இனிமேல், விவசாயத்தில் இயந்திரமயம் தான் :(

பொள்ளாச்சி:""வருங்காலத்தில் விவசாயத்தை இயந்திரமயமாக்கினால் தான், விவசாயம் செய்ய முடியும் என்ற நிலை உருவாகி விட்டது,'' என்று வேளாண் பல்கலை துணை வேந்தர் முருகேசபூபதி பேசினார்.பொள்ளாச்சி, வடக்கிபாளையம் ஒழுங்குமுறை விற்பனைக்கூடத்தில், மக்காச்சோளம் வயல்விழா, ஆத்மா திட்டத்தின் கீழ் பருத்தி பண்ணை பயிற்சி நிறைவு விழா, காமதேனு உழவர் மன்ற இரண்டாம் ஆண்டு துவங்க விழா என முப்பெரும் விழா நடந்தது. உழவர் மன்ற தலைவர் ஜெயராமன் வரவேற்றார்.
வேளாண் பல்கலைக்கழக துணைவேந்தர் முருகேசபூபதி பேசியதாவது:விவசாய தொழில்நுட்பத்தை முறையாக கடைபிடிப்பதால் பருத்தி விவசாயிகளுக்கு அதிக லாபம் கிடைக்கும் நிலை உருவாகியுள்ளது.கோவை வேளாண் பல்கலையில் இதுவரை 756 பயிர் ரகங்கள் கண்டுபிடிக்கப்பட்டுள்ளன. விவசாய வேலைகளுக்கு கூலியாட்கள் கிடைப்பதில்லை என்ற குறைபாடு உள்ளது. வருங்காலத்தில் விவசாயத்தை இயந்திரமயமாக்கினால் தான், விவசாயம் செய்ய முடியும் என்ற நிலை உருவாகி விட்டது.

அதனால், 149 புதிய பண்ணை கருவிகள் கண்டுபிடிக்கப்பட்டுள்ளன. நெல் சாகுபடி நூறு சதவீதம் இயந்திரமயமாக்கப்பட்டுள்ளது.கரும்பு, பருத்தி அறுவடைக்கு இயந்திரம் தயாரிக்கும் முயற்சியில் பல்கலை ஆராய்ச்சி படிப்பு மாணவர்கள் ஈடுபட்டுள்ளனர். பல்கலை விரிவாக்க மையம் விவசாயிகளுக்கு தேவையான தொழில்நுட்பங்களை வழங்க வருகிறது.தமிழகத்தில் 56 பயிர் ரகங்களில் மாவுப்பூச்சி தாக்குதல் கண்டறியப்பட்டது. அதை கட்டுப்படுத்த அமெரிக்காவில் இருந்து ஒட்டுண்ணி கொண்டு வரப்பட்டது. விவசாயிகளுக்கு இலவசமாக 12 லட்சம் ஒட்டுண்ணி வழங்கப்பட்டது.

இதன் மூலம் மாவுப்பூச்சி தாக்குதல் கட்டுப்படுத்தப்பட்டது. பல்கலை பணியாளர்கள் 13 சந்தைகளில் காய்கறி விலை நிலவரங்களை தெரிந்து விவசாயிகளுக்கு தெரிவிக்கின்றனர். பல்கலையில் பதிவு செய்துள்ள 40 ஆயிரம் விவசாயிகளுக்கு மொபைல்போன் மூலம் தினமும் எஸ்.எம்.எஸ்., வழியாக விலை நிலவரங்கள் அனுப்பப்படுகின்றன. வேளாண் பல்கலை மற்றும் விவசாயிகள் இணைந்து அமைத்துள்ள மக்காச்சோள செயல்விளக்க திடலில் அதிக மகசூல் கிடைத்துள்ளது. இந்த ரகம் ஆய்வக பரிசோதனை முடிந்து, விவசாயிகளுக்கு வழங்கப்படும். நல்ல விதையையும், தொழில்நுட்பத்தையும் கையாளும் போது எதிர்பார்ப்பதை விட கூடுதல் மகசூல் கிடைக்கும்.இவ்வாறு, அவர் தெரிவித்தார்.

தினமலர்