அத்வானி ரத யாத்திரை பாதையில் `பைப்' வெடிகுண்டு: போலீஸ் பக்ருதீன் அண்ணன் சிக்கினார்

திருமங்கலம் அருகே அத்வானி செல்ல இருந்த பாதையில் கண்டுபிடிக்கப்பட்ட பைப் வெடிகுண்டு சம்பவத்தில் மூளையாக செயல்பட்ட போலீஸ் பக்ருதீன் அண்ணன் நேற்றிரவு பிடிபட்டார்.

அத்வானிக்கு குறி

பாரதீய ஜனதா தலைவர் அத்வானியை குறி வைத்தும் அவரது விழிப்புணர்வு யாத்திரையை சீர்குலைக்கும் வகையிலும் மதுரையில் இருந்து அவர் செல்ல இருந்த பாதையில் திருமங்கலத்தை அடுத்த ஆலம்பட்டி பாலத்தில் பைப் வெடிகுண்டு வைக்கப்பட்டது தொடர்பாக, சி.பி.சி.ஐ.டி. சிறப்பு புலனாய்வு பிரிவினர் தீவிர விசாரணை நடத்தி, மதுரை நெல்பேட்டையை சேர்ந்த சிக்கந்தர் பாஷா என்பவருடைய மகன் அப்துல்ரகுமான் என்ற அப்துல்லா (வயது 26), சிம்மக்கல் பகுதியைச் சேர்ந்த காஜா உசேன் என்பவருடைய மகன் இஸ்மத் (22) ஆகிய இருவரையும் கைது செய்தனர். இவர்களை போலீஸ் காவலில் எடுத்து விசாரித்து வருகிறார்கள்.

இந்த பயங்கர சம்பவத்தில் மதுரை நெல்பேட்டையை சேர்ந்த போலீஸ் பக்ருதீன், அவருடைய அண்ணன் தர்வீஸ் மைதீன் ஆகியோருக்கும் தொடர்பு இருப்பதாக விசாரணையில் தெரியவந்தது. இதையொட்டி அவர்களை போலீசார் தீவிரமாக தேடி வந்தனர். இவர்களில் தர்வீஸ் மைதீனை பிடித்து போலீசார் விசாரித்து வருவதாக நேற்றிரவு தகவல்கள் வெளியாயின. அவர் கைது செய்யப்பட்டாரா என்பதை உறுதிப்படுத்த போலீசார் மறுத்து விட்டனர்.

மூளையாக செயல்பட்ட முக்கிய குற்றவாளி

தர்வீஸ் மைதீன் மீது வெடிகுண்டு தயாரித்தது, சதிவேலைகளில் ஈடுபட்டது உள்பட பல்வேறு வழக்குகள் உள்ளன. தற்போது அத்வானி செல்ல இருந்த பாதையில் பைப் குண்டு வைத்து வெடிக்கச் செய்ய சதிவேலையில் ஈடுபட்டதும் தெரியவந்துள்ளது.

இந்த வெடிகுண்டை தயாரிக்க தர்வீஸ் மைதீன் உடந்தையாக இருந்ததாகவும், குண்டு தயாரிக்க தேவையான வெடிமருந்து உள்ளிட்ட பொருட்களை வாங்கி கொடுத்து மூளையாக செயல்பட்டிருப்பதாகவும் சிறப்பு புலனாய்வு பிரிவு போலீசார் விசாரணையில் தெரியவந்துள்ளது. தொடர்ந்து அவரிடம் போலீசார் விசாரித்து வருகிறார்கள்.

தினதந்தி

என்னது போலீஸ்காரரே இந்த வேலையை செய்துருக்கிறாரா

வேலியே பயிரை மேய்கிறது!!!