லோக்பால்:ஹசாரே குழு - அரசு இடையே திடீர் முட்டல்: பிரதமர்- அத்வானி அவசர சந்திப்பு

புதுடில்லி: காந்தியவாதி அன்னா ஹசாரே போராட்டம் ஒரளவுக்கு வெற்றியை நெருங்கி வந்த நேரத்தில் திடீர் பின்னடைவு ஏற்பட்டுள்ளது. ஹசாரே வலியுறுத்திய அம்சங்கள் ஒரளவுக்கு அரசும், எதிர்கட்சியினரும் ஏற்றுக்கொள்ளும் நிலை ஏற்பட்டு வந்தது.

இன்று மாலை அரசு தரப்பில் பிரணாப் முகர்ஜி அரசு எடுத்து வரும் நிலைகளை விளக்கி ஹசாரே போராட்டத்தை கைவிட கோரிக்கை விடுவார் என்றும் டில்லி வட்டாரம் தெரிவித்தன. ஆனால் ஹசாரே குழுவினர் அமைச்சர் சல்மான் குர்ஷீத்தை சந்தித்த பின்னர் அரசு ஓட்டெடுப்புக்கு மறுத்து வருகிறது. இதனால் எங்களுக்கு திருப்தி இல்லை என ஹசாரே குழுவில் இடம் பெற்றுள்ள பிரசாந்த் பூஷண் நிருபர்களிடம் தெரிவித்தார். மாலை 6 மணியளவில் ஹசாரே தனது போராட்டத்தை முடித்துக்கொள்வார் என எதிர்பார்க்கப்பட்டது ஏமாற்றத்தில் முடிந்தது.

ஜன்லோக்பால் வலியுறுத்தி கடந்த 16 ம் தேதி முதல் உண்ணாவிரத போராட்டத்தை துவக்கினார் ஹசாரே. இன்றுடன் 12 நாடகள் அவர் உணவு எதுவும் எடுத்துக்கொள்ளாததால் உடல்நிலை பாதிக்கப்பட்டுள்ளன என டாக்டர்கள் குழுவினர் கவலை தெரிவித்திருந்தனர். மேலும் கூடுதல் டாக்டர்கள் தொடர்ந்து கண்காணித்து வருகின்றனர்.

இந்நிலையில் ஹசாரே விதித்த 3 நிபந்தனைகளில் ஒன்றான பார்லி.,யில் மசோதா மீதான விவாதம் இன்று காலையில் துவங்கியது. மத்திய அமைச்சர் பிரணாப்முகர்ஜி , பா.ஜ., வை சேர்ந்த சுஷ்மாசுவராஜ், அருண்ஜெட்லி, ஐக்கிய ஜனதாதளம் சரத்யாதவ், தி.மு.க,வை சேர்ந்த இளங்கோவன் உள்ளிட்டவர்கள் தங்களுடைய வாதங்களை எடுத்துரைத்தனர்.

விவாதத்தின் முடிவில் ஹசாரே பரிந்துரைத்த கருத்துக்கள் அடங்கிய மசோதாவை நிறைவேற்ற அரசு தயாராகி வருகிறது. மேலும் ஆளும் ஐக்கிய முற்போக்கு கூட்டணி மற்றும் பா.ஜ., தலைமையிலான தேசிய ஜனநாயக கூட்டணி இடையே கருத்தொற்றுமை ஏற்பட்டுள்ளது. இதுவே ஹசாரேவுக்கு பெரும் வெற்றியாக கருதப்பட்டது.

சல்மான் குர்ஷீத்துடன் ஹசாரே குழுவினர் சந்திப்பு: இதற்கிடையில் மாலை 3 மணியளவில் திடீர் பின்னடைவு ஏற்பட்டது. இன்று விவாதம் நடந்து கொண்டிருக்கும்போதே சட்ட அமைச்சர் சல்மான்குர்ஷித் வீட்டில் , ஹசாரே குழுவில் இடம்பெற்றுள்ள பூஷண், அரவிந்த்கெர்ஜிவால், மணீஷ் சிசோடியா , மேதாபட்கர், ஆகியோர் சந்தித்து பேசினர். சல்மான் குர்ஷித் பிரதமரை சந்தித்து பேசினார். ஐக்கிய முற்போக்கு கூட்டணியில் இடம்பெற்றுள்ள அரசியல் தலைவர்கள் பிரணாப்பை சந்தித்து பேசினர்.

சந்திப்புக்கு பின்னர் நிருபர்களிடம் பேசிய பிரசாந்த்பூஷண், அரசு ஓட்டெடுப்பு நடத்த மறுத்து வருகிறது. ஓட்டெடுப்போ அல்லது தீர்மானமோ நிறைவேற்றப்படும் என அரசு தரப்பில் உறுதியளிக்கவில்லை. இது இல்லாத பட்சத்தில் இது அர்த்தமற்றதாகி விடும். இது ஏன் என்று எங்களுக்கு புரியவில்லை. ஹசாரே பிரதமருக்கு எழுதிய கடிதத்திற்கு உரிய பிரதிபலன் இல்லை. என்றார். பார்லி.,யின் நிலை என்ன என்பதை மக்கள் அறிய ஆர்வமாக உள்ளனர் என்றார்.

அரசு தொடர்ந்து ஏமாற்றுகிறது: ஹசாரே குழுவில் உள்ள அரவிந்த் கெஜ்ரிவால் நிருபர்களிடம் ‌பேசுகையில்; அரசு எங்களை தொடர்‌ந்து ஏமாற்றியும், துரோகம் செய்தும் வருகிறது. இது நடப்பது 4 வது முறையாகும். நாங்கள் விரும்புவது விவாதத்தின் மீது ஓட்டெடுப்பு, அல்லது தீர்மானம் நிறைவேற்றப்பட வேண்டும் என்பதுதான். இவ்வாறு அவர் கூறினார்.

இந்த பிரச்னை கிளம்பியதை அடுத்து பா.ஜ., மூத்த தலைவர் அத்வானியை அழைத்து அவசர ஆலோசனை நடத்தி வருகிறார். இவருடன் அருண்ஜெட்லி, சுஷ்மாசுவராஜ், மற்றும் மத்திய அமைச்சர்கள் பிரணாப் முகர்ஜி, விலாஸ்ராவ் தேஷ்முக், பவன்குமார் பன்சால் ஆகியோர் இருந்தனர்.

என்ன நடக்கிறது என்றே தெரியவில்லை ஒரு வயதானவர் எவ்வளவுநாள் உண்ணாவிரதம் இருக்கிறார் ? ..........பாவம்