தென்கொரியாவில் விசா மோசடியில் சிக்கிய நடிகை லக்ஷா மீட்பு: தயாரிப்பாளர் மீது தாய் பபீதா பரபரப்பு புகார்

by ராமகிருஷ்ணன் Sat Jul 02, 2011 2:35 pm

சென்னை, ஜூலை 2-

பிரபல கவர்ச்சி நடிகை லக்ஷா. இவர் முன்னாள் கவர்ச்சி நடிகை பபீதாவின் மகள். லாலி, என்ற படத்தில் லக்ஷா நடித்துவருகிறார். இதன் படப்பிடிப்புக்காக தென் கொரியாவுக்கு லக்ஷாவை அழைத்து சென்றனர்.

அவருடன் நடன கலைஞர்களும் சென்றார்கள். டெல்லி விமான நிலையத்தில் துணை நடிகர்கள் என்ற பெயரில் மேலும் 29 பேர் ஏறிக்கொண்டனர். தென் கொரியாவில் லக்ஷா பங்கேற்ற நடன காட்சி 4 நாட்கள் படமாக்கப்பட்டது. அப்போது டெல்லியில் இருந்து சென்ற 29 பேரும் திடீரென மாயமானார்கள்.

லக்ஷாவும் சென்னையில் இருந்து சென்ற நடனக் குழுவினரும் நாடு திரும்ப தென் கொரியா விமான நிலையத்துக்கு வந்தபோது அதிகாரிகள் தடுத்து நிறுத்தினார்கள். டெல்லியில் இருந்து வந்த 29 பேரும் ஜாயிண்ட் விசாவில் வந்திருப்பதால் அவர்களும் வந்தால்தான் நாடு திரும்ப அனுமதிப்போம் என்றனர்.

லக்ஷா உள்ளிட்ட படக்குழுவினர் அங்குள்ள ஓட்டலில் சிறை வைக்கப்பட்டனர். லக்ஷா தாய் பபீதா இதுகுறித்து பெப்சி யூனியனில் புகார் செய்தார். பெப்சி நிர்வாகிகள் தலையிட்டனர். அவர்கள் முயற்சியால் லக்ஷா விடுவிக்கப்பட்டார்.

நேற்று அவர் டெல்லி வந்து சேர்ந்தார். இன்று காலை அங்கிருந்து விமானத்தில் புறப்பட்டு மதியம் சென்னை வந்து சேர்ந்தார். லக்ஷா மீட்கப்பட்டது குறித்து பபீதா மாலை மலர் நிருபரிடம் கூறியதாவது:-

எனது மகள் லக்ஷாவை லாலி படத்தில் ஒப்பந்தம் செய்து தென் கொரியாவுக்கு அழைத்துச் சென்றனர். அவருடன் சினிமாவுக்கு சம்பந்தம் இல்லாத 29 பேரை டெல்லியில் இருந்து அழைத்து போய் இருக்கிறார்கள். இதனால் தென் கொரியாவில் பிரச்சினை ஏற்பட்டுள்ளது.

தயாரிப்பாளர்கள் தென் கொரியாவுக்கு போகவில்லை. இதில் மோசடி நடந்துள்ளது. 29 பேரை தேவை இல்லாமல் கூட்டிப் போனது ஏன் என்று புரியவில்லை. இனிமேல் படப்பிடிப்புக்காக வெளிநாட்டுக்கு மகளை அனுப்புவதற்கே பயமாக இருக்கிறது. படப்பிடிப்பு குழுவினருடன் கூட்டிச் செல்வது தவறு. சிறு தயாரிப்பாளர்கள்தான் இது போன்ற செயலில் ஈடுபடுகின்றனர். பெப்சி முயற்சியால் எனது மகள் மீட்கப்பட்டார்.

இவ்வாறு பபீதா கூறினார்.