இறைவன் மணக்கோல காட்சி தந்த மணவூர்

by **சிவா** Mon Jul 18, 2011 5:32 am

இறைவன் சிவபெருமான் ஆடியது ஆலங்காடு, அமர்ந்தது திருவூறல், மணந்தது மணவூர் என்று சொல்வார்கள். அதன்படி திருவாலங்காட்டில் ஊர்த்துவ தாண்டவமாடிய சிவபெருமான், திருவூறல் எனப்படும் தக்கோலத்தில் அமர்ந்து, திருவாலங்காடு அருகே உள்ள மணவூரில் மணக்கோலத்தில் அகத்தியருக்குக் காட்சியளித்ததாகப் புராணம் கூறுகிறது.

திருவள்ளூர் மாவட்டம், பஞ்ச சபைகளில் ரத்தினசபையாக விளங்கும் திருவாலங்காடு அருகே சுமார் நான்கு கி.மீ. தொலைவில் அமைந்துள்ள ஊர் மணவூர். இந்த ஊர் சென்னை- அரக்கோணம் ரெயில் மார்க்கத்தில் சுமார் 54 கி.மீ. தொலைவில் அமைந்துள்ளது. மணவூர் ரெயில் நிலையத்திலிருந்து மிக அருகில் இந்த ஆலயம் அமைந்துள்ளது.

தொண்டை வளநாட்டை 24 கோட்டங்களாகப் பிரித்து ஆட்சி செய்து வந்த குரும்பர்கள் காலத்தில் நான்காவது கோட்டமாக மணவூர் விளங்கியது. இந்த ஊர் மணவிற், மணவில், மணயிர் என அழைக்கப்பட்டதாகக் கல்வெட்டுகள் மூலம் அறிய முடிகிறது.

மூன்றாம் ராஜராஜசோழனின் காலத்திய கல்வெட்டில், இங்குள்ள இறைவன் பெயர் `மணவில் உடையார் சோம நாததேவர்' என குறிப்பிடப்பட்டுள்ளது. இக்கல்வெட்டுகள் மூலம் இவ்வாலயத்தின் தொன்மையை அறிய முடிகிறது.

எந்த நேரமும் சிவபெருமானின் நெருக்கத்தில் இருப்பதால், ஒரு சமயம் நந்தி தேவருக்கு ஆணவம் ஏற்பட்டது. இதன் காரணமாக நந்திதேவர் சிவபெருமானின் சாபத்திற்கு ஆளாக நேரிட்டது. தான் செய்த தவறுக்காக வருந்திய நந்திதேவர், இறைவனிடம் மன்னிப்பும், சாப விமோசனமும் கேட்டார்.

மனம் இரங்கிய சிவபெருமான் அவருடைய சாபம் நீங்க மணவூர் சென்று தம்மை வழிபடுமாறு கேட்டுக்கொண்டார். அதன்படி மணவூர் வந்த நந்திதேவர் சாப விமோசனம் பெற்றுப் பழைய நிலையை அடைந்தார்.

இதனை நினைவுபடுத்தும் வகையிலும், அடியாரைக் கவுரவிக்கும் வகையிலும் இங்குள்ள இறைவனின் பெயர் திருநந்தீஸ்வரர் என்று அழைக்கப்படுகின்றது.இறைவன் திருநந்தீஸ்வரர் கிழக்கு முகமாய் எளிய வடிவில் காட்சிதர, அருகில் சிறிய நந்தி இறைவனை நோக்கி காட்சி தருகின்றது. இறைவியின் பெயர் ஆனந்தவல்லி. அகத்திய முனிவருக்காக இறைவன், அம்பிகையுடன் மணக்கோலத்தில் காட்சி தந்த தலம் என்பதால், இது மணவூராக அழைக்கப்படுகிறது. இவ்வாலயத்தில் வில்லேந்திய கண்ணப்ப நாயனாரின் உருவம் இருப்பது குறிப்பிடத்தக்கது.