளின் தோட்டங்களை பண்ணை என்று கணக்கிட்டு மின் அளவீட்டு மீட்டர்களில் காட்டப்படும் யூனிட்டுகளுக்கு 3.50 வீதமும் கணக்கிட்டு வருகிறார்கள்.

அதே போல வீட்டு மின் இணைப்பிலிருந்து தண்ணீர் எடுத்து கால்நடைகளுக்கு பயன்படுத்தும் வீடுகளுக்கும் இதே அளவில் மின் கட்டணம் கணக்கிட்டு வீட்டு மின் இணைப்புகளை வணிக இணைப்புகளாக மாற்றிவருகிறார்கள் என்று 10.12.2011 அட்னறு ஈரோடு மாவட்ட விவசாயிகள் குறை தீர்க்கும் நாள் கூட்டத்தில் விவசாயிகள் புகார் தெரிவித்தார்கள்.

கால்நடைகளை வைத்து பால் கறந்து விற்பனை செய்வதை பண்ணை என்று மாற்றி வருகிறார்கள் அதிகாரிகள். நாங்கள் மாடு வைத்து பால் கறக்க கூடாதா...? என்று மாவட்ட ஆட்சியர் சண்முகத்திடம் விவசாயிகள் கேட்டார்கள்.

இதை தொடர்ந்து பண்ணை என்பதற்கு என்ன வரைமுறைகள் உள்ளது...? என்னமாதிரி தொழில் செய்தால் பண்ணை என்று கணக்கிடலாம், எத்தனை மாடுகள் வைத்திருந்தால் அதை பண்ணை என்று கணக்கிடலாம் என்பதை அளவீடு செய்து மின்சாரவாரியத்துக்கு தெரியப்படுத்துங்கள் என்று அதிகாரிகளிடம் கூறினார் மாவட்ட ஆட்சியர் சண்முகம்.

இதற்கு பதிலளித்த கால்நடை துறையினர், பண்ணை என்பதற்கு எத்தனை மாடுகள் வைத்திருக்க வேண்டும் என்ற அளவு கிடையாது. ஆனால், கால்நடைகள் மூலம் பால் தயிர், வெண்ணை, மோர், நெய், பால்கோவா, மற்றும் மதிப்பு கூட்டப்பட்ட பொருட்களாக மாற்றி விற்பனை செய்யும் இடங்களை பண்ணை என்று கணக்கிடலாம், பெரும்பாலான விவசாயிகள் மாடுகளில் கறக்கப்படும் பாலை மட்டுமே விற்பனை செய்கிறார்கள், சாணத்தை தங்கள் வயல்களுக்கு உரமாக பயன்படுத்துகிறார்கள் இதை பண்ணை என்று கணக்கிட்டால் விவசாயிகள் பாதிக்கப்படுவார்கள் என்றனர்.

இதற்கு பதிலளித்த மின்சாரவாரிய அதிகாரிகள், சில விவசாயிகள் கால்நடைகளை தங்கள் விவசாயத்துக்கு பயன்படுத்துகிறார்கள், அதில் கூடுதலாக கிடைக்கும் பாலை தங்கள் வீட்டு பயன்படுத்திக்கொண்டு மீதியாகும் பாலை விற்பனை செய்கிறார்கள், ஆனால், பெரும்பாலானவர்கள் மாடுகளை வைத்து பால் கறந்து அதை விற்பனை செய்வதையே பிரதான தொழிலாக வைத்துக்கொண்டு, விவசாயத்த பெயரளவில் செய்து வருகிறார்கள் அப்படிப்பட்ட இடங்களை கண்டறிந்து அவர்களை மட்டுமே பண்ணை என்று கணக்கிடுகிறோம் என்று பதிலளித்தனர்.

விவசாய மின் இணைப்பிலிருந்து வீட்டுக்கு மின்சாரம் எடுப்பது, கிணற்றில் இருந்து தண்ணீர் எடுத்து விற்பனை செய்வது, மின்சாரம் திருடுவது போன்ற தவறு செய்வபவர்கள் மீது நடவடிக்கை எடுக்கலாம்... ஆனால், கால்நடை வைத்து பராமரித்து வரும் விவசாயிகளின் மின் கட்டணத்தை விதிப்பது நிறுத்த வேண்டும் என்று விவசாயிகள் கருத்து தெரிவித்தனர்.

இந்த ஆட்சியின் அடுத்த ஆப்பு பாவம் விவசாயிகளுக்கு தானா...?

நக்கீரன்