"ஏழைகளின் கஷ்டம் தெரியும்!'

by positivekarthick Mon Jun 20, 2011 6:57 am

எம்.எல்.ஏ.,வான பூசாரி கருப்பசாமி: ஏழ்மை குடும்பத்தில் பிறந்ததால், ஐந்தாம் வகுப்பு வரை மட்டுமே படிக்க முடிந்தது. பின், பெட்டிக்கடை வைத்து தொழில் செய்து வந்தேன். 1980ம் ஆண்டு அ.தி.மு.க.,வில் சேர்ந்தேன். அதன்பின், சிறிது காலத்தில் கட்சியில் கிளை செயலராக பதவி கிடைத்தது. நான் என் பெட்டிக்கடையுடன் சேர்த்து கட்சி வேலையையும் பார்த்து கொண்டிருந்தேன்.பெட்டிக்கடை தொழிலில் நஷ்டம் ஏற்பட்டதால், பின்னர் கூலி வேலைக்கு சென்று கொண்டே பூசாரியாகவும் இருந்தேன். கட்சி பணியும் இடைவிடாமல் செய்ததால், எனக்கு, ஒன்றிய மீனவர் அணி மற்றும் ஒன்றிய துணைச் செயலர் என அடுத்தடுத்து பதவிகள் கிடைத்தன.எனக்கு கிடைத்த பதவியை சரியாக பயன்படுத்தி, கட்சிக்காக உழைத்தேன். இந்த தேர்தலில், 114 பேர் என் தொகுதியில் சீட் கேட்டு இருந்தனர். ஆனால், தாழ்த்தப்பட்ட அருந்ததியர் வகுப்பைச் சேர்ந்த எனக்கு, ஜெயலலிதா, "சீட்' வழங்கினார்.தேர்தலில், 63 ஆயிரம் ஓட்டுகள் வித்தியாசத்தில், காங்கிரஸ் வேட்பாளரை தோற்கடித்து, அவினாசி தொகுதி எம்.எல். ஏ.,வாக ஆகி இருக்கிறேன்.என் தொகுதியில், தினமும் ஏழை மக்களை சந்தித்து, குறைகளை கேட்கிறேன். அவர்களின் குறைகளுக்கு என்னால் முடிந்த உதவிகளை செய்து தருவேன். ஏனென்றால், நான் வறுமையில் வாழ்ந்ததால் ஏழைகளின் கஷ்டம் என்ன என்பது எனக்கு தெரியும்.தற்போது எம்.எல்.ஏ.,வான பின் அடிக்கடி கோவில் செல்ல முடிவதில்லை. அதனால் காலையில் பூஜை செய்து விட்டு, தொகுதிக்குள் போய் விடுவேன். என்னைப் போன்று சாதாரண தொண்டனும் எம்.எல்.ஏ., மந்திரி ஆகலாம் என்றால் அது அ.தி.மு.க.,வில் தான்!
நன்றி தின மலர்