கண்ணாடி

by **சிவா** Thu Sep 24, 2009 12:25 am

தினந்தோறும் நீங்கள் எத்தனை முறை கண்ணாடி பார்க்கிறீர்கள்? கணக்குப் பண்ணிப் பாருங்கள். காலை எழுந்ததும் ஒரு முறை! பல் தேய்த்து முகம் கழுவியதும் ஒரு முறை!

ஷேவ் செய்தவுடன் ஒரு முறை! குளித்து தலை சீவும் போது ஒரு முறை! உடையெல்லாம் மாற்றி பவுடர் போட்டு ஆஃபீஸ் கிளம்பும்போது ஒரு முறை!

அலுவலகத்திலிருந்து கிளம்பும் போது ஒரு முறை! வீடு வந்து முகம் கழுவியவுடன் ஒரு முறை! ராத்திரி படுக்கப் போகும் போது ஒரு முறை. எண்ணிப் பாருங்கள ஒன்பது முறை.
ஒன்பது ஓட்டைகள் கொண்ட உங்கள் உடம்பை தினம் குறைந்தது ஒன்பது முறையாவது பார்க்கிறீர்கள். பார்த்து ரசிக்கிறீர்கள்.

ஏன்?

அழகு, எல்லாம் அழகு.

இன்றைக்கு இருக்கும் உங்கள் முகம், நேற்றைக்கு இருந்ததில்லை. நேற்றைய முகம் நாளைக்கு இருக்கப் போவதில்லை. தலை நரையெடுக்கும். முகம் தொய்வடையும், சுருக்கம் விழும். ஒரு நாள் செத்தும் விழும்.

இருந்தாலும் கண்ணாடி மீது எத்தனை ஆசை?

காரணம் என்ன? பழக்கம்!

ஒரே ஒரு நாள் கண்ணாடி மீது தூசி படிந்திருந்தாலோ, அல்லது கீறல் விழுந்திருந்தாலோ எப்படி துடித்துப் போவீர்கள்! தாம்தூமெனக் குதித்து, உடனடியாய் சரி செய்வீர்கள்.

பழக்கம்!

குட்டிக் கதை ஒன்று சொல்கிறேன்.

ஒரு சமயம் தேவேந்திரன், பூலோகத்தில் பன்றியாகப் பிறந்தான். சராசரி பன்றிகளைப் போல சேற்றிலே புரண்டான். பல குட்டிகளை ஈன்றான். சாக்கடையில் கிடந்தான். தான் இந்திரன் என்பதையே மறந்து பன்னி யாகவே இருந்தான். இருந்தது!

ஒரு சமயம், நாரதர் அந்தப் பக்கம் போனார். அந்தக் காட்சியைப் பார்த்தார். அவர் மனம் பதைபதைத்தது. இந்திரலோகத்தில் நாட்டிய மாதர்கள் நடனம் ஆட, சகலவல்லமையுடனும், சகல சந்தோஷங்களுடனும் இவன் இருந்த இருப்பு என்ன! இன்றை கீழ்த்தரமான நிலை என்ன!

நாரதருக்கு கண்ணீரே வந்து விட்டது.

நேரடியாய் மகாவிஷ்ணுவிடம் போய் முறையிட்டார்.

மகாவிஷ்ணு, புன்னகையுடன் பதில் சொன்னார் இங்கே ஏன் வந்தீர்கள்? இந்திரனிடமே செல்லுங்கள். அவனுக்கு விருப்பம் இருந்தால் தேவலோகத்துக்கு அழைத்துச் செல்லுங்கள் என்றார்.

உடனே நாரதர் ஓடோடி, சாக்கடைக்கு. .. மூக்கைப் பொத்திக் கொண்டே வந்தார்.

பன்றி அப்போது எதைப் பற்றியும் கவலைப்படாமல் மலம் தின்று கொண்டிருந்தது!

நாரதர் பதைபதைப்புடன் அழைத்தார்,"இந்திரா, எழுந்து வா! உன் இந்திரலோகத்துக்குச் செல்லலாம்!"

பன்றி பதில் பேசாமல் தன் பணியிலேயே கவனமாக இருந்தது.

"இந்திரா, உன் இந்திரலோகத்திற்கு வா?"

"தின்று முடித்துவிட்டு பன்றி கேட்டது, அந்த லோகத்தில் என்ன இருக்கிறது?"

நாரதர் வேகவேகமாய்ப் பதில் சொன்னார்,"அறு சுவை உணவுகள், நவரத்ன மணிகள், ரம்பை, ஊர்வசி, மேனகா. .. என்று அது ஒரு சொர்க்கபுரியல்லவா. அதன் தலைவன் நீயல்லவா? அங்கு கிடைக்காத பொருளே இல்லையல்லவா?"

பன்றி அதிருப்தியாய் முகத்தைத் திரும்பி நாரதரைப் பார்த்தது. "மெல்ல உருமி விட்டுக் கேட்டது. எல்லாம் சரி, அங்கே நான் தின்ன மலம் கிடைக்குமா?"

எதற்கு இதைச் சொன்னேன் என்றால் பழக்கம். இந்திரன் கூட பன்றியாக இருந்து பழகிவிட்டதால் அதை விட்டு வர மறுக்கிறான்! பழக்கம்!

உங்களுக்கு நான் சொல்ல வந்தது என்ன?

கண்ணாடி பார்க்காதீர்கள் என்று நான் சொல்லவில்லை. நன்கு பாருங்கள். நிறைய பாருங்கள்.

உங்கள் அழகு முகத்தோடு வேறு ஒன்றையும் அதில் பாருங்கள் என்று தான் சொல்கிறேன்.

காலை எழுந்ததும் உங்கள் முகத்தைக் கண்ணாடியில் பார்க்கும்போது இன்று பூராவும் நான் சந்தோஷமாக இருக்கப் போகிறேன் என்று சொல்லப் பழகுங்கள்.

பல் தேய்த்து, முகம் கழுவிக் கண்ணாடி பார்க்கும்போது, இன்று நான் யாரையும் கோபிக்கமாட்டேன். என்று சொல்லிக் கொள்ளுங்கள்.

ஷேவ் செய்து, கண்ணாடி பார்க்கும்போது இன்றைய கடமைகள் எதையும் பென்டிங் வைக்காமல் முடிக்கப் போகிறேன் என்று முடிவெடுத்துக் கொள்ளுங்கள்.

குளித்துவிட்டு கண்ணாடி முன் நின்று தலை சீவும்போது, இன்று நான் தன்னம்பிக்கையுடன் இருப்பேன் என்று சொல்லிக் கொள்ளுங்கள்.

அலுவலகம் கிளம்பும்போது, கண்ணாடி முன் ஒத்திகை பார்ப்பீர்களே அப்போது, தொணதொணனெ யாரிடமும் தண்டமாகப் பேசாது, நான் உண்டு என் வேலை உண்டு என்று இருப்பேன் என்று தீர்மானம் செய்யுங்கள்.

அலுவலகத்தில் கண்ணாடி பார்க்கும்போது, நான் வாங்கும் சம்பளத்திற்கு ஒழுங்காக வேலை செய்து கொண்டிருக்கிறேன் என்று புன்முறுவல் பூத்திடுங்கள்.

அலுவலகத்திலிருந்து கிளம்பும் போது இன்று நான் ரொம்ப சந்தோஷமாக இருக்கிறேன் என்று கண்ணாடி பாருங்கள்.

நீங்கள் வேண்டுமானால் பாருங்கள், வீட்டுக்கு வந்தவுடனே, நீங்கள் நிம்மதியாக உணருவீர்கள். அழகாக இருப்பதாகத் தெரிவீர்கள்.

நீங்கள் வேண்டுமானால் பாருங்கள், இரவு தூங்கப் போகும்போது, படுத்த கொ"்ச நேரத்திலேயே ஆழ்ந்த நித்திரைக்குப் போய்விடுவீர்கள்.

நிஜ அழகனாய், நிரந்தர அழகனாய் என்றென்றும் தோற்றமளிக்க இதுதான் வழி! ஒரே வழி.