உளவுத்துறை தோல்வி அல்ல: இந்தியா-பாக். பேச்சு வார்த்தையை சீர்குலைக்கவே குண்டு வெடிப்பு; ப.சிதம்பரம் தகவல்

மும்பை, ஜூலை. 14-


மும்பையில் தொடர் குண்டு வெடிப்பு நடந்த தகவல் அறிந்ததும் மத்திய உள்துறை மந்திரி ப.சிதம்பரம் நேற்றிரவு மும்பை விரைந்தார். குண்டு வெடித்த ஜவேரி பஜார், தாதர், ஓபரா ஹவுஸ் ஆகிய 3 இடங்களுக்கு சென்று அவர் பார்வையிட்டார்.

மும்பையில் இன்று காலை மந்திரி ப.சிதம்பரம் நிருபர்களுக்கு பேட்டியளித்தார். சுமார் 70 நிமிடம் அவர் நிருபர்களின் கேள்விகளுக்கு விளக்கம் அளித்தார். அப்போது அவர் கூறியதாவது:-

குண்டு வெடிப்பில் உயிரிழந்த குடும்பங்களைச் சேர்ந்தவர்களுக்கு எனது ஆழ்ந்த இரங்கலைத் தெரிவித்து கொள்கிறேன். இந்த நாசவேலையை எந்த தீவிரவாதிகள் செய்தார்கள் என்ற விசாரணை எல்லா கோணத்திலும் தொடங்கி நடந்து வருகிறது. இதற்கு காரணமானவர்கள் விரைவில் கண்டுபிடிக்கப்படுவார்கள்.

மும்பையில் தாக்குதல் நடத்தப்படலாம் என்று உளவுத்துறை நம்பகத் தகுந்த தகவல்கள் எதையும் தரவில்லை. இதற்காக உளவுத் துறை தோல்வி அடைந்து விட்டது என்று சொல்ல முடியாது. மத்திய, மாநில உளவுத்துறைகளை இதற்காக விமர்சிக்கக் கூடாது. எதற்காக இந்த குண்டு வெடிப்பு நடந்தது என்று நாங்கள் ஆய்வு செய்து வருகிறோம்.

இந்தியா, பாகிஸ்தான் இடையே இன்னும் 10 நாட்களில் தொடங்க உள்ள பேச்சுவார்த்தையை சீர்குலைக்கக்கூட இந்த குண்டு வெடிப்பு நடத்தப்பட்டிருக்கலாம். எல்லா கோணத்திலும் விசாரணை நடக்கிறது.

இந்தியாவின் அண்டை நாடுகளான பாகிஸ்தானும், ஆப்கானிஸ்தானும் தீவிரவாத மையங்களாக உள்ளன. இந்த நாடுகளால் இந்தியாவுக்கு தொல்லை நீடித்தப்படி உள்ளது. மும்பையில் தற்போது நடந்துள்ள குண்டு வெடிப்பு ரிமோட் கண்ட்ரோல் சாதனம் மூலம் இயக்கி நடத்தப்பட்டதாக தகவல் வெளியாகியுள்ளது. அது தவறு. குறித்த நேரத்தில் வெடிக்கும் வகையில் குண்டுகள் வைக்கப்பட்டதாக தெரிய வந்துள்ளது.

இந்த குண்டுகள் அமோனியம் நைட்ரேட் கலவையால் தயாரிக்கப்பட்டதாகும். தீவிரவாதிகள் மிகவும் திட்டமிட்டு இந்த நாசவேலையை செய்துள்ளனர். எந்த ஒரு தீவிரவாத இயக்கமும் இதுவரை இந்த குண்டு வெடிப்புக்கு பொறுப்பு ஏற்கவில்லை. எனவே தனிப்பட்ட எந்த ஒரு சமுதாயமும் மீதும் நாங்கள் குற்றம் சாட்ட விரும்பவில்லை.

குண்டு வெடிப்பில் வெளிநாட்டவர்கள் யாரும் பாதிக்கப்பட வில்லை. இந்தியாவில் உள்ள வெளிநாட்டு சுற்றுலா பயணிகள் அனைவரும் பாதுகாப்புடன் உள்ளனர். எனவே மும்பையில் நடத்தப்பட்ட தாக்குதல் முழுக்க, முழுக்க இந்தியர்களை குறி வைத்து நடத்தப்பட்ட தாக்குதல்தான்.

18 பேர் கொல்லப்பட்டுள்ளனர். இதில் ஒரே ஒரு நபர் தலைசிதறி பலியாகி உள்ளார். அவர் யார்? என்று அடையாளம் காண விசாரணை நடந்து வருகிறது. குண்டு வெடித்த இடங்களில் தடயங்கள் அழியாமல் இருக்கும் வகையில் கமாண்டோ பாதுகாப்பு போடப்பட்டுள்ளது. இது தடயவியல் விசாரணைக்கு உதவியாக இருக்கும்.

வியாபாரத்தை சீர் குலைக்கும் நோக்கத்துடன் குண்டு வெடிப்புகள் நடத்தப்படவில்லை. அதிக உயிரிழப்பை ஏற்படுத்தும் நோக்கத்துடன் மக்கள் நெரிசல் மிகுந்த இடத்தில் குண்டு வைத்துள்ளனர். குண்டு வைத்த சதிகாரர்கள் யார் என்பதை கண்டுபிடித்துவிட முடியும் என்ற நம்பிக்கை எனக்கு உள்ளது. இதுவரை யாரும் கைது செய்யப்படவில்லை.

குண்டு வெடிப்பு நடந்த 3 இடங்களிலும் பொருத்தப்பட்டிருந்த கண்காணிப்பு காமிராக்கள் ஆய்வு செய்யப்பட்டன. சில காமிராக்கள் குண்டு வெடிப்பில் சிதைந்துள்ளன. ஜவேரி பஜார், ஓபாரா ஹவுஸ் ஆகிய 2 இடங்களிலும் வெடித்த குண்டு மிக, மிக சக்தி வாய்ந்ததாக இருந்தது கண்காணிப்பு காமிரா மூலம் தெரியவந்துள்ளது. தாதரில் வெடித்த குண்டு சக்தி குறைந்ததாகும்.

மும்பை மக்கள் ஒத்துழைப்பு கொடுத்ததற்கு எனது பாராட்டுக்களை தெரிவித்துக் கொள்கிறேன். இன்று காலை மக்கள் சகஜ நிலைக்கு திரும்பி உள்ளனர். மாணவ-மாணவிகள் வழக்கம் போல் பள்ளிக்கு செல்வதை பார்த்த போது மகிழ்ச்சியாக இருந்தது. மும்பை மக்கள் தொடர்ந்து அமைதி காக்க வேண்டும் என்று கேட்டுக் கொள்கிறேன்.

இவ்வாறு மத்திய மந்திரி ப.சிதம்பரம் கூறினார்.


http://www.maalaimalar.com/2011/07/14130532/Bomb-blast-for-India--Pak-talk.html