கனி தரும் மரங்கள்!

by **சிவா** Sat Sep 24, 2011 12:41 am

மனிதப் பிறவி இறைவன் கொடுத்த மாபெரும் கொடையாகும். அதிலும் ஒவ்வொரு தனிமனிதனுக்கும் அவரவர்களின் சிந்தனைக்கும் செயல்பாடுகளுக்கும் ஏற்றவாறு சிறப்புக் கொடைகளை அருளியுள்ளார். அக்கொடைகளை ஏற்று செயலாற்றுகின்ற மனிதன் அதனை உள்வாங்கி இச்சமூகத்துக்கு ஆற்றும் பணியாக மேற்கொள்கின்றபோது அவன் இறைவனுக்கு உகந்தவனாகிறான்.

மேற்கண்ட கருத்துக்களை பறை சாற்றும் விதமாக புனித விவிலியத்தின் புதிய ஏற்பாடு நூலில் இயேசு கிறிஸ்துவின் அடியாரும் தூதருமான தூய சின்னப்பர் என்றழைக்கப்படும் தூய பவுலடியார் இறைவன் அருளிய வார்த்தைகளை பின் வருமாறு கூறுகின்றார்:

""சகோதர சகோதரிகளே, கடவுளுடைய இரக்கத்தை முன்னிட்டு உங்களை வேண்டுகின்றேன். கடவுளுக்கு உகந்த, தூய, உயிருள்ள பலியாக உங்களைப் படையுங்கள். இதுவே நீங்கள் செய்யும் உள்ளார்ந்த வழிபாடு. இந்த உலகத்தின் போக்கின்படி ஒழுகாதீர்கள். மாறாக, உங்கள் உள்ளம் புதுப்பிக்கப்பெற்று மாற்றம் அடைவதாக! அப்போது கடவுளின் திருவுளம் எது எனத் தேர்ந்து தெளிவீர்கள். எது நல்லது, எது உகந்தது, எது நிறைவானது என்பதும் உங்களுக்குத் தெளிவாகத் தெரியும்.

இறையருள் பெற்றவன் என்னும் முறையில் உங்களுள் ஒவ்வொருவருக்கும் நான் கூறுவது, உங்களுள் எவரும் தம்மைக் குறித்து மட்டுமீறி மதிப்புக் கொள்ளலாகாது; அவரவருக்குக் கடவுள் வரையறுத்துக் கொடுத்த நம்பிக்கையின் அளவுக்கேற்ப ஒவ்வொருவரும் தம்மை மதித்துக் கொள்ளட்டும். ஒரே உடலில் நமக்கு உறுப்புகள் பல உள்ளன. அந்த உறுப்புகள் எல்லாம் ஒரே செயலைச் செய்வதில்லை. அதுபோலவே நாம், பலராயிருந்தாலும் கிறிஸ்துவோடு இணைந்திருப்பதால் ஒரே உடலாய் இருக்கிறோம். ஒருவருக்கொருவர் உடனுறுப்புகளாய் இருக்கிறோம்.

ஆயினும் நமக்கு அளிக்கப்பட்டுள்ள அருளுக்கேற்ப வெவ்வேறு அருள் கொடைகளைப் பெற்றுள்ளோம். இறை வாக்குரைக்கும் கொடையை நாம் பெற்றிருந்தால் நாம் கொண்டிருக்கும் நம்பிக்கைக்கு ஏற்றவாறு அதைப் பயன்படுத்த வேண்டும். தொண்டாற்றும் கொடையை நாம் பெற்றிருந்தால் அதைத் தொண்டு புரிவதற்குப் பயன்படுத்த வேண்டும். கற்றுக் கொடுப்போர் கற்றுக் கொடுப்பதிலும், ஊக்கமூட்டுவோர் ஊக்கம் தருவதிலும், தமக்குள்ளதை வழங்குவோர் தாராளமாய்க் கொடுப்பதிலும், தலைமை தாங்குவோர் முழு ஆர்வத்தோடு செயல்படுவதிலும், இரக்கச் செயல்களில் ஈடுபடுவோர் முக மலர்ச்சியோடு அவற்றைச் செய்வதிலும் தாம் பெற்ற அருள் கொடைகளைப் பயன்படுத்த வேண்டும்''(உரோ- 12:1-8)

மேற்கண்ட இறைவார்த்தைகளை நாம் வாசிக்கின்றபோது அவரவரின் செயல்பாடுகளால் அவரவரை நாம் அறிய முடியும் என்பது விளங்குகிறது.

அதை ""கெட்ட கனி தரும் நல்ல மரமுமில்லை; நல்ல கனி தரும் கெட்ட மரமுமில்லை. ஒவ்வொரு மரமும் அதனதன் கனியாலே அறியப்படும். ஏனென்றால் முட்செடிகளில் அத்திப் பழங்களைப் பறிப்பாருமில்லை; முட்புதர்களில் திராட்சைக் குலைகளை அறுத்துச் சேர்ப்பாருமில்லை; நல்லவர் தம் உள்ளமாகிய நல்ல கருவூலத்திலிருந்து நல்லவற்றை எடுத்துக்கொடுப்பர். தீயவரோ தீயதினின்று தீயவற்றை எடுத்துக் கொடுப்பர்'' (லூக்கா- 6:43-45) என்று இறைமகன் இயேசு மிக அழுத்தமாக நமக்குப் பாடம் புகட்டுகிறார்.

மனிதர்களாகிய நாம் அனைவரும் நல்ல கனி தரும் மரங்களாகவே வாழ்வோம்.

வி. ரூஃபஸ்