அதிர வைக்கும் தண்டனை, ஒரு கிராமத்துக்கே!

அடிஸ் அபாபா, எத்தியோபியா: ஒரு கிராமத்துக்கே தண்டனை கொடுத்துத் தீப்பளித்திருக்கின்றது எத்தியோப்பிய நீதிமன்றம் ஒன்று. தனிப்பட்ட நபர்கள் இல்லாமல், ஒரு ஜனக்கூட்டமே ஒன்றாகச் சேர்ந்து செய்த காரியத்துக்கு தண்டனை வழங்க முடியாது என்று இருந்த நடைமுறை, இதனால் உடைந்திருக்கின்றது.

அஸென்டாபோ நகரத்துக்கு அருகிலுள்ள கிராமம் ஒன்றில்தான் சம்பவம் நடைபெற்றிருக்கின்றது. இந்தக் கிராமத்தில் கிருஸ்துவர்களும் முஸ்லீம்களும் கிட்டத்தட்ட சம அளவில் வசிக்கின்றனர். கடந்த மார்ச் மாதத்தில் கிராமத்தில் ஒரு வதந்தி பரவத் தொடங்கியது.

வதந்தி என்னவென்றால், கிராமத்திலிருந்த சர்ச் ஒன்றின் பின்னால், கிளித்தெறியப்பட்ட குர்ஆனின் பக்கங்கள் காணப்பட்டன என்பதே.

உடனே கிராமத்திலிருந்த முஸ்லிம் மக்கள் ஒன்று திரண்டனர். கூட்டமாகச் சென்று கிருஸ்துவர்களைத் தாக்கத் தொடங்கினர். பெரிதும் சிறிதுமாக மொத்தம் 69 சர்ச்கள் எரிக்கப்பட்டன. கிருஸ்துவர்கள் கிராமத்தைவிட்டே உயிர்தப்பி ஓடவேண்டியதாயிற்று.

நிலைமை சுமுகமானதும், இந்தத் தாக்குதல் குறித்து விசாரணை நடைபெற்று வழக்குப் பதிவாகியது. மக்கள் கூட்டமே திரண்டு தாக்குதல் நடாத்தியதால், யாரையும் தண்டிப்பது இயலாத காரியம் என பத்திரிகைகள் எழுதின. வழக்கு நீதிமன்றத்தில் எடுத்துக் கொள்ளப்பட்டபோது, முழு நாடுமே இந்த வழக்கை ஆர்வத்துடன் கவனிக்கத் தொடங்கியது.

வழக்கு முடிவடைந்து, நேற்று (வெள்ளிக் கிழமை) தீர்ப்பு வழங்கப்பட்டுள்ளது.

சாட்சிகளின் அடிப்படையில், தாக்குதல்களில் ஈடுபட்டவர்களில் அதிகளவு வன்முறையில் ஈடுபட்டவர்கள் யார், கல்லெறிவதுடன் நிறுத்திக் கொண்டவர்கள் யார் என்று பட்டியல் தயாரிக்கப்பட்டது. அதன் அடிப்படையிலேயே தீர்ப்பு வழங்கப்பட்டுள்ளது.

தீர்ப்பின்படி, மொத்தம் 558 பேர் தண்டிக்கப்படுகின்றனர். சிறியளவில் வன்முறையில் ஈடுபட்டவர்களுக்கு குறைந்தபட்ச தண்டனையாக 6 மாத சிறைவாசம் கிடைத்திருக்கின்றது. தீவைப்பு போன்ற செயல்களில் ஈடுபட்டவர்களுக்கு வழங்கப்பட்டுள்ள அதிகபட்ச தண்டனை எவ்வளவு தெரியுமா? 25 வருட சிறைவாசம்!

இந்த நீதிபதியை, தமிழ்நாட்டுக்கு அழைத்து வந்தால் என்னாகும்?

நன்றி:விறுவிறுப்பு

உண்மையாகவே அசத்தலான தண்டனைதான்