மவுனம் நல்லதுதான்!

by ரேவதி Tue Dec 06, 2011 10:51 am

* பார்வையால்
சிரிக்கிறாய்...
மவுனத்தால்
முறைக்கிறாய்!

* நீ என்னை
விரும்புகிறாயா,
வெறுக்கிறாயா என்பது
மில்லியன் டாலர்
கேள்வியாகவே இருக்கிறது!

* தேளுக்கு விஷம் போல
உனக்கு மவுனம்...

* மவுனம் எனும்
மின்சார வேலிக்கு
உள்ளே நீ
பத்திரமாக இருக்கிறாய்!

* உன் மவுன மொட்டுகள்
எப்போது
வார்த்தை பூக்களாக
மாறும்?

* என் ஆசைகள் பஞ்சுப்பொதி
உன் மவுனம் தீப்பொறி!

* சொற்களை
மவுனத்துக்குள்ளும்,
காதலை மனதுக்குள்ளும்
ஏன் மறைத்தே வைக்கிறாய்?

* உன் மவுனக்கடலில்
என் காதல்
பனிப்பாறை போல்
மிதக்கிறது!

* உன் மவுனம் எனும்
சிலந்தி வலையில்
என் காதல் பூச்சி
அடிக்கடி மாட்டிக் கொள்கிறது!

* வெறுப்பையும்,
மறுப்பையும் விட
மவுனம்
நல்லதுதான்!

* எனினும்
நல்ல பதில்
கிடைக்குமென்று
நானும்
காத்திருக்கிறேன்
மவுனமாக!

— எம்.ஸ்ரீராம், சென்னை.