"வால் ஸ்ட்ரீட்' போராட்டம் துவங்கி ஒரு மாதம் நிறைவு: நிதியுதவி குவிகிறது : லண்டனில் மூன்றாவது நாளாக

by **இளமாறன்** Tue Oct 18, 2011 12:47 am

நியூயார்க்: அமெரிக்காவின் "வால் ஸ்ட்ரீட் ஆக்கிரமிப்பு' போராட்டம் துவங்கி நேற்றோடு ஒரு மாதம் நிறைவாகியுள்ளது. போராட்டத்திற்கான நிதியுதவி தற்போது மூன்று லட்சம் டாலராக அதிகரித்துள்ளது. இந்நிலையில், லண்டனில் "லண்டன் ஆக்கிரமிப்பு' போராட்டம் மூன்றாவது நாளாக நேற்றும் தொடர்ந்தது. அமெரிக்காவின் நியூயார்க் நகரில், கடந்த செப்டம்பர் 17ம் தேதி மன்ஹாட்டன் பகுதியில், வால் ஸ்ட்ரீட் என்ற இடத்தில் நடந்த, 1,000 பேர் மட்டும் பங்கேற்ற சிறு போராட்டம், இன்று உலகளவில் தீப்பிடித்தது போல பரவி வருகிறது.

மூன்று லட்சம் டாலர்: வால் ஸ்ட்ரீட் போராட்டம் நேற்றுடன் ஒரு மாதத்தை எட்டியுள்ள நிலையில், அதற்கான நிதியுதவி மற்றும் பொருளுதவிகள் குவிந்து கொண்டே வருகின்றன. இதுவரை "ஆக்குபை வால் ஸ்ட்ரீட்' அமைப்பிற்கு மூன்று லட்சம் டாலர் நிதியுதவி வந்துள்ளது. இந்தப் பணம் அனைத்தும், அமெரிக்காவின் மிகப் பழமையான வங்கியான "அமல்கமேட்டட் வங்கியில்' போடப்பட்டுள்ளது. இந்த வங்கி, அமெரிக்கத் தொழிலாளர் அமைப்பால் நடத்தப்படுகிறது என்பது குறிப்பிடத் தக்கது.

பொருளுதவி குவிகிறது: நியூயார்க்கின் ஜூகோட்டி பூங்காவில் தற்போது நூற்றுக்கணக்கான ஆர்ப்பாட்டக்காரர்கள் தங்கியுள்ளனர். இவர்களுக்கான உணவு, படுக்கைகள், மருந்துப் பெட்டிகள், தண்ணீர் பாட்டில்கள், உள்ளிட்ட அத்தியாவசியத் தேவைகளுக்கான பொருட்கள் அனைத்தும், தினசரி பெட்டி பெட்டியாக வந்து குவிகின்றன.
இந்தப் பொருட்கள் அனைத்தையும் வைப்பதற்கு வசதியாக, பூங்கா அருகில் உள்ள ஐக்கிய ஆசிரியர்கள் சங்கம் என்ற அமைப்பு, தங்கள் கட்டடத்தின் கீழ் தளத்தை அளித்துள்ளது. இந்தப் பொருட்கள் அனைத்தும், போராட்டம் நீண்ட நாட்கள் நடப்பதற்கு உதவும் என, ஒருங்கிணைப்பாளர்கள் தெரிவித்துள்ளனர்.

மார்ட்டின் லூதர் கிங் இருந்திருந்தால்...: இதற்கிடையில், வாஷிங்டனில் நடந்த மார்ட்டின் லூதர் கிங் ஜூனியர் சிலை திறப்பு விழாவில் கலந்து கொண்ட அதிபர் பராக் ஒபாமா பேசுகையில், "இன்று மார்ட்டின் லூதர் கிங் இருந்திருப்பாரானால், வால் ஸ்ட்ரீட்டின் செயல்பாடுகளுக்கு குந்தகம் நேராமல், வேலையில்லாதோர் அதன் வரம்பு மீறல் போக்கை எதிர்கொள்ள வேண்டும் என கூறியிருப்பார்' என்று தெரிவித்தார்.

லண்டனில் மூன்றாவது நாளாக... : இந்நிலையில், பிரிட்டன் தலைநகர் லண்டனில் உள்ள புனித பால் கதீட்ரல் முன்பு நேற்று மூன்றாவது நாளாக "லண்டன் ஆக்கிரமிப்பு' இயக்கத்தினர் தங்கள் ஆர்ப்பாட்டங்களைத் தொடர்ந்தனர்.
கடந்த 15ம் தேதி இதே இடத்தில் ஆயிரக்கணக்கானோர் கூடி நடத்திய ஆர்ப்பாட்டத்திற்குப் பின், 200க்கும் அதிகமானோர் அங்கு கூடாரங்கள் அமைத்து தங்கிவிட்டனர். அவர்களின் ஆர்ப்பாட்டம் அமைதியான முறையில் நடப்பதாலும், கதீட்ரலின் அன்றாட நடவடிக்கைகளுக்கு அவர்கள் இடையூறு செய்யாததாலும், கதீட்ரல் நிர்வாகம் இதை அனுமதித்துள்ளது.

தினமலர்