டி.என்.பி.எஸ்.சி. தலைவர், உறுப்பினர் வீடுகளில் லஞ்ச ஒழிப்பு போலீஸ் சோதனை

சென்னை, அக். 14: தமிழ்நாடு அரசுப் பணியாளர் தேர்வாணையத் தலைவர் ஆர். செல்லமுத்து மற்றும் 13 உறுப்பினர்களின் சென்னை வீடுகளில் லஞ்ச ஒழிப்புப் போலீஸார் வெள்ளிக்கிழமை திடீர் சோதனை நடத்தினர்.

இந்தச் சோதனை காலை முதல் மாலை வரை சுமார் 9 மணி நேரம் நீடித்தது. லஞ்ச ஒழிப்புப் பிரிவு டி.எஸ்.பி. நடராஜ் தலைமையில் 50-க்கும் மேற்பட்ட போலீஸôர் இந்தச் சோதனையில் ஈடுபட்டனர்.

தமிழ்நாடு அரசுப் பணியாளர் தேர்வாணையத்தின் 80 ஆண்டுகளில் இதுபோன்ற சோதனைகள் நடத்தப்பட்டதில்லை என தேர்வாணைய வட்டாரங்கள் கூறுகின்றன.

÷வீடுகளில் நடத்தப்பட்ட சோதனைகளைத் தொடர்ந்து, உறுப்பினர்கள் ஜி. செல்வமணி, வி. ரத்தினசபாபதி, எம். ராமசாமி, டி. சங்கரலிங்கம், எம். ஷோபினி, டி. குப்புசாமி, எஸ். பன்னீர்செல்வம், ஜி. சண்முகமுருகன், கே.எம். ரவி, கே. லட்சுமணன் ஆகியோர் டி.என்.பி.எஸ்.சி. அலுவலகத்துக்கு மாலையில் வரவழைக்கப்பட்டு அவர்களிடம் விசாரணை நடத்தப்பட்டது.

உதவி பல் மருத்துவர் பணி, மோட்டார் வாகன ஆய்வாளர்கள், குரூப் 1 தேர்வு ஆகியவற்றில் முறைகேடுகள் நடந்ததாக எழுந்த புகார்களைத் தொடர்ந்தே இந்தச் சோதனை நடத்தப்பட்டதாக லஞ்ச ஒழிப்புப் போலீஸார் தெரிவித்துள்ளனர்.

÷அதிமுக ஆட்சிப் பொறுப்பேற்றதும் தமிழ்நாடு அரசுப் பணியாளர் தேர்வாணையத்தில் பல்வேறு சீர்திருத்தங்கள் கொண்டு வர முயற்சிகள் மேற்கொள்ளப்பட்டன. முதலில், தேர்வாணையத்தின் செயலாளர் மாற்றப்பட்டார். அரசுத் துறைகளில் சிறப்பாக பணியாற்றிய உதயசந்திரன் ஐ.ஏ.எஸ். செயலாளராக நியமிக்கப்பட்டார். அவர் பொறுப்பேற்ற நேரத்தில் குரூப் 1 தேர்வு முடிவுகள் வெளியிடத் தயாராக இருந்தன.

÷இந்த முடிவுகள் குறித்த விவரங்களையும், ஏற்கெனவே நடத்தப்பட்ட தேர்வுகளின் முடிவுகளையும் பார்க்க விரும்புவதாக அவர் தெரிவித்தார். அதுகுறித்த ஆவணங்களையும், கோப்புகளையும் தருமாறு அரசுப் பணியாளர் தேர்வாணைய தலைவர் மற்றும் உறுப்பினர்களிடம் கோரினார். இதற்கு அவர்கள் மறுப்புத் தெரிவித்தனர்.

இந்தச் சம்பவங்களின் எதிரொலியாகவும், தேர்வாணையம் நடத்திய இதர தேர்வுகளில் முறைகேடுகள் நடைபெற்றிருக்கிறதா? என்பதை அறியவும் தேர்வாணையத்தின் தலைவர் மற்றும் உறுப்பினர்கள் லஞ்ச ஒழிப்புப் போலீஸôரின் வரம்புக்குள் கொண்டு வரப்பட்டனர்.

காலை முதல் சோதனை: தலைவர், 13 உறுப்பினர்கள் என அரசுப் பணியாளர் தேர்வாணையத்தில் மொத்தம் 14 பேர் உள்ளனர். லஞ்ச ஒழிப்புப் போலீஸôரின் விசாரணை வரம்புக்குள் வந்துவிட்டதால், எந்த நேரத்திலும் தங்களது வீடுகளில் சோதனை நடைபெறலாம் என்பதை அவர்கள் அறிந்தே இருந்தனர்.

÷இந்த நிலையில், சென்னை பாடியில் உள்ள தேர்வாணையத் தலைவர் ஆர். செல்லமுத்துவின் வீடு மற்றும் நகரின் முக்கிய பகுதிகளில் உள்ள உறுப்பினர்களின் வீடுகளில் வெள்ளிக்கிழமை காலை 7 மணி முதல் லஞ்ச ஒழிப்புப் போலீஸôர் சோதனை நடத்தினர். சுமார் நூறுக்கும் மேற்பட்ட போலீஸôர் தனித்தனி குழுக்களாக சோதனையில் ஈடுபட்டனர்.

அலுவலகத்தில் திடீர் சோதனை: தலைவர் மற்றும் உறுப்பினர்களின் வீடுகளில் சோதனை நடைபெற்றுக் கொண்டிருந்தபோது, சென்னை கிரீம்ஸ் சாலையில் உள்ள அரசுப் பணியாளர் தேர்வாணைய அலுவலகத்திலும் திடீர் சோதனை நடத்தப்பட்டது. லஞ்ச ஒழிப்புப் போலீஸ் டி.எஸ்.பி.க்கள் நடராஜன், சரஸ்வதி, வல்ஸ்ராஜா ஆகியோரின் தலைமையில் 100-க்கும் மேற்பட்ட போலீஸார் அலுவலகத்தில் சோதனையில் ஈடுபட்டனர்.

÷தேர்வாணையத் தலைவர், உறுப்பினர்களின் அறைகள், சார்புச் செயலாளர்கள், துணைச் செயலாளர்கள் மற்றும் இணைச் செயலாளர்களின் அறைகளிலும் சோதனை நடத்தப்பட்டது.

÷தலைவர், உறுப்பினர்களிடம் விசாரணை: அரசுப் பணியாளர் தேர்வாணைய அலுவலகத்துக்கு மாலை 4 மணியளவில் வரவழைக்கப்பட்ட உறுப்பினர்கள் செல்வமணி, ரத்தினசபாபதி, ராமசாமி, சங்கரலிங்கம், கே.எம். ராஜா, ஷோபினி ஆகியோரிடம் விசாரணை நடத்தப்பட்டது.

அவர்கள் பயன்படுத்திய கம்ப்யூட்டர்களில் உள்ள விவரங்களைச் சேகரித்த போலீஸôர், அது தொடர்பாக விளக்கம் கேட்டனர். அதற்கு பின், தலைவர் ஆர்.செல்லமுத்து மாலை 6.20 மணியளவில் தேர்வாணைய அலுவலகத்துக்கு வந்தார். அவரிடம் 2 மணி நேரத்துக்கும் மேலாக அதிகாரிகள் விசாரணை நடத்தினர்.

தேர்வுகள் நடத்தப்பட்ட விதம், முடிவுகள், பணி நியமனங்கள் உள்ளிட்ட பல்வேறு விவரங்களை அவரிடம் கேட்டனர் தினமணி