டீசல், கியாஸ் விலை உயர்வு நள்ளிரவு முதல் அமல்

by **சிவா** Sat Jun 25, 2011 10:48 am

சமையல் கியாஸ் விலையை மத்திய அரசு அதிரடியாக 50 ரூபாய் உயத்தியது. டீசல் விலை லிட்டருக்கு 3 ரூபாயும், மண்எண்ணெய் விலை லிட்டருக்கு 2 ரூபாயும் உயர்த்தப்பட்டு உள்ளது. இந்த விலை உயர்வு நேற்று நள்ளிரவு முதல் அமலுக்கு வந்தது.

பெட்ரோலிய பொருட்களில் பெட்ரோலின் விலையை நிர்ணயிக்கும் அதிகாரம் மட்டும் எண்ணை நிறுவனங்களுக்கு உள்ளது.

மந்திரிகள் குழு

ஆனால் டீசல், மண்எண்ணெய், சமையல் கியாஸ் ஆகியவற்றின் விலையை நிர்ணயிக்கும் அதிகாரம் மத்திய அரசிடமே உள்ளது. இவற்றின் விலை நிர்ணயம் குறித்து முடிவு எடுப்பதற்காக நிதி மந்திரி பிரணாப் முகர்ஜி தலைமையில் மந்திரிகள் குழு ஒன்று அமைக்கப்பட்டு உள்ளது.

சர்வதேச சந்தையில் கச்சா எண்ணெயின் விலை உயர்ந்து இருப்பதாலும், டீசல், மண்எண்ணெய், சமையல் கியாஸ் ஆகியவற்றின் விற்பனை மூலம் ரூ.1 லட்சத்து 71 ஆயிரத்து 140 கோடி இழப்பு ஏற்படுவதாலும் அவற்றின் விலையை உயர்த்த வேண்டும் என்று பொதுத்துறை எண்ணெய் நிறுவனங்கள் மத்திய அரசை வற்புறுத்தி வந்தன.

சமையல் கியாஸ் விலை ரூ.50 உயர்வு

இந்த நிலையில் நிதி மந்திரி பிரணாப் முகர்ஜி தலைமையிலான மந்திரிகள் குழு கூட்டம் நேற்று டெல்லியில் நடைபெற்றது.

இந்த கூட்டத்தில் டீசல், மண்எண்ணெய், சமையல் கியாஸ் ஆகியவற்றின் விலையை உயர்த்துவது என்று முடிவு செய்யப்பட்டது.

அதன்படி, 14.2 கிலோ எடை கொண்ட சமையல் கியாஸ் விலை சிலிண்டருக்கு 50 ரூபாய் உயர்த்தப்பட்டது. டீசல் விலை லிட்டருக்கு 3 ரூபாயும், மண்எண்ணெய் விலை லிட்டருக்கு 2 ரூபாயும் உயர்த்தப்பட்டது.

சிலிண்டர் விலை ரூ.402

மண்எண்ணெயின் விலை கடந்த ஆண்டு லிட்டருக்கு 3 ரூபாய் உயர்த்தப்பட்டது. அதன் பிறகு இப்போது லிட்டருக்கு 2 ரூபாய் உயர்த்தப்பட்டு இருக்கிறது.

சென்னை நகரில் இதுவரை சமையல் கியாஸ் விலை சிலிண்டருக்கு 352 ரூபாய் 35 காசாக இருந்து வந்தது. 50 ரூபாய் விலை உயர்ந்து இருப்பதால் கியாஸ் சிலிண்டர் விலை தற்போது 402 ரூபாய் 35 காசாக அதிகரித்து விட்டது.

இந்த விலை உயர்வு நேற்று நள்ளிரவு முதல் அமலுக்கு வந்தது.

விலை உயர்வு பற்றிய தகவலை மந்திரிகள் குழு கூட்டம் முடிந்ததும், பெட்ரோலிய துறை மந்திரி ஜெய்பால் ரெட்டி நிருபர்களிடம் தெரிவித்தார்.

அப்போது அவர் மேலும் கூறியதாவது:-

வரிகள் குறைப்பு

கச்சா எண்ணெய் மீதான 5 சதவீத சுங்க வரி ரத்து செய்யப்படுகிறது. டீசல் மீதான சுங்க வரி 7.5 சதவீதத்தில் இருந்து 2.5 சதவீதமாக குறைக்கப்பட்டு உள்ளது. இதேபோல் டீசல் மீதான உற்பத்தி வரி லிட்டருக்கு 4 ரூபாய் 60 காசில் இருந்து 2 ரூபாயாக குறைக்கப்பட்டு இருக்கிறது.

சுங்கவரியும், உற்பத்தி வரியும் குறைக்கப்பட்டு இருப்பதால் அரசுக்கு 2011-12-ம் நிதி ஆண்டில் ரூ.49 ஆயிரம் கோடி வருவாய் இழப்பு ஏற்படும். எண்ணெய் நிறுவனங்களுக்கு ஏற்படும் இழப்பு ரூ.21 ஆயிரம் கோடி குறையும்.

டீசல், மண்எண்ணெய், சமையல் கியாஸ் விலை உயர்வு மற்றும் வரி குறைப்பு ஆகியவற்றுக்கு பின்னரும் எண்ணெய் நிறுவனங்களுக்கு இந்த நிதி ஆண்டில் ரூ.1 லட்சத்து ஆயிரத்து 140 கோடி இழப்பு ஏற்படும்.

இவ்வாறு ஜெய்பால் ரெட்டி கூறினார்.

by **சிவா** Sat Jun 25, 2011 10:49 am

சமையல் கியாஸ் விலை உயர்வு:
மம்தா பானர்ஜி எதிர்ப்பு

சமையல் கியாஸ் விலையை மத்திய அரசு ரூ.50 உயர்த்தி இருக்கிறது. இது போல டீசல், மண்எண்ணெய் விலையும் உயர்த்தப்பட்டு இருக்கிறது.

இதற்கு ஐக்கிய முற்போக்கு கூட்டணியில் இடம் பெற்று இருக்கும் திரிணாமுல் காங்கிரசின் தலைவரும், மேற்கு வங்காள முதல்-மந்திரியுமான மம்தா பானர்ஜி கடும் எதிர்ப்பு தெரிவித்து இருக்கிறார்.

இதுபற்றி அவர் நிருபர்களிடம் கூறுகையில், ``பெட்ரோலியம் பொருட்களின் விலையை அடிக்கடி மத்திய அரசு உயர்த்தி வருவதை நாங்கள் ஆதரிக்க வில்லை. இந்த விலை உயர்வு சாதாரண மக்களை பெரிதும் பாதிக்கும். எங்கள் கருத்தை மத்திய அரசுக்கு தெரிவித்து இருக்கிறோம். விலை உயர்வை மத்திய அரசு வாபஸ் பெற வேண்டும்.''

தினதந்தி