ரஜினிக்கு மருத்துவ பரிசோதனை: உடல்நலத்துடன் இருப்பதாக மருத்துவர்கள் தகவல்

by jesudoss Wed Aug 17, 2011 3:13 pm

ரஜினிக்கு கடந்த ஏப்ரல் 29ந் திகதி ராணா படப்பிடிப்பில் உடல்நலக் குறைவு ஏற்பட்டது. இதையடுத்து இசபெல்லா மற்றும் ராமச்சந்திரா மருத்துவமனைகளில் அனுமதிக்கப்பட்டு சிகிச்சை பெற்றார்.
சிறுநீரக பாதிப்பு இருந்ததால் உயர் சிகிச்சைக்காக சிங்கப்பூர் சென்றார். அங்குள்ள ஆஸ்பத்திரியில் ரஜினிக்கு தீவிர சிகிச்சை அளிக்கப்பட்டது. இதையடுத்து அவர் உடல்நிலையில் முன்னேற்றம் ஏற்பட்டது. பூரண குணமடைந்து கடந்த மாதம் 13ந் திகதி சென்னை திரும்பினார்.

ஆழ்வார்பேட்டையில் உள்ள மகள் ஐஸ்வர்யா வீட்டில் தங்கி தற்போது ஓய்வு எடுத்து வருகிறார். இதுவரை யாரையும் அவர் சந்திக்கவில்லை.

இதற்கிடையில் ரஜினி உடல் நிலை குறித்து மீண்டும் மருத்துவ பரிசோதனை நடந்தது. டாக்டர்கள் ரஜினி வீட்டுக்கு சென்று முழு உடல் பரிசோதனை செய்தனர். அவர் பூரண நலமடைந்து ஆரோக்கியத்துடன் இருப்பதாக டாக்டர்கள் திருப்தி தெரிவித்தனர்.

அக்டோபர் மாதம் ராணா படப்பிடிப்பை துவங்க திட்டமிட்டுள்ளனர். அதற்கு முன்னதாக அடுத்த மாதம் இறுதியில் இன்னொரு முறை ரஜினி உடல் பரிசோதனை செய்து கொள்வார் என கூறப்படுகிறது.

ராணா படத்துக்காக இயக்குனர் கே.எஸ்.ரவிக்குமார் லொக்கேஷன் பார்த்து வருகிறார். பிரமாண்ட அரங்குகள் அமைக்கவும் ஏற்பாடுகள் நடக்கிறது. ரசிகர்களை சந்திக்கவும் ரஜினி ஆர்வப்படுகிறார். படப்பிடிப்புக்கு முன்பே அவர்களை சந்திப்பாரா? அல்லது முடிந்த பிறகு சந்திப்பாரா? என்று உறுதியாக தெரியவில்லை