லாரி ஸ்டிரைக் வாபஸ்

by **Admin** Wed Aug 24, 2011 9:21 am

டெல்லியில் நடந்த பேச்சுவார்த்தையில் உடன்பாடு ஏற்பட்டதை தொடர்ந்து 5 நாட்களாக நடந்து வந்த லாரிகள் வேலைநிறுத்த போராட்டம் வாபஸ் பெறப்பட்டது.

5-வது நாளாக வேலை நிறுத்தம்

டீசல் விலையை குறைக்க வேண்டும், சுங்க கட்டணத்தை சீரமைக்க வேண்டும் என்பது உள்ளிட்ட கோரிக்கைகளை வலியுறுத்தி தமிழகம் உள்ளிட்ட 6 மாநிலங்களில் கடந்த 18-ந் தேதி நள்ளிரவு தொடங்கி, காலவரையற்ற லாரிகள் வேலைநிறுத்த போராட்டம் நடைபெற்றது.

இந்த வேலைநிறுத்த போராட்டம் நேற்று 5-வது நாளாக நீடித்தது.

பேச்சுவார்த்தையில் உடன்பாடு

இந்த நிலையில் லாரி ஸ்டிரைக்கை முடிவுக்கு கொண்டு வரும் வகையில் லாரி உரிமையாளர்களை மத்திய தரைவழி போக்குவரத்து துறை அமைச்சகம் நேற்று முன்தினம் பேச்சுவார்த்தைக்கு அழைத்தது. அன்று மத்திய தரைவழி போக்குவரத்து துறை அமைச்சகத்தின் இணை மற்றும் துணை செயலாளர்களுடன் நடந்த இந்த பேச்சுவார்த்தையில் முடிவு எதுவும் எட்டப்படவில்லை. எனவே மத்திய தரைவழி போக்குவரத்து துறை மந்திரி ஜோஷி முன்னிலையில் பேச்சுவார்த்தை நடத்த அதிகாரிகள் மற்றும் லாரி அதிபர்கள் முடிவு செய்தனர்.

ஆனால் மத்திய மந்திரி பங்கேற்காததால், நேற்று டெல்லியில் உள்ள மத்திய தரைவழி போக்குவரத்து துறை அமைச்சக அலுவலகத்தில் அதன் செயலாளர் உபாத்தியா முன்னிலையில் பேச்சுவார்த்தை நடந்தது. இதில் லாரி அதிபர்கள் சார்பில் அகில இந்திய மோட்டார் போக்குவரத்து காங்கிரஸ் தலைவர் சண்முகப்பா, தமிழ்நாடு மாநில லாரி உரிமையாளர்கள் சம்மேளன தலைவர் நல்லதம்பி உள்ளிட்ட முக்கிய நிர்வாகிகள் கலந்து கொண்டனர்.

காலை 11 மணி அளவில் தொடங்கிய இந்த பேச்சுவார்த்தை மாலை வரை நீடித்தது. இதில் சுமுக உடன்பாடு ஏற்பட்டது.

வேலைநிறுத்தம் வாபஸ்

இதைத்தொடர்ந்து, கடந்த 5 நாட்களாக நீடித்து வந்த காலவரையற்ற லாரிகள் வேலைநிறுத்த போராட்டம் வாபஸ் பெறப்படுவதாக தமிழ்நாடு மாநில லாரி உரிமையாளர்கள் சம்மேளனம் அறிவித்தது.

இது தொடர்பாக தமிழ்நாடு மாநில லாரி உரிமையாளர்கள் சம்மேளன தலைவர் நல்லதம்பி கூறியதாவது:-

வேலைநிறுத்தம் தொடர்பாக மத்திய தரைவழி போக்குவரத்து துறை செயலாளர் உபாத்தியாவுடன் பேச்சுவார்த்தை நடத்தினோம். இந்த பேச்சுவார்த்தையின் போது இந்தியா முழுவதும் மத்திய அரசால் நடத்தப்படும் 94 சுங்க சாவடிகளிலும் அந்தந்த மாவட்டங்களில் பதிவு செய்யப்பட்டு உள்ள உள்ளூர் வாகனங்களுக்கு 50 சதவீதம் சுங்க கட்டணத்தை குறைக்க அதிகாரிகள் சம்மதம் தெரிவித்தனர்.

இதேபோல் இன்சூரன்சு பிரிமிய கட்டணம் மற்றும் டயர் விலையை குறைக்கவும் தக்க நடவடிக்கை எடுப்பதாக அதிகாரிகள் தரப்பில் தெரிவிக்கப்பட்டது. இதனை ஏற்றுக்கொண்ட நாங்கள், கடந்த 5 நாட்களாக தமிழகம் உள்ளிட்ட 6 மாநிலங்களில் நடந்த காலவரையற்ற லாரிகள் வேலைநிறுத்த போராட்டத்தை வாபஸ் பெற்று கொண்டோம்.

இவ்வாறு அவர் கூறினார்.

லாரி போக்குவரத்து தொடங்கியது

லாரிகள் வேலைநிறுத்த போராட்டம் நேற்று மாலையில் வாபஸ் பெறப்பட்டதால், கடந்த 5 நாட்களாக வெளிமாநிலங்களுக்கு லோடு ஏற்றி ஆங்காங்கே பெட்ரோல் பங்க் மற்றும் தாபா ஓட்டல்களில் நிறுத்தப்பட்டு இருந்த லாரிகள் இரவு முதல் இயங்க தொடங்கின.

தினதந்தி