கார் லாரி மோதியதில் பிரபல இயக்குனர் ஜோஷியின் மகள் பரிதாபச் சாவு

by ரஞ்சித் Tue Jul 26, 2011 11:26 am

மாமல்லபுரம் அருகே சூளேரிகாடு பகுதியில் நேற்று நள்ளிரவு கார் மீது மணல் லாரி மோதியில் பிரபல மலையாள இயக்குனர் மகள் உள்பட 3 பேர் பரிதாபமாக இறந்தனர். இவர்கள் அனைவரும் சென்னை அருகே மறைமலைநகரில் உள்ள சாப்ட்வேர் கம்பெனி ஒன்றின் இன்ஜினியர்கள்.

சென்னை அருகே மறைமலைநகர் மகேந்திரா சிட்டியில் இன்போசிஸ் சாப்ட்வேர் நிறுவனம் உள்ளது. ஊரப்பாக்கம், ரயில்வே நகரை சேர்ந்த அஸ்வின் (27). ஊரப்பாக்கம் ராம்தேவ் அபார்ட்மென்டில் குடியிருக்கும் ஏசுதாஸ் (24), கேரள மாநிலம் கொச்சியை சேர்ந்த ஐஸ்வர்யா (23), திருச்சூர் அர்ஜூன் (23), எர்ணாகுளம் ராதிகா (24) ஆகியோர் இங்கு பணியாற்றி வந்தனர்.

இதில், ஐஸ்வர்யா பிரபல மலையாள இயக்குனர் ஜோஷியின் மகள். இவர்கள் அனைவரும் ஊரப்பாக்கம் பகுதியில், தனித்தனியாக வீடு எடுத்து தங்கியிருந்தனர்.

இந்நிலையில், நேற்று விடுமுறை என்பதால் அனைவரும் காரில், நேற்று காலை மாமல்லபுரத்துக்கு வந்தனர். கடற்கரை, சிற்பம் போன்றவற்றை சுற்றிப் பார்த்தனர்.

பின்னர் இரவு கோவளம் புறப்பட்டுள்ளனர். சூளேரிகாடு பகுதியில் கார் வந்து கொண்டிருந்தபோது, சென்னையில் இருந்து மாமல்லபுரம் நோக்கி சென்ற மணல் லாரி, கார் மீது பலமாக மோதியது.

பல அடி தூரத்துக்கு கார் இழுத்துச் செல்லப்பட்டது. காரில் இருந்தவர்கள் அலறினர். இதனால் லாரியை விட்டுவிட்டு டிரைவர், கிளீனர் ஓடிவிட்டனர்.

நடுரோட்டில் கார் கிடந்ததால் போக்குவரத்து பாதிக்கப்பட்டது. தகவல் கிடைத்ததும் மாமல்லபுரம் இன்ஸ்பெக்டர் கோவிந்தராஜன் போலீசாருடன் சம்பவ இடத்துக்கு விரைந்தார்.

காருக்குள் சிக்கி உயிருக்கு போராடியவர்களை போலீசார் மீட்டனர். இதில், ஐஸ்வர்யா, அர்ஜூன் சம்பவ இடத்திலேயே இறந்தனர்.

படுகாயம் அடைந்தவர்களை செங்கல்பட்டு அரசு மருத்துவமனைக்கு கொண்டு சென்றனர். அங்கு சிகிச்சை பலனின்றி, ராதிகா பரிதாபமாக இறந்தார்.

அஸ்வின், ஏசுதாஸ் ஆகியோருக்கு தீவிர சிகிச்சை அளிக்கப்படுகிறது. விபத்து தொடர்பாக, மாமல்லபுரம் போலீசார் வழக்குப்பதிவு செய்து, தலைமறைவாகி விட்ட லாரி டிரைவரை தேடி வருகின்றனர்.

tamilcnn