“எங்க ஏரியா.. உள்ளே வராதே” இது லேசான ஒரு மிரட்டல்!

சீனாவின் துணை வெளியுறவு அமைச்சர் நேற்று (வியாழக்கிழமை) அமெரிக்காவுக்கு எச்சரிக்கை விடுத்துள்ளார். “பதட்டமும், பிரச்சினைகளும் உள்ள எமது கடல் பகுதிக்குள் வராமல், விலகியிருங்கள்” என்பதே, அவரது எச்சரிக்கை.

இவர் குறிப்பிடும் கடல் பகுதி, தென் சீனக் கடல்.

உலகின் மிகவும் பிசியான கப்பல் போக்குவரத்து ரூட்களில் தென் சீனக் கடல்பகுதியும் ஒன்று. போக்குவரத்துப் பாதை என்பதைவிட இப்பகுதிக்கு இருக்கும் மற்றொரு முக்கியத்துவம், இந்தக் கடலின் அடியே உள்ள எண்ணெய் மற்றும் எரிவாயு வளம்.

இப்படியான ‘பணக்கார’ கடல் பகுதியை இந்தப் பிராந்தியத்திலுள்ள கிட்டத்தட்ட அனைத்து நாடுகளுமே, தம்மடைய கடல் என்று உரிமை கொண்டாடுகின்றன. புரூணை, சீனா, மலேசியா, பிலிப்பீன்ஸ், தாய்வான், வியட்னாம் ஆகிய ஐந்து நாடுகளும், இந்தக் கடல்பகுதி முழுமையாக தமது நாட்டுக்குச் சொந்தமானது என்கின்றன.

இவர்களில் அதிகளவில் சத்தம் போட்டு உரிமை கொண்டாடுபவை, சீனாவும் வியட்னாமும்தான். இந்த இரண்டில் வியட்னாம், தற்போது அமெரிக்காவுடன் நெருங்கிவரத் தொடங்கியுள்ள நாடு.

இவ்வளவு நாடுகளும் உரிமை கொண்டாடினாலும், இந்தக் கடல்பகுதி உத்தியோகபூர்வமாக யாருக்கும் சொந்தமானதல்ல. இதனால், உரிமை கொண்டாடும் நாடுகள் தத்தமது கடற்படைகளை வைத்துக் கொண்டு தென்சீனக் கடல்பகுதியில் விளையாட்டுக் காட்டுவது வழக்கம்.

கடந்த மாதம் வியட்னாம், இந்தக் கடல்பகுதியின் ஊடாக செல்லும் தமது கேபிள்களை சீனக் கடற்படைக் கப்பல்கள் அறுத்தெறிந்து விட்டுச் செல்கின்றன எனப் புகார் கூறியது. சீனா அதை மறுத்திருந்தது. இதையடுத்து இருதரப்பும் வழமையைவிடக் கொஞ்சம் அதிகமாகவே வாய்ச் சண்டை போட்டுக் கொண்டன.

இதுதான் தென் சீனக் கடல்பகுதி

இரு நாடுகள் சண்டைபோடத் தொடங்கினால், அங்கிள் சாம் சும்மா இருப்பாரா? அதுவும், இதில் சம்மந்தப்பட்டது எண்ணை வளம் அதிகமுள்ள பகுதியாக வேறு இருக்கிறது!

ஆசியாவுக்கு விஜயம் செய்த ஹிலாரி கிளின்டன், “தென் சீனக் கடல்பகுதி, தேசிய பாதுகாப்புக்கு முக்கியத்துவம் வாய்ந்த பகுதி. இதில் மோதல்கள் நடப்பதை அமெரிக்கா பார்த்துக்கொண்டு சும்மா இருக்காது” என அறிவித்துவிட்டுச் சென்றார்.

தென்சீனக் கடலில், அமெரிக்காவின் ‘தேசிய பாதுகாப்பு’ எங்கே வருகிறது? அதை யாரும் கேட்கவில்லை.

அமெரிக்காவின் இந்த அறிவிப்பு சீனாவைக் கவலைப்பட வைத்திருக்கின்றது. இந்தக் கடல் பகுதியில் அமெரிக்கா, வியட்னாமுக்கு ஆதரவாகச் செயற்படத் தயாராகின்றதோ என்பதுதான், சீனக் கவலைக்குக் காரணம். அதையடுத்தே சீன துணை வெளியுறவு அமைச்சர் நேற்றைய தினம் எச்சரிக்கை விடுத்துள்ளார்.

“எங்க ஏரியா.. உள்ளே வராதே!”

இப்படியான எச்சரிக்கைகளைக் கேட்டுவிட்டுச் சும்மா இருக்கும் பழக்கம் அமெரிக்காவுக்கு கிடையாது. சீனாவுக்கு எதிரான அமெரிக்க அறிக்கை, அநேகமாக இன்று வெளியாகும்.

நன்றி:விறுவிறுப்பு

உலகில் உள்ள நல்லது எல்லாம் அமெரிக்காவினுடயது என்கிற எண்ணம் அவர்களுக்கு . இது எங்கு போயி முடியுமோ ?

மூக்கு வேர்த்து போச்சு அமெரிக்காவுக்கு !!!!!!!!!!!!! இனி ஆரம்பம்தான் !!!!!!!!!!!!!!

இரண்டு(அமெரிக்கர்களும்,சீனர்களும்) பேரும் உத்தமர்கள் இல்லை இது எப்படி இருக்கிறது என்றால் திருடனுக்கும் திருடனுக்கும் சண்டை வருவது போல் உள்ளது...அமெரிக்கா பழைய திருடன் சீனா புது வரவு...